Gutuledwa 12 - Bhibhiliya Nya Guage

Nyamayi ni mwamilambo

¹ Gi di tumbuluga giwoniso nya gikhongolo ndzadzini: Nyamayi nya gukari na ambade lidambo, na gandride ngima vbavbatshi nya migondro yaye. Hungoni gwaye a diri ni gihugu nya gulugwe khu likhumi na dzimbili dzinyeledzi.

² Nyamayi yoyu a di sigide, a di gu dilela khu gu lumwa, nari vbafuvbi nya guhefemule.

³ Khavbo avbo, gi di tumbuluga gimbe giwonegiso ndzadzini: Mwamilambo nya khongolo ngudzu, nya gungangamele nga nilo,

⁴ Ngila waye wu di vbiyela gipandre nya wuraru nya dzinyeledzi dza ndzadzini, wu gu dzi rinya mafuni. Mwamilambo a dita ema mbeli ga nyamayi a nga bani a gu saniseka khu gulumwa, gasi gu mu hodzela gyanana, avbo a hefemulago.

⁵ Nyamayi a di hefemula gyanana nya gikhwathana igyo gi na gu fumago mayigo yatshavbo khu ndronga nya gikete. Aholu, gyanana gyaye gi di khusedzwa gi yiswa vbafuvbi ga Nungungulu vbagikhalotunu gwaye nya wufumu.

⁶ Nyamayi a di thavela giwulani, avba Nungungulu a nga bani a mu vegisede wulanga nya gusihalege, gasi a mane gu sayiswa ni gu hodziswa gipimo nya likhumi na mavili mazana ni livbandre na limwedo magumi (1.260) matshigu.

⁷ Khavbo li nga wuga litunga ndzadzini Migeli ni dzingilozi dzaye a di dwana ni mwamilambo, a nuye mwamilambo a di tsarama a dwana gumogo ni dzingilozi dzaye.

⁸ Ambari ulo mwamilambo ni dzingilozi dzaye kha va dugelela. Va di padwa, va gu tutumiswa, wu futwa wulanga wawe ndzadzini.

⁹ Khidzo a nga tshipiswa khidzo mwamilambo nya khongolo, mamba nya guhegule, yi ranwago pwani khiyo dhemoni, ni Sathane, mupembi nya litigo latshavbo. Rinyidwe mafuni gumogo ni dzingilozi dzaye.

¹⁰ Khu hwane nya iso nyi dipwa lito nya gute khu ndzadzini li huwelela khu tshivba ni tshivba, khilo: “Gi vbohile gikhati nya guvbanyiswe, nya tshivba ni Wufumu wa Nungungulu wathu ni Mufumo wa Kristo waye. Kholu va mu pade muthuledzi wa vandriyathu, uye a nga bani a gu va poyila wutshigu ni mihani mbeli ga Nungungulu wathu.

¹¹ Vandriyathu va mu pade khu tshivba nya novba wa Nvutana ni wufakazi wawe nya gutimisele; kholu kha va felela guvbanya gwawe, kala va gu dzumela gufa.

¹² Khu guralo, nengelani mu tsaka, uwe ndzadzini, ni enu mwatshavbo mu vbanyago umo. Aholu libango lomo eno gwanu enu mu vbanyago mafuni ni linene, kholu Sathane tshigide vbakari gwanu na tade khu likhulo nya likhongolo ngudzu, kholu a dzitigo nya gukhuye gikhati gyaye gidugwana ngudzu.”

Litunga tigoni

¹³ Gikhati mwamilambo a nga dzipwa na dzudzugidwe vbavbatshi mafuni, a di pheledza gu tutumisa nyamayi wule a nga velega gyanana nya gikhwathana.

¹⁴ Aholu, nyamayi a di ningwa mambapi mavili nya lighama nya likhongolo, gasi a kodze gu vbuvba a thavela giwulani avbo a nga bani a dongisedwe gu ya sayiswa avbo gipimo nya myaga miraru ni gipandre nari hwindzo ni hwindzo ni mamba.

¹⁵ Nyoga yi di landra nyamayi khu hwane, yi gamba khu kanani gwaye talo nya mati kha nga tsongo, gasi gu langaladza nyamayi, ma mu ndrindra khu mwedzi.

¹⁶ Ambari ulo, litigo li di emela nyamayi. Li di hama likana laye li gu midza tsongo wu nga gambwa khu mwamilambo.

¹⁷ Mwamilambo na tandregide, a di tala khu likhulo aya wugela avo va nga bani va tshade nya livelego la nyamayi, a gu vathu vatshavbo vale va vegisago milayo ya Nungungulu, va landrisago wufakazi wa Jesu Kristo.

¹⁸ Mwamilambo a di ya tsarama khu funguni wa phwani.