Gizimba 7 - Bhibhiliya Nya Guage

¹ Mwama—Uwe nyamahegyane wa linganagana, idzo yi mburidego khidzo migondro musilatoni gwago! Ni dzinyonga dza giwununi gwago dza gu fanana ni siwindri nya lisima, esi si vatidwego khu wumeseri.

² Rugu wago wa gu fanana ni gikombe gi mburisedwego, na gi tade khu dosi nya dziuvha nya gunungele, rumbu wago giwungela nya tirigu na gi randredwe khu senge.

³ Mavele yago ya mavili ma gufanane ni siyisyana sivili nya mavbaha.

⁴ Thamo yago ya gu fanana ni likhokhola nya magwaha nya ndzofu. Maho yago gukhwatshi madhamu ya Hesibhoni, vbafuvbi ni nyangwa ya Bhate-Rabimi, thonvu yago ya gu fanana ni likhokhola la Libhanoni li khedzidego phuvbo ga Dhamasiko.

⁵ Hungo wago, wa gu fanana ni gigomo gya Karameli; ndzudzu wa hungoni gwago, wa gu vangamela nga giwunguwungu ambari ni mufumeli a di tshunganiswa khu wumburi wago.

⁶ Mwama —U mburide u bwelo khavbo u tsakisa uwe gigodwa gyangu nya gu nyi nengedzise.

⁷ Giemo gyago, gya gu fanana ni ngindru, ni mavele yago ma gu fanana ni sitsatsa nya dzikhindru.

⁸ Nyi di ganela, kheni: “Nyi na lita ngindruni, nyi ya phara matamo yaye.” Mavele yago ma gu fanana ni sitsatsa nya dziuvha, ni gunungela nya guhefemule gwago, gu fanana ni mahema nya likandzu

⁹ besu ya kanani gwago ya gu lombela gufanana ni vbinyu yi theledwago gigodwa gyangu yi goga khu vbakari nya gihofu gyaye ni magwaha yaye.

¹⁰ Mwangadzi —Eni nya gu lumba lidzaha nyi li golago uye nuye a gu suva eni,

¹¹ Gigodwa gyangu delu, hongole mahangeni; hi na ya lala mitalalani,

¹² Hongole hi vindruge hiya mahangeni hi ya wona mwendro dzimbewu dzi rumbugide dzi phela guvelega ni gu wona gambe mwendro maromana ma ngu pandra wenge. Nyi naya gu ninga iyoyo lihaladzo langu.

¹³ Mizulameti yi ngu dusa mahema nya gunungele. Dzinyangwani gwathu gu ni mafumbu nya mangi nya mihandro nya yiphya ni ya gale, nyi dongisedego uwe gigodwa gyangu.