Habhakuka 3 - Bhibhiliya Nya Guage

III. NOMBELO WA HABHAKUKA Nombelo wa Habhakuka

¹ Nombelo wa muprofeti Habhakuka khu magirelo nya guembelele.

² Uwe Pfhumu Nungungulu, nyi pwide na gu ganedwa khu ndruma yago; nya gu wona sigiro sago Pfhumu Nungungulu, nya gu ndrendremela. Wusedza nyaluphye mithumo yago matshigwanaya; ma tidwa ga gikhati gegi gyathu; likhulo lago, li alakanye khu wuhindzi.

³ Nungungulu dzude khu Temani, uye a Agidego a guta khu gigomoni ga Parani. Wudhumo waye wu fenengedzide ndzadzini ni wuzundzo waye wu tadzide mafuni.

⁴ Gungangamela gwaye gwa gu fanana ni wenengedzo nya lidambo; ni mandzani gwaye gu duga dzitsahe nya gukhedzige, avbo gu nga bani gu sihala tshivba yaye.

⁵ Mbeli gwaye gu di thanga mitungu; gasi hwane gwaye gu landrela madwali nya guthise.

⁶ Uye a gu ema, mafu ma gu tsekatseka; a gu khedza, a gu ndrendremidzisa mayigo. Sigomo sa gale si di khungumudwa; sigomwana sa gale si di khungumugela. Dzindzila dzaye khya gupindruga.

⁷ Nyi wonide wuvi nya mitshatsha ya Khusani; makhuvi nya matendra ya Midhiyani ma di ndrendremela.

⁸ Ina kamwe uwe Pfhumu Nungungulu wa gu dwana ni mitsongo, gani? Mwendro likhulo lago u di wugela sitsongwana, upwa giviti khu linene, olu u khilelago dzikavalu dzago, u gimbila khu dzikareta dzago nya gupale.

⁹ U dongisede wulaho wago; u lombide sighalala nya singi, u pandride mafu khu mitsongo.

¹⁰ Sigomo si di gu wona, si ndrendremela, mati ma di goga ma relela khu gigaha gu pwala lito laye guetani; a khusedza mavimbi yaye.

¹¹ Lidambo ni ngima si di ema malangani gwaye, si dzimeledwa khu gukhedziga nya sighalala, ni guvbyuga nya matshari yago nya gukhedzige.

¹² Avbo u nga goroga, u di gimbila tigoni gwatshavbo, khu giviti nya likhulo lago, u gandredzela mayigo.

¹³ U dugide gasi gu ya vbanyisa vathu vago, guya vbanyisa uye u nga mu todza khu mafura, u pfhungumula nyumba ya muthu nya guvivbedwe khu monyo, u khungumula nyumba kala ni giseketelo gyaye.

¹⁴ Khu sighalala sago, u payide ndruna nya dzindrena dzaye, avo vatago kha nga gipupwane guta nyi phalalegisa; na va gu bhuma gukhwatshi va gu songa gisiwana umo gi sihadego.

¹⁵ Uwe gumogo ni dzikavalu dzago, u di gimbila khu vbatshani nya yiphwa, vbatshani nya mavimbi nya makhongolo.

¹⁶ Avbo nyi nga mupwago, monyo wangu wu di ndrendremela, khu lito laye, sigundru sangu si di ndrendremela, maramboni gwangu gu bela guhina, eni na nyi gu ndrendremela; a na nyi hefemudze litshigu nya wuvi na nyi tangade, avbo a na gutago ata wugela vathu a va tsayisa.

¹⁷ Ambari mikandzu ya gumba thela nyenvu, gu si manegi dziuvha umo nya miuvha, gu si manegi mihandro nya olivha, mahange ma si dusi mihandro, gu si manegi dzinvuta pandroni, dzimombe dzi si manegi phandroni,

¹⁸ ambari khu guralo, eni nyi na khusedza Pfhumu Nungungulu, nyi nengela ga Nungungulu nya guvbanyise gwangu.

¹⁹ Pfhumu Nungungulu, khuye tshivba yangu ni guvbanyiswa gwangu, a na vbindrugedza migondro yangu yi fanana ni ya dziyisya, a na nyi gimbidzisa sigomoni gwangu. (Ga muthuledzeli umo nya sitendre sangu nya wutsendze.)