Isaya 13 - Bhibhiliya Nya Guage

III. NUNGUNGULU A NGU LAMULA MAYIGO (13-23) Giprofeto khu mahungu ya Bhabhiloni

¹ Aya Mahungu nya gupfhungumudwe ga Bhabhiloni ma nga woniswago ga Isaya, mwamana wa Amosi:

² “Ghwimbani ngavbya vbatshani nya gigomo nyambana misimbo; khusani lito, va khweneteni khu mandza, gasi va ta bela khu myanya ya vathu nya guthavisege.

³ Nyi ningide nayo sihathwa sangu, ina, nyi ranide dzindrena dzangu, edzi dzi dwanelago wugulu wangu, gasi va thuma thumo nya likhulo langu.

⁴ Yingisani ligwaha li pwalago vbatshani nya sigomo, la gu fanana ni ligwaha nya gidzemo nya gingi, ligwaha nya mifumo nya mayigo ma tombanidego. Pfhumu Nungungulu nya Tshivba Yatshavbo, a nga gu simama gu rana masotshwa nya nyimbi.

⁵ Va guta khu mayigoni ya hwindzo nya mahegiso nya lidambo. Khu Pfhumu Nungungulu ni matshari nya likhulo laye, a tago guta sasela litigo latshavbo.

⁶ Wombani huwa khu guvbisega, kholu Litshigu la Pfhumu Nungungulu li vbohide; la guta khiyo ga uye nya Tshivba Yatshavbo gasi guta mbembisa.

⁷ Khu guralo, vathu vatshavbo va na vbela tshivba, vathu vatshavbo va na pilega hwambo.

⁸ Va na thurugiswa ngudzu; va modwa khu sigaradzo, va saniseka gu fanana ni nyamayi nya gulumwe, va na khedzisana khu gyawe na va gu samala, dzikhovbe dzawe dzi ngangamela kha nga nilo.

⁹ Wonani, li nguta Litshigu la Pfhumu Nungungulu, litshigu nya guthise ni likhulo li khondrago, gasi gu vbindrugedza litigo li khala marumbi, gumogo ni gu mbembisa sighohi si vbanyago umo.

¹⁰ Kholu dzinyeledzi ni dzithandra dzaye, kha dzi na wenengedza gambe; lidambo li na pfhupedziswa li nga gu duga, ni ngima kha wu na wenengedza gambe.

¹¹ Nyi na tsayisa litigo khu kotani nya guvivbe gwaye, ni va nya guvivba khu kotani nya gughohe gwawe, nyi fuvisa matshandza ya avo va dzi khusedzago, nyi thela dzitshoni avo va dzi gugumugisago ni va nya dzihanyi.

¹² Nyi na gira vathu va kala guvbindra ndralama nya guhutwe, va na hamugega guvbindra ndralama ya Ofiri.

¹³ Khu guralo, nyi na ndrendremedzisa damboni; mafu ma na khuga wulangani gwaye, khu kotani nya likhulo la Pfhumu Nungungulu nya Tshivba Yatshavbo, ni kotani nya litshigu nya likhulo laye nya guthise.

¹⁴ Moyo ni moyo a na thava kha nga yisya, a fanana ni tshambi wu gu mwalo muhavisi; muthu ni muthu, a na bwelela ga va na gyawe, vatshavbo va thavela tigoni gwawe.

¹⁵ Uye a na manwago a na songwa, vatshavbo va na modwa va paywa khu matshari.

¹⁶ Sanana sawe sa beleni si na pfareledwa mbeli gwawe, dzindranga dzawe dzi na phangwa, vagadzi vawe, va na pfinywa va sagaredwa.

¹⁷ Wona, nyi na va ranela Vamedhi, avo va si khathaligo khu parata, ambari gudogorela ndralama.

¹⁸ Malaho yawe va na songa khayo madzaha; gima kha va na pwa gisiro khu sanana si ngarigu ndrani; maho yawe kha ma na tsetsa sanana sa beleni.

¹⁹ Bhabhiloni, oyu a gu mburi ga mifumo yatshavbo, lidhoropa nya matshandza ya Vakalidhiya ni wuzundzo wawe, li na fanana ni Sodhoma ni Ghomora, ayo Nungungulu a nga ma mbembisago.

²⁰ Gima kha gu na khala gambe muthu umomo, vathu kha va na vbaha umo kala gupindruga; ambari Vaarabhi kha va na nga tsitsa gambe mitshatsha yawe umo, ni vahavisi kha va na gira gambe umo mazumbo nya mitshambi.

²¹ Aholu, sirengo sa giwulani si na lala umo, dzinyumbani gwawe gu na tala khu mapfhuguli; gu na lala umo masekwa, ni vamangulwe va na ndragandraga umo.

²² Dzinyumbani gwawe nya wufumu, gu na emba migehe, makhokholani gwawe, gu na emba vanyadugwi; gikhati gyawe gyomo vbafuvbi ni gu vboha, ni matshigu yawe ma rode.”