Isaya 12 - Bhibhiliya Nya Guage

Ndzimo nya gubonge Nungungulu

¹ Ga litshigu lolo, u na embelela, khuwe: “Nyi ngu gu bonga uwe Pfhumu Nungungulu, kholu, ambari nyi gu gorosidego, olu U duside likhulo lago avbo gwangu. Uwe u ngu nyi tangadzisa.”

² Wona nya gukhuwe, Nungungulu muvbanyisi wangu; nyi na mu tumba nyi si thavi gilo, kholu, Pfhumu Nungungulu khuye tshivba yangu ni ndzimo yangu; uye khade muvbanyisi wangu.

³ Enu, na mu tade khu gutsaka, mu na ya rega mati sifefeni nya guvbanyise.

⁴ Ga litshigu lolo, mu na embelela ndzimo yeyi, khenu: “Bongani Pfhumu Nungungulu, mu khozela lina laye, pwadzelani mayigo sigiro saye, ma tiviseni khenu, lina laye likhongolo.

⁵ Embelelani wuzundzo ga Pfhumu Nungungulu, kholu giride silo nya sikhongolo ngudzu, tivisani esi tigoni gwatshavbo.

⁶ Wombani mikulungwane mu tsaka, enu vavbanyi va Siyoni, kholu vbakari gwanu, khongolo khu Nyaguage wa Israyeli.”