Hoseya 9 - Bhibhiliya Nya Guage

Gu ghoha ga Israyeli ni mihandro yakone

¹ U nga tsaki uwe Israyeli, u bhuma, u ndragandraga, u fanana ni mambe mayigo, kholu u hambanide ni Nungungulu wago, khu gu dzi ningedzela wubhayini; u rengiside lihaladzo lago khu gu gira wuphuphulu musithalani gwatshavbo nya tirigu.

² Aholu tirigu ya vbasithalatunu ni mafura ya miphongoloni gwanu, kha si na mi hodzisa, ni vbinyu nya yiphya kha mu na yi linga.

³ Kha va na simama gu khala tigoni ga Pfhumu Nungungulu, aholu Efrayimi a na bwelela tigoni ga Egipito, va naya hodza guhodza nya gunyenyeze tigoni ga Asiriya.

⁴ Kha va na nga ningela miningelo nya miphaso nya vhinya ga Pfhumu Nungungulu, ni miphaso yawe va mu girelago, kha yi na mu tsakisa. Miphaso yawe, yi na fanana ni guhodza ga vamalile, vatshavbo va na gu hodzago va na nyenyeza khugo. Kholu guhodza gwawe gu na lumba basi avo; kha gu na bela Nyumbani ga Pfhumu Nungungulu.

⁵ Ginani mu na girago matshiguni nya mikhuwo yi vegisidwego, ni matshigu nya buzo wa Pfhumu Nungungulu, na?

⁶ Kholu wonani nya gukhenu va ngu tutuma va thava gusasedwa, aholu va na tombaniswa khu Egipito, va dzingwa khu Menifisi. Thomba yawe nya parata va yi golago, yi na pfhurela yi hodzwa khu muhwa; mitshatshani gwawe, gu na buga mwasi ni miba.

Muprofeti a ngu landreledwa

⁷ Ma vbohide matshigu nya tsayiso, mayo ni moyo a na hakhago tshatshazelo yaye. Israyeli gu vbwetega a mati. Khu kotani nya sighoho nya singi, ni livengo lanu nya lingi, mwari khenu, muprofeti handrugide, gipumbu, a na ni liphuvbo nya guvbe. Khu kotani nya sighoho sago nya singi, uwe Israyeli ni gu engedzelana nya livengo lago.

⁸ Muprofeti gumogo ni Nungungulu wangu muemeledzi nya gughade Efrayimi, dzindzilani gwaye gwatshavbo dembedwe mazinga, ni gunyenywa Nyumbani ga Nungungulu waye.

⁹ Va phorode khu manyala nya sighoho nya sikhongolo, nga matshiguni ya Gibheya. Pfhumu Nungungulu, a na alakanya mithumo yawe nya guvivbe, a na va tsayisa khu kotani nya sighoho sawe.

¹⁰ Israyeli nyi di mu rola nga sitsatsa nya dziuvha mugiwulani, avbo nyi nga wonago vababe vanu, nyi di va wona nga mihandro nya guhegule nya makandzu. Aholu, avbo va nga vboha Bhahali-Peyori, va di dzi ningela va phasela githombe gile nya dzitshoni, va vbindrugedza va nyenyeza kha nga gilo va nga gi gola.

¹¹ Wudhumo wa Efrayimi wu na vbuvba nga ginyoni, kha gu na manega va nya guvelega sanana, ambari uye a na gu khurago mimba.

¹² Ambari va gu velega sanana, eni nyi na va dzegela, gasi va vbela havo bhi! Kholu, libango avbo gwawe, va gu hambana ni eni!

¹³ Efrayimi, nyi di gu mu wona na gu yadwe wulangani nya gutsakise, nga idzo nyi nga wona khidzo Tiro, aholu, Efrayimi a na ningela sanana saye ga musongi.

¹⁴ Uwe Pfhumu va ninge; u na va ninga ginani? Va ninge mahembe nya gifule ni mavele nyambana mahwe.

¹⁵ Wuvivbi wawe watshavbo, wu khugede Giligali, kholu, khiyo iyo nyi nga phela gu va venga, khu kotani nya mithumo yawe nya guvivbe, nyi va tutumiside tigoni gwangu. Nyi si va goli gambe, Vathangeli vawe vatshavbo sindraga milayo.

¹⁶ Efrayimi bayisidwe, mikhamba yaye yi bangide, kha na ninga gambe mihandro. Ambari a gu velega sanana, eni nyi na songa mihandro a yi golago ya rumbuni gwaye.

¹⁷ Nungungulu wangu a na va diga, kholu kha va mu yingisi. Va na khala valegalegi vbakari nya mayigo.