Genesi 35 - Bhibhiliya Nya Guage

Jakobe a ngu wuya Bheteli

¹ Pfhumu Nungungulu a di embela Jakobe, khuye: “Khuga u gwela Bheteli, indra uya khala iyo. U naya vbaha iyo giluvelo gya Nungungulu a nga dzi wonegisago gwago gikhati u nga bani u gu tutuma khu guthava ndriyago Esawu.”

² Jakobe a di embela ngamo yaye ni vatshavbo a nga bani nari navo, khuye: “Fuvisani vanungungulu nya valombo va guromo vbakari gwanu, dzi agiseni mu vbindrugedza guambala.

³ Hongoleni hi khuge hi gwela Bheteli, nyi naya vbaha iyo giluvelo gya Nungungulu a nyi hakhidego litshigu nyi nga bani nyiri wuvini nya gutshaniseke gwangu, a nga nyi hetedzago dzindzilani gwatshavbo nyi gimbidego.”

⁴ Khavbo avbo, va di ningela ga Jakobe vanungungulu vatshavbo nya valombo va nga bani vari navo ni dziphera va nga bani va ambade dzindzeveni. Jakobe a si kembela tshinani nya simbo wu nga bani na wu romo Sikemi.

⁵ Na va khugide, Nungungulu a di thela hwanga ni githawo ga vathu va madhoropani ya vbafuvbyana mule, mwalo ni moyo a nga dugago a gu tutumisa sanana sa Jakobe.

⁶ Khu guralo, Jakobe a di vboha gumogo ni vathu vatshavbo avo a ngatago navo dhoropani gu ranwago pwani Wenengedzo, mwendro gupwani Bheteli, tigoni ga Vakhanani.

⁷ A di vbaha vbale giluvelo, a rana wulanga wule khuye Eli-Bheteli, kholu khavbo Pfhumu Nungungulu a dzi wonegisidego gwaye, gikhati a nga bani na gututuma khu gu thava ndriyaye.

⁸ Gikhati gyogyo, a difa Dhebhora, githumi gya Rebheka, va mu dzinga releloni ga Bheteli, mutsani nya nguhu, wu ranwago gupwani Nguhu nya Gililo.

Nungungulu a ngu dzi wonegisa ga Jakobe

⁹ Nungungulu a di dzi wonegisa gambe ga Jakobe, hwane nya gu na wide khu Padhani-Arani, a gu mu kategisa.

¹⁰ A ganela, khuye: “Uwe khuwe Jakobe, aholu, gukhugela olu, lina lago u na ranwa pwani khuwe Israyeli. Nungungulu a di mu riya kharati lina la Israyeli.

¹¹ A di engedza gambe a mu embela, khuye: Eni kheni Nungungulu nya Tshivba Yatshavbo; uwe u na andra u velegelana, khavbo gwago gu na velegwa dhudhudhu nya mayigo ni vathu nya gutale ngudzu;

¹² Nyi na gu ninga litigo nyi ningidego Abrahama ni Isaki; nyi na ninga gambe sanana sago, hwane gwago.”

¹³ Khavbo avbo, Nungungulu a di gwela a si wonegi gambe mahoni gwaye, wulanga a nga ganelago nari avbo.

¹⁴ Khavbo avbo, Jakobe a di vbaha vbale gialakanyiso a gu gira phaso, a guhula avbo mafura.

¹⁵ Jakobe a di rana wulanga wule khuye Bheteli, wulanga Nungungulu a ganedego naye.

Guvelegwa ga Bhejami ni gufa ga Rakeli

¹⁶ Va di khuga khu Bheteli, gu nga tshade pfhukanyana gasi gu vboha dhoropani ga Efrata, Rakeli a di hefemula gyanana khu gugaradzega ngudzu.

¹⁷ Nari vbakari nya wuvi nya gulumwe, singalagadzi a di mu embela, khuye: “Tiya, kholu u ngu engedza gu velega gambe gyanana.”

¹⁸ Gikhati gi dugidego gyanana, uye a di gu sala, a gi riya lina nya gukhuye khu Bhenoni; aholu babe waye a di gi rana khuye Bhejami.

¹⁹ Rakeli a difa a gu dzingwa ndzilani nya guhongole Efrata, a gu Bhetlehema.

²⁰ Jakobe a di vega gialakanyiso vbathowotunu gwa Rakeli, gi nga romo kala na muhuno olu.

²¹ Khu vbale, Jakobe a di khuga aya vbaha tshatsha waye khisikheyi ga Migidhali-Edheri

²² Matshigu Israyeli a nga bani a gu vbanya tigoni mule, Rubheni a di bhaya ni Bhila, gibhayi gya babe waye, Israyeli a di mati mahungu yaya. Sanana sa Israyeli a diri likhumi na sivili.

Livelego la Jakobe

²³ Sanana sa Liya, khesi: Rubheni, matiwula ya Jakobe, guhandzamedza Simiyoni, Levhi, Judha, Isakari ni Zebhuloni;

²⁴ sanana sa Rakeli, khesi: Josefa ni Bhejami;

²⁵ sanana sa Bhila, githumi gya Rakeli, khesi: Dhani ni Nafitali;

²⁶ sanana sa Zilipa, githumi gya Liya, khesi: Gadhi ni Aseri. Esi khu sanana sa Jakobe si velegidwego tigoni gwa Padhani-Arani.

Gufa ga Isaki

²⁷ Jakobe a di vboha ga babe waye Isaki tigoni gwa Mambre ga Kiriyati-Aribha, a gu Hebroni, a gu iyo va luvedego iyo Abrahama ni Isaki.

²⁸ Matshigu nya guvbanye ga Isaki ma tshanganiside lizana ni livbandre na mararu magumi (180) myaga.

²⁹ Na ma vbede, a difa aya patana ni vababe vaye, na gumbide, na tade khu gunengela khu matshigu yaye. Sanana saye Esawu ni Jakobe va di mu dzinga.