Hoseya 7 - Bhibhiliya Nya Guage

Wuwadi wa Pfhumu Nungungulu

¹ Nya gu vbweta gu vbanyisa Israyeli, wuvivbi wa Efrayimi, wa gu dzi wonegisa, wughevenga wa Samariya wa gu tugulega. Kholu va gu thuma wudambane, dzimbafa dzi bela dzinyumbani, tsawa nya vaphangi wuba khu mudzindzilani.

² Gambe kha va pimisi khu myonyoni gwawe, gukhavo eni nyi ngu alakanya mithumo yawe yatshavbo nya guvivbe; va fenengedzidwe khu sighoho sawe, gikhati gyatshavbo nya gu khedza avo.

³ Avo va gu tsakisa mufumeli khu mithumo yawe nya guvivbe, va tsakisa vathangeli khu malipha yawe.

⁴ Vatshavbo sibhayi, va gu fanana ni gidhingiselo nya nilo, egi muvawuli nya mikati, a si dzi garadzigo khu gu endzedza, gukhugela avbo a sugago wuguvbi, kala avbo wu gugumugago.

⁵ Litshigu nya buzo wa mufumeli wathu, vathangeli va di vbindrugedza va khala vadwali, khu gu leva khu vhinya, va nga selago gumogo ni sidambane.

⁶ Kholu va dongisede myonyo yawe ni litindzalo, na va gu lindrela, wutshigu watshavbo va lala khu giviti , aholu, me ni gugya, gya gu khondra kha nga malavbelavbe nya nilo.

⁷ Vatshavbo va gu vbisa nga gidhingiselo nya nilo, va dagaredzisa valamuli vawe; vafumeli vawe vatshavbo va gu thega, mwalo ni moyo wa vbakari gwawe a nyi lombelelago.

⁸ Efrayimi a gu dzi tshanganisa ni mambe mayigo; Efrayimi kati nya gugadzingwe nyamba vbindrugedzwa.

⁹ Tshivba yaye ya gu midzwa khu va nya mayigo, aholu uye kha dzipwi gilo. Hungoni gwaye gu tade khu dzinvi, aholu uye kha si woni.

¹⁰ Matshandza ya Israyeli, ma ngu mu girela wufakazi, ambari khu satshavbo soso, uye kha wuyi ga Pfhumu, Nungungulu waye, ambari gu mu vbweta.

¹¹ Kholu Efrayimi a gu fanana ni lituva nya lipemi, li kanganyiswago khu gumbana mapimo; a gu lomba Vagipite vaya mu phasa, a gu dzina a wuya ga Vaasiriya.

¹² Avbo va na hongolago, nyi na ladza khoga yangu nyi va goga, va na thega nga sinyoni sa damboni. Nyi va tsayisa gu khedza khiso va si pwidego tshanganoni gwawe.

¹³ Va na thegedwa khu libango, kholu va hambanide neni! Gumbembiswa gu nata vbakari gwawe, kholu va nga nyi wugelago! Nyi ngu gola gu va dzegisa, aholu avo va gu ganela malipha khu eni.

¹⁴ Kha va lila avbo gwangu khu monyo wawe watshavbo, aholu va di keta malawuni gwawe, va lomba tirigu ni vbinyu, aholu avo na va hambanide neni.

¹⁵ Eni nyi va hevbudzide ni gu va ninga tshivba, aholu va di nyi bweledzela khu guvivba.

¹⁶ Ambari olu va vbindrugedzago va wuya, kha va wuyi ga uye a Khusegidego Ngudzu; va gu fanana ni wulaho nya guwegele. Vathangeli vawe va na songwa khu matshari, kholu khu maganani gwawe gu di duga magana nya gu dzi khusedze. Khu guralo, va na khala gihegiso tigoni gwatshavbo gwa Egipito.