Hoseya 4 - Bhibhiliya Nya Guage

Nungungulu a ngu rwega nandru va na Israyeli

¹ Upwani lito la Pfhumu Nungungulu, enu va na Israyeli, kholu Pfhumu Nungungulu a na ni mahungu ni enu vavbanyi va tigoni momu, kholu gutumbega ni lisine, kha si nga gu wonega tigoni, ambari ni Nungungulu, kha nga gu tidwa gambe mafuni.

² Gu wonega basi guvalana, malipha, ni gusongana, wuvafa nya guvbindre pimo, wubhayi nya guvbindre pimo, ni wughevenga vbatshani nya wughevenga ni guvbaladza milovba.

³ Khu guralo, litigo li ngu lila, vatshavbo va vbanyago umo va ngu vbela tshivba; gumogo ni sirengo sa khabini, sinyoni sa damboni, ni dzindzandzi dza phwani sa gufa.

⁴ Aholu, gu nga manegi ni moyo nya guganedze, gu nga manege ni monyo nya gukawuke muthu kwawe, kholu Eni kheni nyi ganedzago ni gu kawuka milandru yago uwe muphasi nya mhamba.

⁵ Khu guralo, u na thega vbakari nya mihani, vbawutshigutunu u thega gumogo ni muprofeti, nyi na mbembisa mayi wago.

⁶ Vathu vangu va pfhungumudwe, khu gumbana mapimo. Kholu uwe u bombide guti, eni neni kha nyi gu vbweti, u khala muphasi nya mhamba mbeli gwangu, kholu u hambanide ni nayo wa Nungungulu wago, eni neni nyi na divala khu sanana sago.

⁷ Avbo vaphasi nya mhamba va nga andra, va di engedzela gu nyi ghohela, gasi eni, nyi na vbindrugedza wuzundzo wawe wu khala dzitshoni.

⁸ Avo va gu hodza khu sighoho sa vathu vangu, va gu gola ngudzu wuvivbi wawe.

⁹ Khu guralo, nyi na tsayisa vathu vangu, nyi gira kharato gambe ni vaphasi nya mhamba, khu kotani nya dzindzila dzawe, nyi na va ninga tshatshazelo nya mithumo yawe.

¹⁰ Va na hodza, aholu kha va na khura, va na dzi ningela muwubhayini, gambe kha va na velegelana va andra, kholu va digile gu khedza Pfhumu Nungungulu.

¹¹ Wubhayi, vhinya ya gale ni wadwa, si ngu songa mapimo.

¹² Vathu vangu, va guya wudzisa wusingalagadzi ga githombe gyawe nya simbo, lipitso lawe li va ninga phindrulo. Kholu liphuvbo nya wubhayi, li ngu va ndreyisa ndzilani, kha va ngo khathala gambe khu Nungungulu wawe.

¹³ Va olovede guphasela dzitshokhani nya sigomo, va vbisa mabani musigomwanani, vbavbatshi nya misimbo nya miguhu, mikandzu ni mikanyi kholu mitsa yakone kyadi. Khu guralo sanana sanu nya vanyamahegyane si ngu khala maphuphulu, ni vagadzamwane vanu va ngu bhaya.

¹⁴ Eni kha nyi na tsayisa vanyamahegyane vanu khu kotani nya wuphuphulu, ambari vagadzamwane vanu khu gu gira wubhayi, kholu vama navo va guya ga maphuphulu, vaya hengela gu gira miphaso ni vanyamayi nya maphuphulu. Kholu vathu nyambana mapimo, va na mbembiswa.

¹⁵ Uwe Israyeli, wa guvbweta gu gira wuphuphulu, u nga rwegi nandru va na Judha! Mu ngati Giligali, ambari gu gwelani muya Bheti-Avheni, na mu gu sambanya, khenu: Hi ngu sambanya khu Pfhumu Nungungulu a vbanyago.

¹⁶ Va na Israyeli va bangide mihungo nga gimombyana nya gigaha, a na dzi kodza kharini Pfhumu Nungungulu gu va havisa nga nvuta malangani nya mahavo nya mangi, na?

¹⁷ Efrayimi fumedwe khu vanungungulu nya sifananiso, mu digeni kharato!

¹⁸ Va gu vbedza gu sela wadwa, va gu dzi ningedzela mu wubhayini; vathangeli vawe va di gola ngudzu dzindzila dzi thelago dzitshoni.

¹⁹ Va ghubhudwe mambapini gwawe khu phuvbo nya gipupwane va yiswa hwindzo, va na khala dzitshoni khu kotani nya miphaso yawe.