Gutuledwa 11 - Bhibhiliya Nya Guage

Dzifakazi dzimbili

¹ Nyi di ningwa tshava nya gufanane ni ndronga, yi vboha ngilozi yi ta nyi embela, khiyo: “Khuga u pime Nyumba ya Nungungulu gumogo ni giluvelo, u wuya u saya vathu va khozelago umo.

² Aholu, u nga pimi likupakupa li randredego Nyumba ya Nungungulu khu vbavbandze, kholu li ningedwe va nya mayigo va na gandredzelago Lidhoropa nya Gukatege ndrani nya magumana na mivili migima yitago.

³ Nyi na rumela dzifakazi dzangu dza dzimbili na dzi ambade gilendra gasi gu profeta mahungu ya Nungungulu, gipimo nya likhumi mazana ni mazana mavili ni livbandre na limwedo magumi (1.260) matshigu.”

⁴ Dzifakazi dzedzi nya dzimbili khu misimbo mivili nya miolivha, gumogo ni dzikandriya dzimbili dzi guromo mbeli ga Pfhumu nya litigo.

⁵ Uye a na gu vbwetago gu dzi ghohetela, a na khale na gu dziti gukhuye gu na duga nilo khu kanani gwawe, wu na gu vbedzago valala vawe. Vale va na lingago gu dzi ghohetela va na fisa guralo.

⁶ Dzifakazi dzedzi dzi na ni tshivba nya gusege ndzadzi yi siwi ndrani nya matshigu yatshavbo nya wuprofeti wawe, ni tshivba gambe nya gu vbindrugedze mati ma gu khala novba, ni gu tsayisa litigo khu mafumbu yatshavbo nya mitungu.

⁷ Gikhati dzi na vbedzago gu fakaza; gi na duga khu phalani girengo gi dwana nadzo. Girengo gi na pala gi gu songa dzifakazi.

⁸ Sirumbi sawe si na khala tshandzala mudzindzilani nya lidhoropa likhongolo, li ranwago khu gipimaniso pwani Sodhoma ni Egipito, umo gambe Pfhumu yawe yi nga khokhothedwago umo.

⁹ Sirumbi sawe si na wonwa khu vathu nya mayigo, ni mafumbu, ni malimi ni mifumo yatshavbo, ndrani nya matshigu mararu ni gipandre, gambe kha va na dzumedziswa gu si dzinga.

¹⁰ Vathu va tigoni va na nengedziswa khu gufa nya dzifakazi dzedzi dza dzimbili. Va na ghiya bwelo khavbo va rumelana siningwa nya malosedzela, kholu vaprofeti vava va vavili va di gu va pwisisa wuvi.

¹¹ Aholu, khu hwane nya matshigu ya mararu ni gipandre, li dita khu ga Nungungulu Liphuvbo nya guvbanyise lita bela sirumbini mule. Sirumbi si di khuga si gu ema, vatshavbo avo va nga si wonago, va di bedwa khu hwanga ni rerema nya yikhongolo ngudzu.

¹² Khavbo avbo, va dipwa lito na li gu ganela khu tshivba ni tshivba li guta khu ndzadzini, li va embela, khilo: “Litani muta eno!” Va di lita vaya ndzadzini, vari vbakari nya mapfhi, na va gu wonwa khu valala vawe.

¹³ Gikhati gyogyo, gu di dugelela girevareva nya gikhongolo. Gipandre nya likhumi nya lidhoropa gi di pfhungumudwa. Livbandre na mavili magumi mazana (7.000) nya vathu va fude khu girevareva gyogyo. Ava va nga vbulugago va di tala khu rerema va gu dhumisa Nungungulu wa ndzadzini.

¹⁴ Khidzo gi nga vbindrisa idzo gitsayiso nya wuvili. Aholu igyo nya wuraru gyomo vbafuvbi ni gu vboha.

Pundru nya livbandre na wuvili

¹⁵ Ngilozi nya livbandre na dzimbili yi di womba pundru. Khavbo avbo, gu di pwala ndzadzini na va gu kulungela khu tshivba, khavo: “Olu, Mufumo nya litigo wa gu lumba Pfhumu yathu, ni Kristo a na fumago kala gupindruga nya gupindruge.”

¹⁶ Madhota yatshavbo nya magumavili na mana ma khadego vbasikhalotunu gwawe nya wufumu mbeli ga Nungungulu, ma di noga kala vbavbatshi, ma gu khozela Nungungulu,

¹⁷ na ma gukhayo: “Ethu hi ngu gu bonga Pfhumu, Nungungulu nya Tshivba Yatshavbo, Uwe u guromo, Uwe u nga bani uromo, Uwe u vbwetago guta. Kholu u hakhide tshivba yago nya yikhongolo, gambe u phede gufuma!

¹⁸ Mayigo ma di gu wugede khu tshivba, aholu gi vbohide gikhati gyago nya gu phodze. Khigyo egi gikhati nya gulamule avo vafudego ni gu tshatshazela sithumi sago, vaprofeti; ni sihathwa, ni vatshavbo vale va ningago githawo lina lago, sanana ni vakhongolo. Gi vbohide gikhati nya gumbembise vale va saselago litigo.”

¹⁹ Khavbo avbo, Nyumba ya Nungungulu a guromo ndzadzini yi di tudwa, yi gu wonega Ngasa nya Gidzumeledzwano ndrani nya Nyumba ya Nungungulu, khu gikhati gyogyo, gu di lasa, gu pwala malito ni gu pandra mabara, gu duga girevareva, ni maralala.