Gizimba 4 - Bhibhiliya Nya Guage

¹ Mwama —Idzo u mburidego khidzo gigodwa gyangu! Ah, idzo u mburidego khidzo. Maho yago gukhwatshi maho nya lituva khu ndrani nya gifenengelo gyago. Ndzudzu wago wa gu fanana ni tshambi nya dziphongo dzi havago gigomoni gya Gileyadhi.

² Magwaha yago ma gu fanana ni tshambi nya dzinvuta dzi gayidwego mawoya, dzi gwelago khu guhambatunu; mweyo ni mweyo na yi velegide mavbaha, vbakari gwawe yi mwalo ni mweyo yi gumba velega.

³ Sigundru sago sa gu fanana ni keka nya gufuvile; kanani gwago gu mburide ngudzu. Khovbe yago ya gu fanana ni maromana nya gupandrwe, ma ngangamelago khu ndrani nya gifenengelo gyago.

⁴ Thamo yago ya gu fanana ni likhokhola la Dhavhidhe li vbahidwego gasi gu vegedzela matshari, umomo gu vbayegidwe likhumi mazana sitshangu, sitshangu satshavbo nari sa dzindrena nya gudwane nyimbi.

⁵ Mavele yago, ma gu fanana ni ya siyisyana sivili nya wumburi si velegidwego khu mavbaha si havago vbakari nya senge.

⁶ Na gu si gugi, gu phalalega myedzi, nyi na gwela gigomoni nya mafura nya gunungele ni gigomwanani nya libani.

Mwama

⁷ Gigodwa gyangu, u mburide ngudzu, u mwalo givbango gi gu ni mbanga.

⁸ Delu hi hongole hatshavbo Libhanoni, uwe ngadzangu, relela khu vbatshani nya gigomo gya Amana, khu tshokhatunu nya gikoli gya Seniri ni Herimoni, khu mavbalani nya dzinghala, ni sigomoni nya dziyingwe.

⁹ U kotode monyo wangu, ndriyangu, khundzwa yangu, khu gu nyi khedza gwago basi, u kotode monyo wangu, khu githimbwa gimwegyo nya karara wago.

¹⁰ Idzo li lombelago khidzo lihaladzo lago, ndriyangu ni khundzwa yangu! Lihaladzo lago la gu tshamba ngudzu guvbindra vbinyu, ni mafura u tolago ma guvbindra mafura yatshavbo nya gunungele.

¹¹ Khu kanani gwago, uwe khundzwa yangu gu dota wulombe; khu vbavbatshi nya lidimi lago, momo mahwe ni wulombe, ni mahema nya dzingandzu dzago, ma gu fanana ni mahema nya libani la Libhanoni.

¹² Uwe ndriyangu eno khundzwa yangu, u lithembwe li bhiyidwego, gibuga gi bhiyidwego, u nambo wu segidwego.

¹³ Khavbo gwago gwa gu buga misimbo nya migure, yi dusago mihandro nya gutshambe, ni mahema nya hena ni naridhu,

¹⁴ naridhu ni safarawu, kalamu ni kanela, ni misimbo yatshavbo nya libani, nya mafura nya gunungele mira ni haluwa ni mafura yatshavbo nya gunungele.

¹⁵ U tsongo wu theledzelago marembweni, u nambo nya mati ma vbanyago, tsongo wu dugelago Libhanoni.

¹⁶ Mwangadzi —Wuga uwe phuvbo u tago khu Wuronga! Delu, nuwe phuvbo u tago khu Marandzi! Furugedzani thembweni gwangu, mu phalalegisa mahema yaye. Ah! Naripwani gigodwa gyangu gi nguta thembweni gwaye, ata hodza mihandro yaye nya gutshambe.