Gizimba 2 - Bhibhiliya Nya Guage

Gizimba nya sizimba

¹ Eni nyi genge gya Saromi, genge gya kovani.

² Mwama —Kha nga genge vbakari nya miba, kharato nugo gigodwa gyangu vbakari nya dzimbiri.

³ Mwangadzi —Gufanana ni likandzu vbakari nya misimbo ya khabini, khidzo kharato a fananago khidzo gigodwa gyangu vbakari nya madzaha. Nyi ngu wu gola ngudzu mutsa waye, nyi na khala vbavbatshi gwaye, nyipwa gulombela nya handro waye.

⁴ A di nyi bedza nyumbani nya buzo, a fenengedza nga bya nya lihaladzo laye vbatshani gwangu.

⁵ Nyi hodziseni khu sitsatsa nya dzikhure, mu nyi nengedzisa khu makandzu nya gutshambe, kholu nyi ngufa khu lihaladzo.

⁶ Libogo laye la nyambade lomo vbavbatshi nya hungo wangu, ilo la nyamudye la gu nyi wugarela.

⁷ Mwama —Nyi ngu sambanya gwanu enu vanyamahegyana va Jerusalema, khu dzitshesi ni vamangulwe va mugigomoni, gukheni mu nga wusi gigodwa gyangu a si gu dzini abune gu wuga.

II. NDZIMO NYA WUVILI

⁸ Mwangadzi —Ilolo lito la gigodwa gyangu, khuye wule! A nguta, na gu tsemakanya sigomo gu tutuma, a ndragandraga sigomwana.

⁹ Gigodwa gyangu gya gu fanana ni yisya ni mbavalana, kha mu mu woni uyoyo magumbini nya ndranga yathu, a khevisela khu sihogo a sola nyumbani.

¹⁰ Gigodwa gyangu gi di nyi embela, khigyo: “Khuga u eme, pari yangu, mburi yangu, hongole.

Mwama

¹¹ Wona gukhuwe girame gi vbindride, ni ndzadzi yi khamugide.

¹² Senge si ngu wonega tigoni, gi vbohide gikhati sinyoni si embelelago dzindzimo olu tigoni gwathu, gupwala matuva na ma gu embelela.

¹³ Mikandzu yi ngu vidziswa mihandro nya guhegule, marembwe ma ngu pandra wuluva nya senge, si phalalegisa mahema nya gunungele; khuga gigodwa gyangu, hongole mburi yangu.

¹⁴ Uwe lituva langu u sihalago dziphagoni nya siwindri, ni gukhwekelani nya gusihale; nyi yeyedze khovbe yago, nyi napwe lito lago, kholu lito lago li ngu tshamba, ni khovbe yago yi mburide.”

Mwangadzi

¹⁵ Nyi moleleni migehe, ni migehyana yi ghohetelago marembwe yathu, kholu ma tade khu senge.

¹⁶ Gigodwa gyangu gya gulumba eni, eni neni nya gulumba uye tshambi waye a gu havisela vbakari nya senge.

¹⁷ Na gu si gugi yi phalalega myedzi, wuya gigowa gyangu, u fanana ni yisya ni gimbavalana sigomoni gwa Bheteri.