Hoseya 11 - Bhibhiliya Nya Guage

Lihaladzo la Nungungulu khu kotani ya Israyeli.

¹ Avbo Israyeli a nga bani na ngari gyanana, eni nyi di mu gola; khu tigoni ga Egipito, nyi di rana gyanana gyangu.

² Aholu, avbo eni nyi nga bani nyi gu va rana, avo va di simama gu bomba va nyi pfhurarela. Va girela miphaso vanungungulu nya Vabhahali ni gu vbisela libani sifananiso nya guvatwe.

³ Eni kheni nyi nga hevbudzago va na Efrayimi gu gimbila; nyi va phara khu libogo, aholu kha va dziti nya gukhawo kheni nyi nga bani nyi va vbanyisa.

⁴ Nyi va gimbidziside khu dzingodzi nya wuhindzi ni monyo nya lihaladzo, nyi khade avbo gwawe kha nga uye a va dusago kanga dzithamoni gwawe, nyi dzi nogisa gasi nyi va ninga guhodza.

⁵ Kha va na bwelela gambe tigoni ga Egipito, aholu va na fumedwa khu Asiriya, kholu va nga bomba gu vbindrugedza mavbanyelo.

⁶ Madhoropa yawe ma na sasedwa khu matshari, va fanyeledzela migonyo nya malimba yawe nya dzisimbi, va sasedwa khu kota nya makungo va ma giridego vabune.

⁷ Kholu vathu vangu va thendregedzide va nyi pfhurarela; ambari va gu ranwa khuye a Khusegidego Ngudzu, mwalo ni moyo a dzumelago gu mu ninga githawo.

⁸ Nyi na dzi kodza kharini gu gu diga, uwe Efrayimi? Nyi na dzi kodza kharini gu gu ningela mandzani ga vambe, uwe Israyeli? Nyi na dzi kodza kharini gu mu gira kha idzo nyi nga girago khidzo lidhoropa la Adima? Gu mi girani nga idzo nyi giredego va Zebhoyimi? Khu ndrani nya monyo wangu gwa gu vila, nyi tala khu wuhindzi nyi gu pwela gisiro.

⁹ Kha nyi na dusa guthisa nya likhulo langu, kha nyi na engedza gambe gu sasela Efrayimi, kholu eni nyi Nungungulu, kha nyiri muthu, nyi Agide vbakari gwago; kha nyi dzi digi nyi fumedwa khu likhulo.

¹⁰ Va na landrela Pfhumu Nungungulu; Uye a nga bhonga nga nghala. Avbo a na gu bhongago, sanana saye si nata khu Pfoladambo na si gu ndrendremela.

¹¹ Va na wuya khu Egipito na va gu vbuvba nga sinyoni, khu tigoni ga Asiriya, na va gu vbuvba nga matuva. Nyi ta va khadzisa nyaluphye dzindrangani gwawe; a ngu ganela Pfhumu Nungungulu.

Gighoho gya Israyeli

¹² Efrayimi a nyi randrede khu malipha, va na Israyeli va nyi randrela khu wudambane; aholu Judha a gu wugela Nungungulu, a wugela Gihathwa gi tumbegidego a gu tumbega basi ga vanungungulu nya malipha.