Hoseya 6 - Bhibhiliya Nya Guage

Guvbindrugedza nyamba tumbega

¹ Deluni, hi wuye ga Pfhumu Nungungulu, kholu uye a hi bayiside, gambe a na hi vbanyisa, a hi thede silondra aholu a hi hungelela.

² Khu hwane nya matshigu mavili basi, a na wuyisa nyaluphye guvbanya gwathu, khilo nya wuraru, a na hi wusa, hi vbanya mbeli gwaye.

³ Hongoleni hi muti Pfhumu Nungungulu, hi na dzi garadze khu gu vbweta gu muti. Uye a nata gu fanana ni Wuronga, a nata avbo gwathu kha nga ndzadzi nya gilimo, ndzadzi nya maronga yi naganisago mafu, kha na tandrega guta hi phasa.

⁴ Ginani nyi yelago gu gira khu uwe Efrayimi? Ginani nyi yelago gu gira khu uwe Judha? Kholu lihaladzo lanu la gu fanana ni mapfhi nya Wuronga, ni thondrwane nya dzimindru si vbiredzago gu mwalalega.

⁵ Khu guralo nyi mi bayiside, khu gu mi rumela vaprofeti; nyi mi songa khu magana ma dugidego khu kanani gwangu, ni wulamuli wangu wu na duga kha nga wenengedzo.

⁶ Kholu eni nya gu tsakiswa khu lihaladzo, guvbindra dzimhamba dzanu, ni guti Nungungulu, guvbindra miphaso yanu nya guvbiswe.

⁷ Avo va pide gidzumeledzwano kha nga Adhamu, va si tumbegi avbo gwangu.

⁸ Gileyadhi, lidhoropa nya vathu nya guvivbedwe khu monyo, li tadego khu novba.

⁹ Vaphasi nya mhamba va gu fanana ni sighevenga, si sihalelago vathu, si va songa ndzilani ga Sikemi; mithumo yawe khya gunyenyeza ni wughevenga.

¹⁰ Nya gu wona silo nya dzitshoni tigoni ga Israyeli; vathu va Efrayimi va di gira wubhayi uwo wu nga nyenyezisa litigo latshavbo la Israyeli.

¹¹ Uwe nuwe Judha, li nguta litshigu lago nya gutsayiswe, litshigu nyi na gu wuyisago vathu vangu khu wugumbitunu.