Genesi 25 - Bhibhiliya Nya Guage

Sanana sa Abrahama ni Ketura

¹ Abrahama a di dzega gambe mumbe nyamayi nya gupwani khu Ketura,

² a nga velega naye Zinerani, Jokisani, Medhani, Madhiyani, Isibhaki ni Suwa.

³ Jokisani a di velega Sabha ni Dhedhani. Sanana sa Dhedhani, khu Hasurini, Letusini, ni Lewumini.

⁴ Sanana sa Madhiyani khu Efa, Eferi, Enoki, Abhidha ni Elidha; esi satshavbo khu sanana sa Ketura.

⁵ Khu guralo, Abrahama a di ninga Isaki dzithomba dzaye dzatshavbo.

⁶ Aholu sanana sa vanyamayi nya vadugwane, a di si kavedzela basi siningwa, a si rumela na nga gu vbanya guya khala hwindzo ga Isaki, gyanana gyaye, mayigoni ya Khugadambo.

Gufa ga Abrahama

⁷ Aya khu matshigu nya guvbanye gwa Abrahama: Vbanyide lizana ni livbandre na mavili magumi ni livbandre (175) myaga.

⁸ Abrahama a di hefemudzega; afa na gumbide ngudzu, na tade khu matshigu nya guvbanye, a diya patana ni vababe vaye.

⁹ Sanana saye Isaki ni Ismayeli, si diya mu dzinga phalani nya giwindri gya Makipela, gi guromo tigoni ga Efroni, gyanana gyaye Sowari, Muhiti a nga bani nari mbeli ga Mambre,

¹⁰ petoni a nga rengago Abrahama ga Vahiti. Abrahama a di dzingwa vbale ni mwangadzi waye Sara.

¹¹ Hwane nya gu bani na fude Abrahama, Nungungulu a di kategisa mwanaye Isaki, a nga bani na gu vbanya vbafuvbi ni nambo wa Lahayi-Royi.

Situgulwana sa Ismayeli

¹² Eli khu livelego la Ismayeli, gyanana gya Agari, khumbi nya Mugipiti, eyi Sara a nga ningago Abrahama.

¹³ Malina nya sanana sa Ismayeli, gukhedza khu longoloko nya guvelegwe gwawe, khaya: Nabhayoti, matiwula ya Ismayeli; gu handzamedza Kedhari, Adhibiyeli, Mibhisamu,

¹⁴ Mesimahe, Dhumahe, Masahe,

¹⁵ Hadhadhe, Tema, Jeturi Nafisi ni Kedima.

¹⁶ Esi khu sanana sa Ismayeli, khayo malina yawe gukhedza khu mayigwana yawe ni dzindranga dzawe, khavo likhumi na vavili vathangeli nya mahundzu yaye.

¹⁷ Myaga nya guvbanye ya Ismayeli, lizana ni magumararu na livbandre na mivili (137) myaga. Hwane nya ugo, a difa aya patana ni vababe vaye.

¹⁸ Sanana saye si di vbaha gukhugela Havila kala Suri, gu khalago vbinganoni ni Egipito phuvbo nya guye Asuri. Vbahide wulanga wule na gu wonwa khu vandriyaye.

Livelego la Isaki

¹⁹ Eli khu livelego la Isaki, mwamana wa Abrahama: Abrahama a di velega Isaki;

²⁰ Isaki a diri ni tanga nya magumana myaga gikhati a nga dzegago Rebheka, nyamahegyane wa Bhetuweli, Muharami wa Padhani-Arami, ndruye wa Laboni, Muharami.

²¹ Isaki a di lomba gikategiso ga Pfhumu Nungungulu, a lombelela mwangadzi waye a nga bani nari gyumba. Pfhumu Nungungulu a dipwa nombelo waye, mwangadzi waye Rebheka a di khura mimba.

²² Sanana si di khala khu gu dwana ndrani gwaye, uye a di ganela, khuye: “Khu ginani nyi nga khurago mimba gasi nyi manega ni esi kharati?” A di khuga aya wudzisa Pfhumu Nungungulu.

²³ Uye a di mu hakha, khuye: “Ndrani gwago momo mayigo mavili: Mahundzu mavili nya vathu ma na dugago khu ndrani gwago. Lihundzu limwedo li na pala limbe, koma a na thumela nandra.”

²⁴ Avbo gi nga vbohago gikhati nya guvelege gu di duga mavbaha khu ndrani gwaye.

²⁵ Uye a nga phela khuye gu duga a diri ni libonvu, na fenengedzidwe khu mafefeleti mili waye watshavbo kha nga volo, khidzo kharato va nga mu ningago lina nya gupwani khu Esawu.

²⁶ Khu gu landrela gu di duga nuye ndriyaye na mode gitshinandro gya Esawu. Khigyo gi nga gira va mu ninga lina nya gupwani khu Jakobe Gikhati va velegidwego, Isaki a diri ni tanga nya livbandre na limwedo magumi myaga nya guvelegwe gwaye.

²⁷ Sikhwathana si di dandra, Esawu a di khala musoti nya wadi, mwama nya likhabi. Gasi Jakobe a diri muthu nya gurule, a di vbanya mitshatshani.

²⁸ Isaki a di gola ngudzu Esawu, kholu a di gu gola gusota, aholu Rebheka a di gola ngudzu Jakobe.

Mbiya nya dzinyemba

²⁹ Tshigu mwedo Jakobe a di gu phula guhodza. Esawu a di wuya khu khabini na garade ngudzu.

³⁰ A di embela Jakobe, khuye: “Nya ngu gu lomba, nyi dige nyi hodza guhodza gwago nya gufuvile gwadi, kholu nyi garade ngudzu.” Khigyo gi nga gira va ninga Esawu lina nya gupwani khu Edhomi.

³¹ Khavbo avbo, Jakobe a di phindrula, khuye: “Guphela nyi rengisele wukoma wago.”

³² Esawu a di hakha, khuye: “Wu na nyi phasa ginani wukoma olu nyifago khu ndzala?”

³³ Jakobe a di mu embela, khuye: “Sambanya kamwe olu.” Uye a di sambanya, a gu rengisa kharati wukoma waye ga Jakobe.

³⁴ Khavbo avbo, Jakobe a di mu ninga gibaba ni mbiya nya dzinyemba. Esawu a di hodza a sela; na vbedzide a di khuga a hongola. Khidzo kharato Esawu a nga luzago khidzo wukoma waye.