Genesi 21 - Bhibhiliya Nya Guage

Guvelegwa gwa Isaki

¹ Pfhumu Nungungulu a di ta holela Sara, kha nga a nga ganelago, gambe a mu girede esi a nga mu tumbisago.

² Sara a di khura mimba a velega gyanana nya gikhwathana ga Abrahama a nga bani a gumbide, matshiguni yale Nungungulu a nga bani na ma vegiside.

³ Abrahama a di riya lina nya gupwani khu Isaki, gyanana gegi a nga velegedwago khu Sara.

⁴ Abrahama a di hanisa wugwera gyanana gyaye Isaki, gikhati gi nga tshanganisago livbandre na mararu matshigu, kha nga idzo a nga leletedwago khidzo khu Pfhumu Nungungulu.

⁵ Abrahama a diri ni lizana (100) myaga gikhati gi velegidwego gyanana gyaye, Isaki.

⁶ Sara a di khuye: “Nungungulu a nyi ningide mahego, vatshavbo va na dzitigo va na hegelela gumogo ni eni.”

⁷ A di ganela gambe, khuye: “Khu mani alakanya gukhuye Abrahama a na tshuka a embedwa gupwani Sara a na mamisa sanana! Kholu nyi mu velegede gyanana muwukhosaneni gwaye.”

Agari mugiwulani

⁸ Gyanana gi di dandra gi lumudwa. Abrahama a di gira buzo nya wukhongolo ngudzu litshigu a nga lumudwago Isaki.

⁹ Avbo Sara a nga wona nya gukhuye gyanana gya Abrahama a nga velegedwago khu Agari, nyamayi nya Mugipiti, gi ngu hagana gumogo ni Isaki,

¹⁰ A di embela Abrahama, khuye: “Tutumisa githumi gegi ni gyanana gyaye, kholu gyanana gya githumi kha gi na nga khala muhodzi nya thomba gumogo ni gyanana gyangu Isaki.”

¹¹ Magana yaya ma di swihadza ngudzu Abrahama kholu Ismayeli nuye a diri gyanana gyaye.

¹² . Aholu Nungungulu a di mu embela, khuye: “U nga garadzegi khu kotani nya gyanana ni githumi gyago. Gira satshavbo esi Sara a gu embelago; kholu livelego li na gu wusago lina lago kala gupindruga khu Isaki

¹³ Aholu khavbo ga gyanana gya khumbi, nyi na wusa gambe litigo nya likhongolo, kholu khwa livelego lago.”

¹⁴ Abrahama a di wuga ni dzimindru ngudzu a dzega gibaba ni kanvu nya mati a ninga Agari; a di mu velegisa gyanana hwamboni a mu vbangana a hongola. Agari a di duga a legalega giwulani gya Bherisebha.

¹⁵ Gikhati ma vbedego mati gikanvwanani, Agari a di dzega gyanana a gi vega mutsani nya simbo,

¹⁶ uye aya khala phuvbo, pfhuka nya guningane uwo nya giholoma gya gu khwandrwa khu wulaho. A di gu ganela khu monyoni gwaye, khuye: “Kha nyi vbweti gu wona gyanana gyangu na gi gufa.” Na khade mbeli gwaye, gyanana gi di khusa lito gi lila.

¹⁷ Nungungulu a di pwa khu ndzadzini gulila nya gyanana, ngilozi ya Nungungulu yi di rana Agari, khiyo: “Ginani u gu nagyo, Agari? U nga thavi, kholu Nungungulu pwide lito nya gyanana wulangani gi guromo avbo.

¹⁸ Khusa gyanana, gi wugarele gwadi, kholu khu igyo, nyi na wusa litigo nya likhongolo.”

¹⁹ Nungungulu a di tula maho Agari, uye a di wona nambo. A diya tadza kanvu khu mati a ninga gyanana gi sela.

²⁰ Nungungulu a diri gumogo ni gyanana. Igyo gi di dandra gi ya vbaha giwulani ga Parani, a khala mwama nya gugire ni guthumisa wulaho.

²¹ Uye a diya vbaha giwulani ga Parani, mayi waye a diya mu dzegela nyamayi nya Mugipiti.

Abrahama a ngu gira gidzumeledzwano ni Abhimeleki

²² Matshigu yale, Abhimeleki a dita ni Fikoli, muthangeli nya dzinyimbi, ata embela Abrahama, khuye: “Nungungulu a ngu gu kategisa ga satshavbo u girago.

²³ Olu nyi sambanyele avba khu Nungungulu gukhuwe gima khu na nga nyi pfhadza eni, sanana sangu, ambari ni valongo vangu, ni gukhuwe u na gola litigo leli u dzudego umo kha nga muwuyi, kha nga idzo eni nyi gu hakhidego nyi gu gola khidzo.”

²⁴ Abrahama a di hakha, khuye: “Ina eni nyi ngu sambanya!”

²⁵ Abrahama a di kawuka Abhimeleki khu kotani nya nambo wu nga wandrwago khu tshivba khu sithumi sa Abhimeleki.

²⁶ Khavbo avbo, Abhimeleki a di hakha, khuye: “Eni kha nyi muti khu mani a giridego isoso. Uwe gima khwa nga nyi tivisa mahungu yoyo; nya gu phela muhuno olu gu gupwa nu gu ganela isoso.”

²⁷ Abrahama a di dzega dzinvuta ni dzimombe a ninga Abhimeleki, va vavili va di gira gidzumeledzwano.

²⁸ Aholu Abrahama a di kasa livbandre na dzimbili dzinvuta nya tshambi.

²⁹ Abhimeleki a di mu wudzisa, khuye: “Sa gu tshamusela ginani dzinvuta dzodzo nya livbandre na dzimbili u dzi kasidego phuvbo?”

³⁰ Uye a di hakha, khuye: “Gu vbweta gukheni u hakhe khu mandzani gwangu edzi nya livbandre na dzimbili dzinvuta gasi dzi khala wufakazi nya gukheni, kheni nyi nga polago nambo yoyu.”

³¹ Khu kota nya isoso, wulanga wule wu di ranwa gupwani Bherisebha, kholu vbale, va vavili va di girelana gisambanyo.

³² Va di hunga kharati gidzumeledzwano gya Bherisebha. Khu vbale, Abhimeleki ni Fikoli va di phara ndzila va bwelela tigoni ga Vafilisitiya.

³³ Abrahama a di yala ngindru Bherisebha, a rana avbo Pfhumu Nungungulu nya Gupindruge.

³⁴ Abrahama a di luvela matshigu nya gulaphe ngudzu tigoni ga Vafilisitiya.