Gililo 4 - Bhibhiliya Nya Guage

Gililo nya wu na

Alef

¹ Gasi yi pfhurede kharini ndralama! Ndralama yi hutidwego yi pfhurede kharini! Siwindri sa wulangani nya miphaso si mbambamede umo nya mahandzakanya yatshavbo nya dzindzila! Bet

Bet

² Madzaha nya gugolege ya Siyoni, nya wumburi nga ndralama yi hutidwego, olu ma gu fanana ni sombo nya libumba, i thumo wa muwumbi! Guimel

Guimel

³ Ambari masolwa ma ngu sayisa sanana sawe ma si mamisa; aholu nyamahegyane wa tigoni gwathu vivbide monyo a fanana ni sivaga sa giwulani. Dalet

Dalet

⁴ Migolo nya sanana sa beleni yi bangide khu kotani nya lidora. Sanana sa gu lomba guhodza aholu mwalo a si ningago. He

He

⁵ Avo va nga bani va hodza mafura, va gu thega dzindzilani khu ndzala. Avo va nga dandriswa khu dzingandzu nya siwunguwungu, olu va gu galagasela matalani. Vau

Vau

⁶ Tsayiso wa nyamahegyane wa tigoni gwathu wa gu vbindra tsayiso wa Sodhoma, gikhati a nga pfhungumudwa khu githugedza na siri khu tshivba nya mandza nya vathu; aholu khu gyandza gya Nungungulu. Zain

Zain

⁷ Vathangeli vawe va di khedziga guvbindra thondrwane, va di agide guvbindra mahwe, sivili sawe si di fuvila nga giwunguwungu va bwelo khavbo va khalega gwadi nga giwindri nya safira. Heti

Heti

⁸ Aholu, muhuno dzikhovbe dzawe dzi sivbade nga magala. Muthu a gu va mana ndzilani kha vati. Tshonge yawe yi khwenyede ni marambo ma banga nga simbo. Tet

Tet

⁹ Avo va nga songwago khu matshari va kategide guvbindra avo va ngafa khu ndzala; kholu va gu saniseka khu gu hamuga guhodza gwa mahangeni. Yod

Yod

¹⁰ Ambari vanyamayi va nga bani vari ni lihaladzo, va phude sanana sawe va hodza gikhatini nya gukhungumudwe lidhoropa la tigoni gwathu, Caf

Caf

¹¹ Pfhumu Nungungulu vbohide mahegiso nya likhulo laye, vbaladzide likhulo laye, rothide nilo Siyoni wu nga vbisago siseketelo nya madingo yaye. Lamed

Lamed

¹² Vafumeli va mafuni, gumogo ni vathu va tigoni, kha va nga khodwa gilo gukhavo, nala ni mutshanisi va nga tshuka va bela dzinyangwani gwa Jerusalema. Mem

Mem

¹³ Libango leli, li vangidwe khu sighoho sa vaprofeti ni sihoso sa vaphasi vawe nya mhamba, va gu avo va songidego vathu nya gululame, va vbaladza novba wawe dhoropani. Nuni

Nuni

¹⁴ Va di legalega mudzindzilani kha nga sikhumu na va phorode khu novba, avbo gu ngamba manega ni moyo nya gutiyele gu kuha dzingandzu dzawe. Samec

Samec

¹⁵ Va di embedwa gupwani: Khugani avba! Vathu nya gunyenyeze! Khugani mu nga hi khuhi. Va di thava va legalega ni mayigo, va nya mayigo va va embela, khavo: “Vathu vava va nga khali gambe vbakari gwathu.” Pheni

Pheni

¹⁶ Pfhumu Nungungulu uye abune a va phalalegiside kha theli gambe kota khavo. Vaphasi nya mhamba va nga ningwi gambe githawo ambari sikhosane si nga pwedwi gisiro. Ayimi

Ayimi

¹⁷ Maho yathu ma di fuvila khu gu vbweta giphaso hi si gi woni, hi garala khu gu khedzisela vathu va si kodzigo guta hi vbulugisa. Sade

Sade

¹⁸ Valala va gu demba ni migondro yathu gasi hi tandrega gu gimbila dzindzilani. Matshigu yathu, ma ngu hidzimela kholu, guvbanya gwathu gu ngu vboha mahegiso. Qof

Qof

¹⁹ Avo va hi lundrago va na ni mazambo guvbindra maghama ya damboni, va di hi tutumisa sigomoni va hi demba khu milaphwi giwulani. Resi

Resi

²⁰ Gihathwa gya Pfhumu Nungungulu uye a gu muvbanyisi wathu, modwe a thegela mavbalani gwawe; uye hi nga bani hi ganela gwaye khethu: “Hi na sihala mutsani nya dzimbapi dzaye, vbakari ga va nya mayigo.” Sini

Sini

²¹ Tsaka u nengela uwe nyamahegyane wa Edhomi, u vbanyago mayigoni gwa Uzi! Aholu enu nenu mu na sela gikombe nya likhulo la Pfhumu mu na leva mu gimbila wumbwiri nyamba ambala gilo. Tau

Tau

²² Tsayiso wago uwe nyamahegyane wa Siyoni, wu vbohide mahegiso. Pfhumu Nungungulu kha na gu vbagela gambe uya wugumbitunu. Gasi uwe nyamahegyane wa Edhomi, Pfhumu a na gu tsayisa khu kotani nya sighoho sago, Uye a na funungula sighoho sago si wonwa khu vathu.