Gutuledwa 7 - Bhibhiliya Nya Guage

Makhulukhulu nya vathu va Nungungulu

¹ Khavbo avbo, nyi di wona dzingilozi dzina dza Nungungulu na dzi emide mudzikhonani dza dzina nya mafu, na dzi pharide maphuvbo ya mana nya litigo, gasi phuvbo yi si furugedzi tigoni, ni matini ya phwani ambari misimboni.

² Nyi di wona gambe yimbe ngilozi ya Nungungulu yi nga bani yi guta khu Khugadambo, na yi pharide gifungo gya Nungungulu nya guvbanye. Yi di ganela khu tshivba ni tshivba, yi embela dzingilozi dza dzina, edzi Nungungulu a nga dzi ningago tshivba nya gusasele mafu ni yiphwa, khiyo:

³ “Mu nga saselini litigo, ambari yiphwa, ni misimbo, na hi si gu lovi gifungo musiwomboni nya sithumi sa Nungungulu wathu.”

⁴ Khavbo avbo, nyi di pwa tengo nya vale va nga bani va lovidwe gifungo, a gu lizana ni magumana na mana magumi mazana (144.000) nya vathu va lumbago mahundzu yatshavbo nya sanana sa Israyeli:

⁵ Nya lihundzu la Judha va diri likhumi na mavili magumi mazana (12.000) avo va nga bani va lovidwe gifungo; nya lihundzu la Rubheni, va diri likhumi na mavili magumi mazana (12.000); nya lihundzu la Gadhi, va diri likhumi na mavili magumi mazana (12.000);

⁶ nya lihundzu la Aseri, va diri likhumi na mavili magumi mazana (12.000); nya lihundzu la Nafitali, va diri likhumi na mavili magumi mazana (12.000); nya lihundzu la Manasi, va diri lizana ni magumavili mazana (12.000);

⁷ nya lihundzu la Simiyoni, va diri likhumi na mavili magumi mazana (12. 000); nya lihundzu la Levhi, va diri likhumi na mavili magumi mazana (12.000); nya lihundzu la Isakari va diri likhumi na mavili magumi mazana (12.000);

⁸ nya lihundzu la Zebhuloni, va diri likhumi na mavili magumi mazana (12.000); nya lihundzu la Josefe va diri likhumi na mavili magumi mazana (12.000); nya lihundzu la Bhejami, va diri likhumi na mavili magumi mazana (12.000).

Sihathwa si na dhumiswa ndzadzini

⁹ Hwane nya isoso nyi di wona mwandra nya wungi ngudzu nya vathu nya mayigo, mahundzu, mafumbu, malimi yatshavbo, a gu mwalo muthu a dzi kodzago gu wu saya. Va di emide mbeli nya gikhalo nya wufumu ni mbeli nya Nvutana, na va ambade dzingandzu nya guage, va phara migindru mandzani.

¹⁰ Va di gu huwelela khu tshivba, khavo: “Guvbanyisa ga gu lumba Nungungulu wathu, a khadego vbagikhalotunu nya wufumu, gambe gwa gu lumba Nvutana.”

¹¹ Dzingilozi dzatshavbo dzi nga bani dzi randrede gikhalo nya wufumu, madhota ni sirengo sa sina, va di khidzima mbeli nya gikhalo nya wufumu va gu khozela Nungungulu, khavo:

¹² “Amen! Rungudzo ni gidhumo ni guti ni gubonga ni wuzundzo ni wufumu ni tshivba sa gu lumba Nungungulu wathu kala gupindruga. Amen!”

¹³ Moyo nya madhota a di khusedza lito a nyi wudzisa, khuye: “Ava va nga ambala dzingandzu nya guage khu vamani, na va guta khu hayi?”

¹⁴ Nyi di mu hakha, kheni: “Pfhumu yangu, uwe khuwe u dzitigo!” Khavbo avbo, a di nyi tshamusela, khuye: “Ava khu vale va tago khu musigaradzoni nya sikhongolo, vale va nga handzago dzingandzu dzawe va dzi agisela novbani nya Nvutana.

¹⁵ Khiso si va girago va manega mbeli nya gikhalo nya wufumu wa Nungungulu, va mu thumela wutshigu ni mihani nyumbani gwaye. Wule a khadego vbagikhalotunu nya wufumu a na va vhikela khu mwedzi waye.

¹⁶ Gima kha va na pwa gambe ndzala ni lidora, lihani ni lithonga gima kha si na va sanisa gambe.

¹⁷ Kholu Nvutana yi guromo vbagikhalotunu nya wufumu khiyo yi va havisago, yi va yisa namboni nya mati nya womi. Nungungulu a na va bavbula marongo yawe yatshavbo.”