Hoseya 13 - Bhibhiliya Nya Guage

Israyeli a ngu divaledwa khu Pfhumu Nungungulu

¹ Avbo Efrayimi a nga bani na gu ganela, vathu va di ndrendremela, a di khusedzidwe tigoni ga Israyeli. Aholu a dzi rwegide nandru khu gu khozela Bhahali, uye fude.

² Olu, va gu engedzela gu andrisa sighoho; khu parata yawe, va gu gira sifananiso nya gupfhudwe, sifananiso nya guwumbwe khu mapimo nya wugengeli, a gu thumo nya mandza ya vameseri, va bwelo khavbo va ganela, khavo: Va gireleni miphaso. Vathu va ninga dzibesu sifananiso nya simombyana.

³ Khu guralo, va na khala nga mapfhi nya wuronga ni hunguva nya mambagugya yi vbiredzelago guvbindra, ni mungu wu vbuvbiswago khu gingulu, ni wutshi wu tuvigago khu nyumbani.

⁴ Ambari ulo, eni kheni Pfhumu Nungungulu wago, gukhugela tigoni ga Egipito. Khu guralo, khu na ngati mumbe nungungulu, vbavbandze gwangu, kholu mwalo mumbe mutshudzisi, vbavbandze gwangu.

⁵ Eni nyi mi sayisideni mu giwulani, tigoni mule nya lihani nya guvbise ni gihala.

⁶ Avbo nyi nga bani nyi gu va hodzisa va khura, avo va di tsaka, avbo va nga bani va tsaka, myonyoni gwawe, gu di tala khu matshandza; khu guralo, va di divaledwa khu eni.

⁷ Khu guralo nyi na va tela kha nga nghala; nyi va ranga khu ndzilani, gu fanana ni likhamba.

⁸ Gufanana ni gikankanka gi nga bedwago sanana saye, nyi na va mana nyi va vbadzulela. Nyi na fanana ni nghala nyi va vbadzulela avbo vbale kamwe, va na pferuledwa khu sirengo nya likhabi.

⁹ Uwe Israyeli, u mbembisidwe, kholu u nga nyi wugelago, u bwelo khavbo u wugela muphasedzeli wago.

¹⁰ Olu womo hayi mufumeli wago, gasi a gu vhikela madhoropani gwago gwatshavbo? Ni valamuli vago u nga va lombago, khuwe: Nyi ninge mufumeli ni vathangeli?

¹¹ Nyi gu ningide mufumeli khu likhulo, nyi bwelo khavbo nyi gu wandrela khu giviti.

¹² Wuvivbi wa Efrayimi wu hungidwe, ni gighoho gyaye gi vegedzidwe.

¹³ A na vbohedwa khu wuvi nya nga wa nyamayi a lumwago, kholu uye gyanana nyamba yingisa, gya gu vboha gikhati, kha dugi khu rumbuni a nga sihalago umo.

¹⁴ Eni nyi na va dzegisa tshivbani nya liphala nya guete, nyi va tshudzisa lufuni. Gasi olu uwe lufu, yomo hayi mitungu yago? Uwe liphala nya vafi, gomo hayi gumbembisa gwago? Maho yangu gimwalo ni gimwegyo ma gi wonago nya gu dzi laye khigyo.

¹⁵ Ambari a gu ninga mihandro vbakari ga vandriyaye, gu nata phuvbo ya Khugadambo, khu ga Pfhumu Nungungulu, yi furugedza gukhugela giwulani, yi bangisa sifefe sawe, gu banga ni nambo wawe. Thomba yawe yatshavbo yi na phangwa khu malangani yi khalago umo.

¹⁶ Vathu va Samariya va na rwala nandru wawe, kholu va wugedego Nungungulu wawe. Avo va na songwa khu matshari, sanana sawe si na pfareledwa, ni vagadzi vawe va gu ni dzimimba va na pferuledwa sirumbu khu vbakari.