Isaya 26 - Bhibhiliya Nya Guage

Ndzimo nya guvhikedwe khu Nungungulu

¹ Khu litshigu lolo, gu na embeledwa ndzimo yeyi tigoni gwa Judha, khavo: Hi na ni lidhoropa li tiyidego ngudzu, Nungungulu a na emisa guvbanyisa gu khala likhokhola ni libhiyo.

² Tulani malimba gasi vathu va lulamidego, vathu nya gutumbege va ta bela.

³ Uwe Pfhumu Nungungulu, u ngu ninga gurula vathu mapimo yawe ma khedziselago Uwe, kholu va ngu tumba Uwe.

⁴ Tumbani Pfhumu Nungungulu khavbo gu si vbeligo; kholu Pfhumu Nungungulu, khuye giwindri nya gusihale avbo, kala gupindruga.

⁵ Kholu a ngu thesa avo va vbanyago malangani nya gukhugege, ni gu thesa vbavbatshi lidhoropa li dzi khusedzago, a pfhungumula lidhoropa lawe, a li thesa vbavbatshi li khala kudzudzwane.

⁶ Li na gandredzedwa khu migondro; migondro ya vahamugi ni sisiwana, yi na gimbila khu vbatshani gwaye.

⁷ Ndzila ya wule a lulamidego khya lisine, uwe u lulamidego guvbindrisa, agisa ndzila ya vale va lulamidego.

⁸ Hi ngu lirela gulamula gwago Pfhumu Nungungulu. Gusuva gwathu nya gukhongolo, khu gu alakanya lina lago.

⁹ Hefemulo wangu wa gu vbweta uwe wutshigu watshavbo, gu ngari dzimindrudzile, hefemulo wangu wa gu vbweta uwe; kholu milayo yago yi ngu gimbidzisa vathu mafuni, vathu va tigoni, va na hevbule gululama.

¹⁰ Muthu nya guvivbedwe khu monyo, ambari a gu tsetseledwa, kha hevbuli gululama, ambari a gu khala tigoni la va nya gululama, uye a gu gira ugo nya guvivbe, kha woni wugulu wa Pfhumu Nungungulu.

¹¹ Mandza yago ma khusegide, Pfhumu Nungungulu, ambari khu guralo, kha va ma woni! Va yeyedze nya gukhuwe u ngu khathalela vathu vago, gasi va khale dzitshoni; va na dagarele khu nilo u wu dongisedego valala vago.

¹² Uwe Pfhumu Nungungulu, u na hi ninga gurula, kholu khuwe u hi giredego mithumo yathu yatshavbo.

¹³ Ama Pfhumu Nungungulu wathu, hi diri ni vambe vafumeli va hi fumedego, aholu khu kotani nya tshivba yago, ethu hi ngu rungudza lina lago.

¹⁴ Vathu vava, va fude, gima kha va na wuga gambe; va dzingidwe marowoni, kha va na duga khumo, kholu u va tsayiside u va mbembisa, u fuviside malina yawe va si alakanywi gambe.

¹⁵ Gambe, uwe Pfhumu Nungungulu, u engedzede vathu vava, u va engedzede va tala va gu ambagiside wudhumo, u andriside mivbingano nya litigo lawe latshavbo.

¹⁶ Pfhumu Nungungulu, sigaradzoni gwawe, va di gu vbweta; avbo u nga va tsayisa, va di lila avbo gwago.

¹⁷ Gufanana ni nyamayi a gu ni mimba, a gu bani na gulumwa, a gupwa guvbisa a wombeledzela dzihuwa, ethu nethu hi diri kharato mbeli gwago, Pfhumu Nungungulu.

¹⁸ Hi diri ni mimba, hi lumwa, aholu, hi di hefemula liphuvbo basi, kha ha vbanyisa litigo; ambari gu velega vambe vathu nya gukhale mafuni.

¹⁹ Vafi vago va na bwelo khavbo va vbanya, si na duga khu marowoni sirumbi sa vathu vago, wugani mu ghiya, enu mwatshavbo mu ladego umo nya kudzudzwane nya mafu, kholu thondrwane yago uwe Pfhumu Nungungulu, ya gu fanana ni thondrwane nya guvbanyise mitongwe, kholu mafu ma na bwelo khavbo ma dusa vale va fudego.

²⁰ Vathu vangu, Indrani, belani dzinyumbani gwanu mu dzi segela malimba, mu sihala umo gikhatinyana kala li bose likhulo laye.

²¹ Kholu, wonani nya gukhenu Pfhumu Nungungulu, a na khuga khu wulangani gwaye guta tsayisa vavbanyi va mafuni, khu kotani nya sighoho sawe. Mafu ma na funungula novba wawe, ma si sihi gambe vale va songedwego umo.