Isaya 1 - Bhibhiliya Nya Guage

I. GITIVISO KHU MAHUNGU YA JUDHA NI JERUSALEMA Litigo nya sighoho

¹ Giwoniso gya Isaya, mwamana wa Amosi, a gi wonidego khu kotani ya Judha ni Jerusalema, matshiguni ya Uziya, Jotamo; Akazi; ni Ezekhiya; vafumeli va Judha.

² Yingisani, enu dzindzadzi, tula ndzeve, uwe litigo, kholu Pfhumu Nungungulu a ngu ganela, khuye: “Nyi velegide sanana nyi si dandrisa, aholu sa gu nyi wugela.

³ Mombe yi ngu muti mune waye, buru niyo, yi ngu giti gighowolo gya mune waye; aholu Israyeli, kha nyiti, vathu vangu kha va pimi gilo.”

⁴ Libango ga litigo leli nya gutale khu sighoho, vathu va rwadego sighoho, lifumbu nya mithumo nya guvivbe, sanana nya sidambane; va pfhurarede Pfhumu Nungungulu, va hembulula nya Guage wa Israyeli, va bwelelela hwane.

⁵ Khu ginani mu na gu simamago mu tsayiswa, khu guyeyisa gwanu? Mihungo yanu yatshavbo yi ngu dwala, ni myonyo yanu yi vbede tshivba.

⁶ Gukhugela migondroni kala hungoni gu mwalo ni wulanga wu vbanyago gwadi, givili gyatshavbo sithunya, dzimbanga ni silondra nyamba handzwa ambari gu hungeledwa, mwendro gu nyegiswa khu mafura.

⁷ Litigo lanu li khade marumbi, madhoropa yanu, ma rothidwe khu nilo; va nya mayigo va mi dzegede litigo lanu na mu gu va wona; litigo li khade marumbi gukhwatshi li di phangwa khu va nya mayigo.

⁸ Lidhoropa la Siyoni li tshade giwulani gu fanana ni tshatsha wa mahangeni, gu fanana ni gikhwathi thembweni nya madzwani, gu fanana ni lidhoropa li randredwego khu valala.

⁹ Naripwani Pfhumu Nungungulu nya Tshivba Yatshavbo kha nga hi tshiyela vambe nya gukari, va vbanya, hi di hadza gu fanana ni Sodhoma, hi fanana ni Ghomora.

Phaso wu vbwetwago khu Nungungulu

¹⁰ Enu vathangeli va Sodhoma, yingisani magana ya Pfhumu Nungungulu; tulani dzindzeve enu vathu va Ghomora, mupwe nayo wa Nungungulu wathu.

¹¹ Dza gu nyi phasa ginani dzimhamba dzanu nya dzingi? A ngu wudzisa Pfhumu Nungungulu. Nyi garade khu miphaso yanu nya guvbiswe nya dzinvuta ni mafura nya sifuyo nya gunone. Kha nyi tsakiswi khu novba nya sikuzyana, nya dzinvuta, ni vanyamabhongwe.

¹² Enu mwa guta mbeli gwangu, khu mani a mi ranidego guta bela likupakupani nya nyumba yangu?

¹³ Mu nga simami gu nyi reselani gambe miningelo yanu nyamba phasa gilo; kholu libani lanu, li ngu nyi nyenyeza, ni Mibuzo nya Gumege Ngima gambe, ni dzisabhadho, ni mitshangano nya yikhongolo; nyi garade khu guvivba gwanu, ambari khu mimbe mitshangano mu girago.

¹⁴ Mibuzo yanu Gumege nya Ngima ni mimbe mibuzo nya miphaso, yi ngu swihadza hefemulo wangu, yi ngu nyi lemela; nyi garade khu gusaniseka.

¹⁵ Avbo mu khusedzago mandza yanu mu lombelela, eni nya gu siha khovbe yangu; ambari mwa gu engedzela milombelo yanu, eni kha nyi na mi yingisa, kholu mandza yanu ma tade khu novba.

¹⁶ Hambani, mu dzi agisa, ndreyisani mahoni gwangu sigiro sanu nya guvivbe, si yiseni hwindzo ni eni; digani gu gira mithumo nya guvivbe.

¹⁷ Hevbulani gu gira ugo gu gu gwadi, vbwetani gu gira gululama, vbedzani dzitshanisa, kawukani vatshanisi; vhikelani fanelo nya khulungu ni fanelo nya dzinoni.

¹⁸ Deluni, hongoleni hi pimise gumogo khu mahungu yaya; A ngu ganela Pfhumu Nungungulu, khuye: Ambari sighoho sanu na si sivbade kha nga wugala, nyi na si agisa kha nga hunguva; ambari sa gu fanana ni giwunguwungu, nyi na si agisa kha nga mawoya nya nvuta.

¹⁹ Mwa gu bani mu dzi emisede gu nyi yingisa, mu na hodza nya sadi sa tigoni momu.

²⁰ Aholu, mwa gu bomba, mu simama gu ganedza, mu na mbembiswa khu matshari; a ngu ganela Pfhumu Nungungulu.

Gulamudwa ni gu dzegiswa gwa Jerusalema

²¹ Wonani lidhoropa leli nya gutumbege, li vbindrugedzidego li khala libhemba! Umo gu nga bani na gu tade khu gululama, olu, gu tade khu sighevenga!

²² Parata yago yi pfhurede khandri ya gilo, ni vbinyu yago, yi vbindrugedzide yi khala huto.

²³ Manganagana yago vaganedzi, gambe dzipari nya dzimbafa; vatshavbo va gu dzumela gu rengeledwa khu dzitsapawu, va gu khatalela gu hakha sihiwa. Kha va vhikeli sigulungu, gambe kha va vhikeli dzifanelo nya dzinoni.

²⁴ Khu guralo, a ngu ganela Pfhumu Nungungulu nya Tshivba Yatshavbo, nya Dzitshivbe wa Israyeli, khuye: Wonani! Nyi na guhula likhulo langu vbatshani ga vale va nyi vengago, nyi na phodza ga valala vangu.

²⁵ Nyi na gu wugela nyi gu veta khu mandza yangu, nyi na gu agisa u vbelela, nyi gu guha kha nga gikete nya gupfhurele, gi nyiviligago khu nilo. Ndzilo mu gu nayo, nyi na yi dusa yatshavbo.

²⁶ Nyi na gu wuyisela valamuli vago, nya gufanane ni vale va gale, ni vasingalagadzi vago kha nga guhegulani; khavbo u na ranwago nyaluphye, gupwani u lidhoropa nya gululame ni gutumbega.

²⁷ Siyoni a na dzegiswa khu wululami, ni avo va na dzi layago va wuya gwaye, khu gululama.

²⁸ Aholu, va nya guvivbedwa khu myonyo ni sighohi, va na pfhungumudwa gumogo vatshavbo; avo va pfhurarelago Pfhumu Nungungulu, va na mbembiswa.

²⁹ Mu na khala dzitshoni khu kotani nya miguhu yi nga bani yi mi tsakisa, mu thedwa dzitshoni khu marembwe mu ma hathidego.

³⁰ Mu na khala kha nga nguhu, mahagane yaye ma wunago, gu fanana ni likhabi nyambana mati.

³¹ Muthu nya tshivba a na fanana ni mavivi, ni thumo waye, wu na khala kha nga tshahe nya nilo; vatshavbo va na vbiswa gumogo va hamuga ni muthu nya gu va tshimele.