Isaya 19 - Bhibhiliya Nya Guage

Giprofeto khu Egipito

¹ Gitiviso khu litigo la Egipito: Wonani gukhenu, Pfhumu Nungungulu, a nguta na khilede vbatshani nya lipfhi nya mazambo, ata tigoni ga Egipito. Sifananiso nya vanungungulu va Egipito, si na ndrendremela mbeli gwaye, ni myonyo ya Vagipiti yi na ghavata ndrani gwawe.

² Kholu Eni nyi na gira gu Vagipiti va dwana ni Vagipiti vakwawe; muthu ni muthu a na wugela ndriyaye, ni mumbe a na wugela muakelane waye, lidhoropa li na wugela limbe lidhoropa, mufumo wu wugela wumbe mufumo.

³ Hefemulo wa Vagipiti wu na titivala ndrani gwawe, nyi na phalalegisa makungo yawe, va na ya wudzisa wusingalagadzi ga sifananiso sawe, ni ga vale va khozelago va nya gufa ni valoli nya dzisolo.

⁴ Va Egipito nyi na va ningela mandzani ga mukhozisi, va na fumedwa khu mufumeli nya dzihanyi; a ngu ganela Mune, Pfhumu Nungungulu nya Tshivba Yatshavbo.

⁵ Mati nya tsongo wa Nilo ma navbwa, ni tsongo wu na banga wu khala gihala.

⁶ Milonga nya mati yi na nunga, ni mati nya tsongo wa Nilo, ma na vbunguga, mavbwa, dzitshava ni madadanga si na wu na.

⁷ Mwasi wa bambe nya tsongo wa Nilo, ni umo wu vbaladzago umo, ni satshavbo si yadwego bambe nya tsongo wa Nilo, si na banga, si vbuvbiswa khu phuvbo si mwalalega.

⁸ Vagogi nya dzindzandzi va na lila, ambari vale va lovago khu silowo tsongoni; ni vale va gogago matini, va na vbela tshivba.

⁹ Vale va lugago khu dzikhindra nya seda, ni vale va lugago myendra nya guage, va na khala dzitshoni.

¹⁰ Vathu nya guthavisege va na vbwasamiswa, ni sithumi sawe satshavbo si na vbela tshivba.

¹¹ Vathangeli va Zowani va vbungugide mapimo; ni madhota nya gugengele ma ningago wusingalagadzi Faro, va gu mu ninga wusingalagadzi nya wuphuguphugu; gu na phasa ginani gu embelani Faro, khenu: “Nyi gyanana gya vagengeli, gitugulwana gya vafumeli va gale?”

¹² Olu vomo hayi vagengeli vago? Va na gu embele va gu bani va siti esi Pfhumu Nungungulu nya Tshivba Yatshavbo, a hungidego gu gira tigoni ga Egipito.

¹³ Vathangeli va Zowa va vbungugide mapimo, vathangeli nya lidhoropa la Menifisi va kanganyisidwe; va pengiside Egipito a bela gughohani, avo gu vathangeli nya dzinyumba dzawe.

¹⁴ Pfhumu Nungungulu thede vbakari gwawe liphuvbo nya guvivbe; va dhedherekisa Egipito ga mithumo yaye yatshavbo kha nga muthu nya guleve a puluwundrago vbatshani nya magose yaye.

¹⁵ Tigoni ga Egipito wu mwalo thumo wu na girwago gambe, khu mufumeli, mwendro khu khumbi, khu litamo nya ngindru mwendro mbosi.

¹⁶ Khu litshigu lolo, Vagipiti va na fanana ni vanyamayi, va na ndrendremela va thava gu vetwa khu gyandza gya Pfhumu Nungungulu nya Tshivba Yatshavbo, a gi khusedzidego gasi gu va wugela.

¹⁷ Litigo la Judha li na thisa ga Egipito; watshavbo wule a na gu li dundrugago a na ndrendremela, khu kotani nya esi si emisidwego khu Pfhumu Nungungulu nya Tshivba Yatshavbo, khu iso a si emisidego khu kotani yawe.

¹⁸ Ga litshigu lolo, gu na manega livbandre madhoropa ya Egipito, aya ma na gu ganelago khu lidimi nya gikhanani ni gu sambanya ga Pfhumu Nungungulu nya Tshivba Yatshavbo, limwedo nya ayo, li na ranwa Lidhoropa nya Gumbembise.

¹⁹ Khu litshigu lolo, gu na manega giluvelo nya gulumbe Pfhumu Nungungulu, tigoni ga Egipito, vbinganoni gwaye, gu na emiswa lidingo la Pfhumu Nungungulu; lidingo leli gasi gu khala gialakanyiso gyaye.

²⁰ Esi si na khala giyeyedzo ni wufakazi wa Pfhumu Nungungulu nya Tshivba Yatshavbo tigoni ga Egipito, kholu va gu lila ga Pfhumu Nungungulu khu kotani nya avo va va tshanisago, Uye a na va rumela muvbanyisi ni muvhikeli nya gute va tshudzisa.

²¹ Pfhumu Nungungulu a na tidwa tigoni ga Egipito, Vagipiti va na muti Pfhumu Nungungulu litshigu lolo; avo va na mu khozela va mu girela dzimhamba nya miphaso ni miningelo nya dzimbewu, va na gira sisambanyo ga Pfhumu Nungungulu, va bwelo khavbo va si landrisa.

²² Pfhumu Nungungulu a na bayisa Vagipiti. A na va bayisa bwelo khavbo a va hawulugisa; avo va na vbindrugedza va wuya ga Pfhumu Nungungulu, Uye a na hakha milombelo yawe, a va vbanyisa.

²³ Khu litshigu lolo, gu na manega ndzila nya gutshanganise litigo la Egipito ni la Asiriya, Vaasiriya va na hongola Egipito, Vagipiti navo, va na hongola Asiriya, Vagipiti ni Vaasiriya, vatshavbo va na khozela Pfhumu.

²⁴ Ga litshigu lolo, Israyeli a na khala nya wuraru gumogo ni Egipito ni Asiriya, gasi a khala gikategiso vbakari nya mafu;

²⁵ Kholu Pfhumu Nungungulu nya Tshivba Yatshavbo, a na va kategisa, a ganela, khuye: “Kategide Egipito, litigo langu, ni Asiriya, thumo nya mandza yangu, ni Israyeli, thomba yangu.”