Genesi 48 - Bhibhiliya Nya Guage

Gudwala ga Jakobe

¹ Hwane nya gu bani na si dugelede satshavbo sesi, va dita embela Josefa, khavo: “Babe wago a ngu dwala.” Josefa a di khuga a dzega sanana saye sa sivili, Manasi ni Efrayimi.

² Va dita tivisa ga Jakobe, khavo: “Mwanago Josefa a nguta a ta gu wona.” Israyeli a di dzi gurumedza a wuga a kodza gu khala khu giwunu vbadawutunu.

³ A di ganela ga Josefa, khuye: Nungungulu nya Tshivba Yatshavbo a dzi wonegiside gwangu nari guwonegelani, tigoni ga Khanani, a nyi kategisa,

⁴ a nyi embela, khuye: “Nya gu vbweta gukheni u dandre u ninge mihandro; nyi na gu vbindrugedza nyi gu gira talo nya vathu nya mahundzu, nyi na ninga litigo leli ga sanana nya livelego lago, hwane ga uwe, li khala thomba yawe kala gupindruga.”

⁵ Olu, sanana sa sivili u velegidego tigoni ga Egipito, eni nyi si guti nyita khala vbafuvbi gwago, si na khala sangu. Efrayimi ni Manasi, va na khala sanana sangu, gukhwatshi khu Rubheni ni Simiyoni.

⁶ Aholu sanana u na velegago hwane ga esi, si na khala sago; va na hakha thomba yawe linani ga vandriyawe.

⁷ “Na nyi guta khu Padhani-Arami, Rakeli a di nyi fela tigoni ga Khanani, vbakari nya ndzila, na gu tshade pfhukhana nya gukari gu vbweta gu vboha Efrata; nyi mu dzingide vbale ndzilani nya guhongole Efrata, a gu Bhetlehema.”

⁸ Israyeli a di khedza sanana sa Josefa a ganela, khuye: “Khu va mani ava?”

⁹ Josefa a di hakha babe waye, khuye: “Esi khu sanana sangu nyi ningidwego khu Nungungulu tigoni momu.” Jakobe a di khuye: “Nyi ngu gu lomba u va rese eno gwangu, nyi fela gu va kategisa.”

¹⁰ Khu lisine, maho ya Israyeli, ma di garade khu gu gumba, ma di si woni gwadi. Josefa a di va embela va hidzimela ga Israyeli, uye a di va bhejari a va wugarela.

Jakobe a ngu kategisa Josefa ni sanana saye

¹¹ Khavbo avbo, Israyeli a di ganela ga Josefa, khuye: “Nyi di si alakanyi gukheni nyi na wona gambe khovbe yago, aholu Nungungulu a nyi woniside gambe ni sanana sago!”

¹² Khavbo avbo, Josefa a di va dusa vbamarumbitunu ga babe waye, a gu khidzima mbeli gwaye.

¹³ Khu gulandrela, Josefa a di phara sanana saye sa sivili: Efrayimi khu nyamudye gwaye, a gu phuvbo ga nyambade ga Israyeli; Manasi khu nyambade gwaye, a gu phuvbo ga nyamudye ga Israyeli; a di va hidzimisa gwaye.

¹⁴ Aholu, Israyeli a di thawuludza mandza yaye ya nyamudye a ma handzega hungoni ga Efrayimi, a nga bani ari nandra, a gu handzega mandza ya nyambade hungoni ga Manasi ambari a nga bani ari uye koma.

¹⁵ A di kategisa Josefa, a ganela, khuye: Nungungulu, oyu vababe vangu Abrahama ni Isaki va gimbidego khu dzindzila dzaye, Nungungulu, oyu a nyi sayisidego gukhugela guvelegwani gwangu kala litshigu la muhuno;

¹⁶ ngilozi yi nyi vbulugisidego guvivbani gwatshavbo, a na kategise sanana sesi. Si na gire lina langu li simama kala gupindruga, ni malina ya vababe vangu Abrahama ni Isaki va na velegelane va tala tigoni momu.

¹⁷ Josefa a di wona gukhuye babe waye a di handzega gyandza gya nyamudye hungoni ga Efrayimi, kha nga si gola; a di khusedza libogo la babe waye, gasi gu li dusa hungoni ga Efrayimi, a li vega hungoni ga Manasi,

¹⁸ a embela babe waye, khuye: “Ahihi baba wangu, khandridzo! Kholu koma khu oyu. Handzega gyandza gyago gya nyamudye hungoni gwaye.”

¹⁹ Aholu babe waye a di bomba, a ganela, khuye: “Nyi ngu dziti, mwanangu, nyi ngu dziti; uye nuye a na khala lihundzu, uye nuye a na bani na tade khu tshivba aholu ndriyaye nya nandra a na mu pala, gambe livelego laye li na bani liri talo nya mayigo.”

²⁰ A di va kategisa kharato litshigu lolo, khuye: “Israyeli a na ganele khavbo gwanu gikategiso gegi, khuye: Nungungulu a na gu gire kha nga Efrayimi ni Manasi. A gu vega lina la Efrayimi mbeli ga eli la Manasi.”

²¹ Khu hwane Israyeli a di embela Josefa, khuye: “Olu nyi ngufa, aholu Nungungulu a na bani ari nanu, Uye a na mi bweledzani tigoni ga vababe vanu.

²² Nyi ngu ninga guvbindra vandriyago, gipandre nya litigo la Sikemi nyi li wandridego khu gupala Vaamori khu litshari ni wulaho wangu.”