Habhakuka 2 - Bhibhiliya Nya Guage

Phindrulo ya Nungungulu

¹ Nyi na khala wulangani gwangu nya guwonelele, nyi na lita vbatshani nya likhokhola, gasi nyi khedzisela khu mani a ganelago, ni gukheni phindrulo muni nyi na mu ningago ga giwudziso gyangu.

² Khavbo avbo, Pfhumu Nungungulu a di nyi phindrula, khuye: Lova giwoniso gegi vbasiwindritunu khu malovelo nya guwonege gwadi, gasi gi kodza gu hevbudwa khu vatshavbo ambari ni wule a vbindrago khu gututuma a kodze nuye gu gi hevbula.

³ Kholu giwoniso gi na vbedza gikhati nya gukari, gya gu ganela khu matshigu nya guhegise, gima kha gi na lipha; ambari gya gu hwela, gi lindrele, kholu gi nata, kha gi na hwela.

⁴ Lova, khuwe: “Muthu nya guvivbedwe khu monyo kha na vbanya; aholu uye nya gululame a khodwago ga Nungungulu a na vbanya.”

II. MHANGO GA VATSHANISI

⁵ Muthu a dzi ningedzelago ngudzu guselani nya wadwa, gipumbu, ni muthu nya matshandza mwalo gurula; a gu khala na hamide likana kha nga lithowo. A gu fanana ni lufu; a gu si vbweta si manega kha khuri, a gu tombanisa vathu nya mayigo yatshavbo, a gu khozisa vathu nya mafumbu yatshavbo va khala vaye.

⁶ Vatshavbo vava va modwego, mindru ga litshigu kha va na nga diga gu mu yuyutela ni gu mu hega, va ganela, khavo: Libango ga wule a wungedzelago dzithomba nya gubidwe ni gu khala gitetema khu gu livbisa vakwawe! Kala lini na wu gu simama gu gira kharati?

⁷ Ina kha va na mu wugela khu githugedza, vale va gu ni mangava naye vata mu livbisa, gani? Ina kha va na nga wuya vale va nata mu thelago hwanga, gani?

⁸ Kholu uwe u phangide dzithomba nya mayigo nya mangi, vathu vatshavbo va tshadego va na gu phanga nuwe. Kholu, uwe u vbaladzide novba nya wungi ngudzu, u girela dzihanyi mayigo, ni madhoropa gumogo ni vavbanyi vakone.

⁹ Libango ga wule a wungedzelago nyumbani gwaye dzithomba nya gube, gasi gu vega gihaga gyaye vbatshani, gasi a kodza gu dzi vbanyisa ga gyandza nya guvivbe!

¹⁰ Makungo yoyo ma gu resede dzitshoni ndrangani gwago, khu gu mbembisa mafumbu nya mangi, u dzi thede libango nya gumbembise womi wago.

¹¹ Kholu ambari ni siwindri sa ndzarini si na womba huwa khu uwe, ni simbi dzi na ganela nanu khumo nya khokhweni.

¹² Libango ga wule a vbahago lidhoropa khu novba a li tiyisa khu wughevenga!

¹³ Ina kha guti khu ga Pfhumu Nungungulu nya Tshivba Yatshavbo, gukhuye vathu va gu thumela esi si na guvbyago khu nilo, va dzi garadza khu iso si si phasigo gilo, gani?

¹⁴ Kholu litigo li na tala khu wugengeli nya guti wudhumo wa Pfhumu Nungungulu kha nga mati ma tadzago linene.

¹⁵ Libango ga wule a ningelago ga muakelane waye wadwa nya gu handrugise mapimo a leva, gasi gu wona wumbwiri waye.

¹⁶ Wulangani nya guzundzege, u na thega dzitshoni! Ina nga sela nuwe u kodze gudhedhereka. Gikombe gi guromo mandzani ga nyamudye ga Pfhumu Nungungulu a ngu gu gurumedza gu gi sela, gasi lisima lago li manega nari dzitshoni.

¹⁷ Kholu dzihanyi u giredego Libhanoni dzi na gu thegela. U na thedwa hwanga khu sirengo u si songetedego. Kholu u vbaladzide novba nya wungi, u sasede mayigo, madhoropa ni vavbanyi vaye.

¹⁸ Sa gu thuma ginani sithombe nya vanungungulu si nga girwago khu muvati? Ahati githombe nya dzisimbi a gu muhevbudzi nya malipha? Kholu wule a si vatago a gu vega gitumbo ga gifananiso nya nungungulu a gi giridego nyamba ganela uye khu mandza yaye?

¹⁹ Libango ga wule a lombago ga mapulango, khuye: “ Khendzuga!” Mwendro ga giwindri gi si ganeligo, khuye: “Khuga!” Ina gifananiso gi ngu dzi kodza gu ninga sileletelo, gani? Wona nya gukhuwe gi londridwe khu ndralama ni parata, aholu gi mwalo hefemulo.

²⁰ Khu guralo, Pfhumu Nungungulu, womo nyumbani gwaye nya gukatege; mbeli gwaye litigo latshavbo li na degule.