Gililo 1 - Bhibhiliya Nya Guage

Gililo nya guhegule

Alef

¹ Khu ginani li khadego marumbi lidhoropa leli gale li nga bani li tade khu vathu! Lidhoropa leli gale li nga bani liri likhongolo vbakari nya mayigo. Olu li vbindrugedzide li khala noni li nga bani liri ni wudhumo vbakari nya mayigo, olu li khade gisiwana! Bet

Bet

² A gu lila khu wuvi wutshigu watshavbo; marongo ma goga khu sigundruni gwaye. Vbakari nya sigodwa saye, mwalo ni moyo a mu tangadzisago, dzipari dzaye dzi vbindrugedzide dzi khala valala vaye. Guimel

Guimel

³ Judha vbagedwe a yiswa hwindzo a tshaniswa a girwa khumbi; a gu vbanya vbakari nya va nya mayigo a si mani gurula. Vatshanisi vaye vatshavbo va mu lundrago, va mu randrede va mu sokhovedza. Dalet

Dalet

⁴ Dzindzila nya guhongole Siyoni dzomo gililoni; Mwalo ni moyo atago ga mibuzo yaye, myanya yaye yi pfhungumudwe, vaphasi vaye nya mhamba va gu tsikwila khu marongo, vanyamahegyane vaye va gu tshaniseka, uye mune wurumba tade khu wuvi. He

He

⁵ Vatshanisi vaye va mu pade, ni valala vaye va gu bhuma; khu Pfhumu Nungungulu a mu tsayisidego khu kotani nya sighoho saye si tadego. Ambari ni sanana saye si vbagedwe si yiswa wugumbini, si thanga mbeli ga mutshanisi. Vau

Vau

⁶ Gungangamela ga lidhoropa la Siyoni gu mwalalegide. Manganagana yaye ma khade nga dzimangwa dzi hamugago wuhaviselo, dzi thavago na dzi vbede tshivba ga wule a dzi lundrago. Zain

Zain

⁷ Olu, ga matshigu yaya nya wuvi ni gutshaniseka, Jerusalema a ngu alakanya silo saye nya gu si gole ngudzu, si nga bani si mu lumba ga matshigu ma vbindridego; avbo vathu vaye va nga thegela mandzani ga nala wawe, mwalo ni moyo a nga tago a ta mu phasa, valala va di mu hega ni gu mu tsorodzela khu guthega gwaye. Heti

Heti

⁸ Jerusalema ghohide ngudzu; khu guralo, a dzi nyenyeziside. Vatshavbo va nga bani va mu zundza, olu va gu mu poyila, khu gu wona wumbwiri waye. Uye abune a ngu dzi wona a sihala khu dzitshoni. Tet

Tet

⁹ Dzingandzu dzaye dzi tade khu ndzilo. Aholu uye kha nga alakanya litshigu nya mahegiso; ni guthega gwaye gu samadziside, aholu kha nga mana ni moyo nya gu mu tangadzise. Wari khuye “Pfhumu Nungungulu, wona wusiwana wangu, kholu nala a ngu ghiya.” Yod

Yod

¹⁰ Nala a mu dzegede thomba yaye yatshavbo. Uye wonide va nya mayigo na va gu bela nyumbani gwaye nya miphaso, eyi u nga va himbedzelago, khuwe: Kha va yeli gu gubela tshanganoni gwago.” Caf

Caf

¹¹ Vathu vaye vatshavbo va gu keta khu gu vbweta guhodza. Va rengisede dzithomba dzawe gasi gu renga guhodza va vbanye. “Nyi wone, Pfhumu Nungungulu, nyi khade muthu nya gusolege!” Lamed

Lamed

¹² Enu mwatshavbo mu vbindrago khu ndzila, nga khedzani mu wona mwendro gomo gumbe gusaniseka gu vbindrago ugo gwangu, ogu Pfhumu Nungungulu a nyi giredego khu litshigu nya likhulo laye. Mem

Mem

¹³ Rumede nilo khu vbatshani wu ta vbisa marambo yangu. A nyi dembide khu naphwi nyi tshunganela nyi thega khu nyagihwane; a nyi tshide na nyiri marumbi, nyi khala gutshanisekani litshigu latshavbo. Nuni

Nuni

¹⁴ Rwalo nya sighoho sangu wu ngu nyi lemela. Pfhumu hungide nyandra khu mandza yaye a yi handzega magatani gwangu, nyi rereka nyi vbela tshivba. Pfhumu a di nyi ningela mawogoni ga va nya tshivba nyi si kodzi gu khuga. Samec

Samec

¹⁵ Pfhumu theside dzindrena dzangu dzatshavbo dzi nga bani dzi nyi phasedzela, a rambide nyimbi, yi ta sasela madzaha yangu; Pfhumu gandredzede nyamahegyane nya likendzi wa Judha, gukhwatshi a gu gama dzindzawa. Ain

Ain

¹⁶ Khiso si nyi lidzisago; maho yangu ma vbaladza marongo, aholu mwalo a nyi tangadzisago, ni gu tiyisa hefemulo wangu; sanana sangu si ngu saniseka, kholu nala a ngu ghiya. Pheni

Pheni

¹⁷ Siyoni khusedzide mandza a lombelela, aholu mwalo a mu tangadzisago, Pfhumu Nungungulu leletede valala va Jakobe va mu randrela khu malanga yatshavbo, Jerusalema khade gihegiso mbeli gwawe. Sade

Sade

¹⁸ Uye Pfhumu Nungungulu lulamide, aholu eni nyi di bomba sileletelo saye. Yingisani mwatshavbo enu mayigo, mu wona gutshaniseka gwangu. Dzimbiri ni madzaha yangu, va vbagedwe va yiswa wugumbitunu. Qof

Qof

¹⁹ Nyi ranide dzipari dzangu, aholu avo va di nyi ningela. Vaphasi nya mhamba ni madhota yangu va mbembide dhoropani, gikhati va nga bani va gu vbweta guhodza nya guvbanyise hefemulo. Resi

Resi

²⁰ Pfhumu Nungungulu, nga wona idzo nyi tshanisekago khidzo! Hefemulo wangu wu ngu vbela tshivba. Monyo wangu wa gu ndragandraga ndrani gwangu kholu nyi gu pfhuraredego khu tshivba. Sanana sangu si ngu sasedwa vbavbandze khu matshari; ndrangani gwangu gu pwala lufu basi. Sini

Sini

²¹ Va ngupwa mahika yangu, aholu mwalo ni moyo a nyi tangadzisago. Valala vangu vatshavbo va gu ghiya khu gupwa guthega gwangu, va tsaka khiso U giridego. Aholu, Uwe Pfhumu vbiredza gu resa litshigu U li tumbisidego gasi vathu va tsayiswa navo nga eni. Tau

Tau

²² Sighoho sawe satshavbo si na wonege mahoni gwago! U kodza gu va tsayisa nga idzo u nga nyi tsayisago khidzo eni, khu kotani nya sighoho sangu. Kholu gudilela gwangu kha gu hegisi, ni monyo wangu wu ngu vbisa.