Genesi 44 - Bhibhiliya Nya Guage

Gikombe gya Josefa sakuni gwa Bhejami

¹ Josefa a di ruma muthangeli nya ndranga yaye, khuye: “Tadza khu guhodza dzisaku dza ava vathu, u gonyelela khu edzi u dzi kodzago khidzo; u wuya u vega dzitsapawu dza moyo ni moyo sakuni gwaye.

² Thela gambe gikombe gyangu nya parata sakuni nya oyu nya nandra wa vatshavbo gumogo ni tengo nya sivbila.” Muthangeli a di gira satshavbo kha nga idzo a nga rumwago khidzo khu Josefe.

³ Ni marandra gugya va di va diga va hongola ni dziburu dzawe.

⁴ Na va nga gu duga khu dhoropani, na va si gu vbohi hwindzo, Josefa a di embela muthangeli nya ndranga yaye, khuye: “Indra, landra vama vovo khu gututuma, avbo u na va manago, va embele, khuwe: Khu ginani mu nga bweledzela wuwadi khu guvivba?

⁵ Kholu mu bide gikombe a selago khigyo mune wangu, khigyo a gi thumisago gu lola khigyo. Mu girideni guvivba nya gukhongolo ngudzu!”

⁶ Muthangeli na va manede, a di va embela kharato.

⁷ Avo va di mu hakha, khavo: “Khu ginani u ganelago kharato, pfhumu? Gomo hwindzo ngudzu ni sithumi sago gu gira thumo nya nga uwowo!

⁸ Hi gu resede khu tigoni ga Khanani dzitsapawu hi nga dzi manago mudzisakuni gwathu. Hi di hadza gu dzi kodza kharini guba ndralama mwendro parata ndrangani ga mune wago?

⁹ Ga ethu sithumi sago, oyu u na mu manago nagyo a nafa, gambe ethu hatshavbothu hi na khala dzikhumbi dza pfhumu yangu!”

¹⁰ Muthangeli a di ganela, khuye: “Khidzo, lisine, u ganede gwadi: Oyu a na manwago ni gikombe khuye a na khalago khumbi yangu, enu mwatshavbo mu na tshulegani.”

¹¹ Avo vatshavbo va di vbiredzela gu tshisa dzisaku vbavbatshi, moyo ni moyo a di tula saku yaye.

¹² Muthangeli a di setsha guphela khu oyu nya koma a hegisa khu nandra. Gikombe gi ya manwa sakuni ga Bhejami.

¹³ Khavbo avbo, va di pferula guambala gwawe; va di khiledza gambe dzisaku vbadziburutunu, va bwelela dhoropani.

Wuvhikeli wa Judha

¹⁴ Judha a di bela gumogo ni vandriyaye nyumbani ga Josefa, va ya mu mana na nga romo nyumbani, va di khidzima vbavbatshi migondroni gwaye.

¹⁵ Josefa a di va wudzisa, khuye: “Gasi ginani igyo mu giridego? Kha mu dzitini gukhenu muthu nya nga eni a ngu kodza gudhumba, gani?”

¹⁶ Khavbo avbo, Judha a di hakha, khuye: “Hi na ganela khethu ginani ga pfhumu yangu? Hi na ganela kharini ni gu dzi vhikela kharini? Nungungulu wonegiside guvivba ga ethu sithumi sago. Olu hi na khala dzikhumbi dzago ethu hatshavbo gumogo ni wule a nga manwago ni gikombe.”

¹⁷ Josefa a di phindrula, khuye: “Eni nyi womo hwindzo ngudzu nya gugire isoso! Lidzaha li manidwego ni gikombe gyangu, khuye kamwe a na khalago khumbi yangu. Gasi enu, bwelelani khu gurula ga babe wanu.”

Judha a ngu lomba gu tshudwa Bhejami

¹⁸ Khavbo avbo, Judha a di hidzimela ga Josefa a ganela, khuye: “Wuhindzi wago, pfhumu yangu, dzumedzisa githumi gyago gi ganela likana limwedo basi ndzeveni ga pfhumu yangu, likhulo lago li nga khondreli githumi gyago! Kholu uwe u idzosaye ni Faro.

¹⁹ Gikhati pfhumu yangu u wudzisidego ga ethu sithumi sago, khuwe: Mu na ni babe mwendro mumbe ndriyanu, gani?

²⁰ Ethu hi hakhide ga pfhumu yathu, khethu: Hi na ni babe a gumbidego, ni ndriyathu a ngari gu gyanana, a mu velegidego wukhosaneni waye. Ndriyaye fude, gutshala uye basi ndrani ga mayi waye. Babe waye a gu mu gola ngudzu.

²¹ Uwe u di ganela ga sithumi sago, khuwe: Nyi reseleni ndriyanu, nyi fela guta mu wona.

²² Ethu hi hakhide ga pfhumu yangu khethu: Gyanana kha gi na dzi kodza gu diga babe; gya gu mu diga, babe waye a nafa.

²³ Aholu uwe u di ganela ga sithumi sago, khuwe: Mwa gumba bangaladzwa khu ndriyanu nya nandra, mu nga ti wonega gambe mahoni gwangu.

²⁴ Na hi bwelede ga githumi gyago, babe wathu, hi di ya mu embela magana ya pfhumu yangu.

²⁵ Babe wathu a di hi embela, khuye: Bwelelani mu ya hi rengela guhodza.

²⁶ Hi di mu hakha khethu: Kha hi dzi kodzi gu bwelela nya gumba hongola gumogo ni ndriyathu nya nandra. Kha hi na bwelela gambe; kholu kha hi dzi kodzi guya wonega mahoni ga mwama wule, a gumba hi bangaladza ndriyathu nya nandra.

²⁷ Khavbo avbo, githumi gyago, babe wangu, a di hi embela, khuye: Mu ngu dzitini gukhenu mwangadzi wangu a nyi ningide sanana sivili basi.

²⁸ Gimwegyo gi mwalalegide mahoni gwangu, eni nyi di, kheni: Khu lisine gi hodzidwe khu sirengo! Gima kha nya gi wona gambe kala litshigu la muhuno.

²⁹ Mwa gu nyi dzegelani gambe egi gyanana, gya guya manwa khu mhango, mu na girani dzinvi dzangu dzi relela thowoni na dzi tade khu wuvi nya wukhongolo.

³⁰ Olu, ha gu bwelela ga githumi gyago a gu babe wangu, hi na dzi kodza kharini gu hongola nyamba bangaladzwa khu gyanana, egi guvbanya gwaye gu hunganidego ni ogu ga babe?

³¹ Khu lisine, a gumba wona gyanana, a nafa; ethu sithumi sago, hi na manega na hi khade givangelo nya gureledze thowoni khu wuvi dzinvi dza githumi gyago, a gu babe wangu.

³² Eni githumi gyago, kheni nyi rwadego nandru nya gyanana gegi ga babe wangu, avbo nyi nga ganela, kheni: Nya gumba wuya gambe naye gwago nyi na rwala nandru kala gupindruga.

³³ Khu guralo, gira wuhindzi, eni githumi gyago nyi khale eni khumbi ya pfhumu yangu, wulangani wa gyanana; nyi na khale eni khumbi ya pfhumu yangu, aholu gyanana gi na bwelele gumogo ni vandriyaye.

³⁴ Nyi na dzi kodza kharini gu bwelela nyi ya wonana ni babe wangu, nyamba hongola ni gyanana? Kha nyi vbweti gu wona wuvi wu na bayisago babe wangu.