Gizimba 8 - Bhibhiliya Nya Guage

Gipimaniso nya lihaladzo

¹ Nari gupwani u diri ndriyangu, na hi mamide libele limwedo, nya gu tshangana nago ndzilani, nyi di hadza gu gu bhejari nyamba sodwa khu muthu.

² Nyi gu dzega nyi gu bedza nyumbani ga mayi wangu, u ta nyi hevbudza iso u sitigo; eni nyi di hadza gu gu sedza dosi nya dziuvha nya gutshambe nya gugirwe khu dzikhure dzangu nyi dzi gamedego.

³ Libogo lago la nyambade li di hadza gu khighedwa khu hungo wangu, nyi wugaredwa khu mandza ya nyamudye gwago.

⁴ Nyi ngu mi lombani enu vanyamahegyane va Jerusalema, kheni mu nga wusini ni gu khendzugisa gigodwa gyangu, kala a dzina abune.

VI. NDZIMO NYA LIVBANDRE NA MWEYO

⁵ Wuyelelo—Gasi khu mani oyu a gwelago giwulani na wugaredwe magatani ya gigodwa gyaye?

⁶ Mwama—Nyi bethe nga gitambo monyoni gwago, u nyi betha gambe bogoni gwago, kholu lihaladzo li na ni tshivba kha nga lufu, ni gigaha ni wufu kha nga lithowo, gu vbisa ga ilo gu fanana ni guvbisa nya malavbelavbe nya nilo.

⁷ Ma mwalo mati nya gutale ma dzi kodzago gu tshima lihaladzo leli, ambari milondrwa nya guete, gu li dzamisa. Ambari nari pwani muthu a ngu ningela thomba yatshavbo ya ndrangani gwaye gasi gu renga lihaladzo, guhegisani a di vbweta gu nyenywa.

⁸ Vandruye—Hi na ni ndriyathu a ngarigu gyanana, a si gu dugigo mavele. Gasi hi na khethu ginani khuye, litshigu va na gu lombago gu a dzegwa?

⁹ Naripwani uye a diri ndzari hi di hadza guvbaha vbatshani gwaye likhokhola nya parata; a gu bani ari mwanya hi na wu sega khu mapulangu nya sedhari.

¹⁰ Mwangadzi—Eni nyi ndzari, ni mavele yangu momo nga siwindri nya gulaphe. Avbo gwaye eni nyi wonidwe nga wule a manidego gurula.

¹¹ Vandruye—Solomoni a diri ni lithembwe Bhahali-Hamoni. A nga li pharisago va lireli: Moyo ni moyo wawe a di yela gu livba likhumi mazana singerengere nya parata khu mihandro yaye.

¹² Mwangadzi—Lithembwe leli lomo mandzani gwangu; uwe Solomoni u na hakha likhumi mazana singerengere, gasi mazana mavili ma na lumba avo va li sayisago ni gu havela mihandro.

¹³ Mwama—Uwe u khalago mahangeni, dzipari dzago dzi dembide ndzeve gasi gupwa lito lago, eni neni nyi ngu gola gu lipwa

¹⁴ Mwangadzi—Gigodwa gyangu, delu khu guvbiredza, tutuma nga tshesi mwendro yisya, yi vbindrago khu vbatshani nya sigomo nya misimbo nya gunungele.