Gutuledwa 15 - Bhibhiliya Nya Guage

Ndzimo ya Mosi ni Nvutana

¹ Nyi di wona gambe gimbe giliwugiso nya gusamadzise ngudzu ndzadzini: Livbandre na dzimbili dzingilozi dza Nungungulu, na dzi pharide livbandre na sivili sitsayiso. Esi khu sitsayiso nya mahegiso, kholu khu iso li na tadzisega likhulo la Nungungulu.

² Nyi di wona gambe nga yiphwa nya gupatwe ni nilo. Dzindrena dzi nga palago girengo ni gifananiso gyaye, ni tengo nya lina laye, dzi di emide phwani, na dzi pharide mihwambi dzi nga ningwago khu Nungungulu.

³ Dzi di embelela ndzimo ya Mosi, githumi gya Nungungulu ni ndzimo ya Nvutana, khidzo: “Pfhumu Nungungulu, nya Tshivba Yatshavbo, sigiro sago sikhongolo, si ngu liwugisa! Dzindzila dzago dzi lulamide, dzi na ni lisine, uwe Pfhumu nya mayigo.

⁴ Khu mani a na dzi kodzago gumba gu ninga githawo? Khu mani a na dzi kodzago gumba dhumisa lina lago? Kholu, khuwe basi u Agidego! Mayigo yatshavbo ma nata khidzima mbeli gwago, kholu gulamula gwago nya gululame, gu wonegide mahoni ga vathu vatshavbo.”

⁵ Khu hwane nya isoso nyi di wona gambe Nyumba nya Tshatsha nya wufakazi wa Nungungulu na yi tulegide ndzadzini.

⁶ Dzingilozi dzile nya livbandre na dzimbili dzi di duga khu Nyumbani nya guage, na dzi pharide sitsayiso sile nya livbandre na sivili, na dzi ambade dzingandzu nya guage ngudzu, ni mabhandri nya ndralama vbakhanatunu.

⁷ Givangwa gimwegyo nya sile nya sina si vbanyago, gi di ningela ga livbandre na dzimbili dzingilozi, livbandre na sivili sikombe nya ndralama nya gutale khu likhulo la Nungungulu a vbanyago kala gupindruga.

⁸ Nyumba ya Nungungulu yi di tala khu wutshi nya tshivba ni gidhumo gya Nungungulu. Mwalo muthu a nga dzi kodza gu bela Nyumbani ga Nungungulu, gu si gu vbedzisegi satshavbo sitsayiso sile nya livbandre na sivili, si nga bani si pharidwe khu livbandre na dzimbili dzingilozi.