Genesi 37 - Bhibhiliya Nya Guage

Miloro nya wuprofeti ya Josefa

¹ Jakobe khade tigoni a nga endrela umo babe waye, tigoni ga Khanani.

² Eli khu livelego la Jakobe. Josefa a nga bani ari lidzaha nya likhumi na livbandre na mivili myaga nya guvelegwe gwaye, a di gu havisa dzinvuta ni vandriyaye, sanana sa Bhila ni Zilipa, vagadzi vababe waye; Josefa a di embeledzela babe waye silo nya guvivbe si nga bani si ganedwa khu va vandriyaye.

³ Israyeli a di gola ngudzu Josefa guvbindra simbe sanana saye, kholu a diri gyanana a nga velegedwa muwukhosaneni gwaye. A di rumisa gu a giredwa ngandzu nya gumbure, nya mivala nya mingi ni gulapha mawogo.

⁴ Vandriyaye khu gu wona gukhavo babe wawe a gu gola ngudzu Josefa guvbindra avo vatshavbo, va di mu girela lidiwo, va mu venga va si ganeli naye na va tshulegide.

⁵ Josefa a di lora ndroro, a gu embela vandriyaye; avo va di engedzela gu mu venga khu tshivba.

⁶ Josefa a di khuye gwawe: “Nyi ngu mi lombani mupwe ndroro nyi nga lorago.

⁷ Ethu hi di gu hunga maduvi nya mwasi thembweni, khu githugedza, liduvi langu li di khugega li ema, gasi aya yanu ma di gu li randrela ma gu noga mbeli gwaye.”

⁸ Vandriyaye va di mu embela, khavo: “Ina uwe u na fumela vbatshani ga ethu hatshavbothu, gani? Gu nonedza gukhuwe u na khala uwe pfhumu yathu?” Va di engedzela gu mu venga khu kotani nya dzindroro ni magana yaye.

⁹ Josefa a di engedza gulora yimbe ndroro a embeledzela vandriyaye, khuye: “Nyi loride gambe yimbe ndroro: Khu ndroroni nyi di wona lidambo ni ngima ni likhumi na mweyo dzinyeledzi na dzi gu noga mbeli gwangu.”

¹⁰ A di ya embela babe waye ni vandriyaye; babe waye a di mu hakha, khuye: “Ya gu tshamusela ginani ndroro yoyo? Ina eni babe wago ni mayi wago gumogo ni vandriyago, hi na noga vbavbatshi mbeli gwago, gani?”

¹¹ Vandruye va Josefa va di mu girela lidiwo, aholu babe waye, a di vegedza silo monyoni gwaye.

Josefa a ngu rengiswa khu vandriyaye

¹² Tshigu mwedo vandruye va Josefa va di ghula mitshambi ya babe wawe va gu yi yisa Sikemi.

¹³ Israyeli a di embela Josefa, khuye: “Vandriyago vomo Sikemi va gu havisa mitshambi. Dzi dongisele kholu nya gu vbweta gu gu rumela gwawe.” Josefa a di hakha, khuye: “Nyi dongide.”

¹⁴ Israyeli a di mu embela, khuye: “Indra u ya wona vandriyago vomo kharini ni gu wona mitshambi, u nyi resela phindrulo.” A di mu rumela kharati gukhugela kovani wa Hebroni. Josefa a di phara ndzila a hongola Sikemi.

¹⁵ Mwama moyo a di mana Josefa na gu dzimela panini, wuhaviseloni, a mu wudzisa, khuye: “Ginani u vbwetago?”

¹⁶ Uye a di hakha, khuye: “Nya gu vbweta vandriyangu, gira wuhindzi u nyi yeyedza umo va havisago umo mitshambi yawe.”

¹⁷ Mwama a di mu embela, khuye: Va khugide omu, kholu nyi va pwide na va gukhavo: “Hongoleni Dhotani.” Khavbo avbo, Josefa a di landra vandriyaye, aya va mana Dhotani.

¹⁸ Aholu avo va mu wone na nga guta khu hwindzo, va pwanana gu mu songa.

¹⁹ Va di embeledzelana, khavo: “Wonani a nguta nyamilorwane.”

²⁰ “Hongoleni hi mu songe hi mu rinya ga moyo nya milambo yeyi, hi na ya khethu a di hodzwa khu sirengo nya likhabi. Hi na nga wona mwendro miloro yaye yi na tadzisega.”

²¹ Rubheni, na vapwide, a di vbweta mano nya gu mu vbulugise mandzani gwawe. A di ganela, khuye: “Hi nga mu duseli guvbanya gwaye.”

²² Rubheni a di engedza a ganela, khuye: “Mu nga vbaladzini novba! Mu rinyeni namboni wu guromo giwulani, aholu mu nga mu bayisi.” A diri ni mapimo nya gu mu vbulugise mandzani gwawe gasi gu mu bweledza ga babe waye.

²³ Josefa, na vbohide ga vandriyaye, avo va di mu tshula ngandzu nya gulaphe a nga bani na ambade,

²⁴ va mu mola va mu rinya namboni. Nambo wu diri liphanga nyambana mati.

²⁵ Khavbo avbo, va di khala vbavbatshi va hodza. Aholu na va khuside maho va di wona tsawa nya vasundzi va na Ismayeli na va guta khu Gileyadhi. Dzingameriya dzawe na dzi rwade mirwalo nya mafura ni mirendre nya guhambanelane na va gu hongola nayo tigoni ga Egipito.

²⁶ Khavbo avbo, Judha a di embela vandriyaye, khuye: “Giphaso muni hi gi manago khu gu songa ndriyathu hi gu futela novba waye?

²⁷ Deluni hi mu rengisa ga va na Ismayeli, kha hi na nga nyenyezisa mandza yathu khu gu mu songa, kholu i ndriyathu, nyama yathu.” Vandriyaye va di dzumela.

²⁸ Vanyawugwewo nya gute khu tigoni ga Medhiyani, va di vbindra khu vbafuvbi ni vbale va nga bani varomo vandruye va Josefa. Va ndriyaye va di dusa Josefa khu namboni; va mu rengisa ga va na Ismayeli khu tengo nya magumavili singerengere nya parata. Vaismayeli va di dzega Josefa va gu hongola naye Egipito.

²⁹ Avbo Rubheni a nga bwelelago nambotunu, a di wona gukhuye Josefa mwalo vbale, a di pferula dzingandzu dzaye,

³⁰ aya ga vandriyaye aya, khuye: “Lidzaha li mwalo gambe eyi, ahati eni nyi naya evbini?”

³¹ Khavbo avbo, avo va di dzega ngandzu ya Josefa, va gu paya phongo, va dzega ngandzu va yi nega novbani gakone.

³² Khu hwane va di rumela ngandzu nya gulaphe ya Josefa, ni mwango nya guembele babe wawe, khavo: “Hi manide ngandzu yeyi. Hi ngu gu lomba u yi khedza mwendro khiyo ngandzu ya gyanana gyago.”

³³ Jakobe a di dzegela gu yiti khuye khiyo, a gu ganela, khuye: “Ngandzu ya gyanana gyangu! Gi hodzidwe khu girengo nya likhabi! Josefa vbadzuledwe!”

³⁴ Khavbo avbo, Jakobe a di pferulela dzingandzu dzaye, a gu hunga libhandri nya miba giwununi, a ambala silendra nya gulile gyanana gyaye, matshigu nya gulaphe ngudzu.

³⁵ Sanana saye satshavbo nya vama ni vanyamayi si di dzi garadza khu gu vbweta gu mu tangadzisa, aholu uye a di bomba gutangadziswa, a ganela, khuye: “Ahihi! Nyi na lila gyanana gyangu kala nyi ya manana nagyo thowoni!” Khu kharati, babe waye a di simama a mu lila.

³⁶ Vamedhiyani, va di dzega Josefa va ya mu rengisa tigoni ga Egipito, ga Potifari, thenwa wa mufumeli Faro, a nga bani ari muthangeli nya vaghadhi.