Genesi 28 - Bhibhiliya Nya Guage

Isaki a ngu rumela Jakobe Padhani-Arani

¹ Isaki a di rana Jakobe, a mu kategisa, a mu laya, khuye: “Gima u nga dzegi nyamayi vbakari ga vanyamahegyane nya Vakhanani.

² Khuga u hongole tigoni ga Padhani-Arani, ndrangani ga Bhetuweli, babe wa mayi wago, u naya dzega mwangadzi ga sanana sa Laboni, ndruye wa mayi wago.

³ Nungungulu nya Tshivba Yatshavbo a na gu kategise, a gu dandrisa ni gu gu andrisa gasi u khale talo nya mahundzu!

⁴ A na gu kategise uwe gumogo ni livelego lago, kha nga gikategiso gya Abrahama, gasi u fela gu hodza thomba nya litigo u luvelago umo, eli Nungungulu a li ningidego Abrahama.”

⁵ Isaki a di vbangana Jakobe, uye a phara ndzila aya tigoni Padhani-Arani, ndrangani ga Laboni, mwamana wa Bhetuweli, Muarami, ndruye wa Rebheka, mayi wa Esawu ni Jakobe.

⁶ Esawu a di wona gukhuye Isaki a kategiside Jakobe, a mu rumela tigoni ga Padhani-Arani, afela guya dzega iyo nyamayi, a di wona gambe gukhuye, gu mu kategisa gwaye a mu himbedzede guvbweta nyamayi vbakari nya vanyamahegyane va Vakhanani;

⁷ khu guyingela milayo ya babe ni mayi waye, Jakobe a di khuga a hongola tigoni ga Padhani-Arani.

⁸ A di wona gambe gukhuye babe waye Isaki, kha tsakiswi khu vanyamahegyane nya Vakhanani,

⁹ Esawu a di khuga aya ga Ismayeli, mwamana wa Abrahama, aya dzega mumbe nyamayi gu diga ava a nga bani ari navo. A diya dzegana ni Mahalati, nyamahegyane wa Ismayeli, ndruye wa Nebhayoti.

Ndroro ya Jakobe tigoni ga Bheteli

¹⁰ Jakobe a di khuga khu Bherisebha a phara ndzila nya guye Harani.

¹¹ Na vbohide wulangani nya gukari, a di lala avbo kholu lidambo li di pfode, a di dzega giwindri gimwegyo a nga gi mana wulanga wule a gira gikhuledzo, a lala.

¹² Khavbo avbo, Jakobe a di lora. A di wona gilito na gi tsitsidwe mafuni, tshokhatunu gakone na gu ghuma ndzadzini, avbo nya gilito gyogyo, gu di lita ni gu tshiga dzingilozi dza Nungungulu.

¹³ Khu vbatshani gakone, a di khade Pfhumu Nungungulu a mu embela, khuye: “Eni kheni Pfhumu Nungungulu wa koko wago Abrahama ni Nungungulu wa babe wago Isaki. Nyi na gu ninga uwe gumogo ni livelego lago, litigo leli u ladego avbo.

¹⁴ Sanana sago si na tala ngudzu kha nga mafu ya tigoni; u na nava uya Muhwadambo ni Khugadambo, Wuronga ni Marandzi. Mahundzu nya vathu vatshavbo va tigoni, ma na kategiswa khavbo gwago ni ga livelego lago.

¹⁵ Eni nyi na ni uwe, nyi na gu vhikela ni evbini u na hongolago, nyi na gu wuyisa tigoni momu, kholu gima kha nyi na gu diga, nyi si gu tadzisi esi nyi gu tumbisidego.”

¹⁶ Na khendzugide, Jakobe a di ganela, khuye: “Khu lisine Pfhumu Nungungulu womo wulanga wowu, aholu eni nyi di si dziti.”

¹⁷ A di engedza a ganela na tade khu hwanga, khuye: “Wu thiside ngudzu wulanga wowu! Avba Nyumba ya Nungungulu, owu mwanya wa ndzadzini.”

¹⁸ Khu mindru gakone, na gu ngari dzimindru ngudzu, Jakobe a di dzega giwindri gile a nga lalago a khighela avbo, a gi emisa kha nga lidingo gasi gi khala gialakanyiso, a guhula mafura vbatshani gakone.

¹⁹ Jakobe a di rana wulanga wule, khuye Bheteli, lidhoropa khu gale li nga bani li gu ranwa gupwani Wenengedzo.

²⁰ Khavbo avbo, Jakobe a di gira gisambanyo, khuye: Nungungulu a gu gimbila ni eni a nyi endredza ga lipfhumba leli nyi gu nalo, a nyi ninga guhodza ni guambala,

²¹ a nyi kategisa nyi bwelela khu gurula ndrangani ga babe wangu, khu guralo, Pfhumu Nungungulu a na khala uye Nungungulu wangu.

²² Giwindri gegi nyi gi tsitsidego kha nga lidingo nya gialakanyiso, gi na bani na giri Nyumba ya Nungungulu; ga satshavbo iso a na gu nyi ningago nyi na dusa nyi livba gipandre nya likhumi.