Genesi 11 - Bhibhiliya Nya Guage

Langwe ya Bhabheli

¹ Matshiguni yale, vathu vatshavbo va di gu ganela lidimi limwedo basi, vatshavbo va di thumisa malito ya mamowo.

² Aholu gu di vboha avbo va nga fulugago khu Khugadambo, va gimbila kala guya vboha panini ga Sinari, va gu vbaha umo.

³ Va di embedzelana khu gyawe, khavo: “Hongoleni hi gire sitini, hi si vbisa niloni.” Sitini va di si thumisa kha nga siwindri, aholu va di londra khu nyedzi.

⁴ Khu hwane nya ugo va di khavo: “Olu hongoleni hi vbahe lidhoropa ni langwe nya yikhongolo nya gulaphe ngudzu yi manela ndzadzini, kholu gu vbwetega hi pwala ndruma, gasi hi si phalalegiswi ni litigo latshavbo.”

⁵ Pfhumu Nungungulu a di tshiga gasi guta wona lidhoropa ni langwe va nga bani va guvbaha vathu.

⁶ Khavbo avbo, Pfhumu Nungungulu a di ganela, khuye: “Avo vatshavbo lifumbu limwedo basi, gambe vatshavbo va gu ganela lidimi limwedo basi. Olu va giride esi, gukhugela olu mwalo gambe a na dzi kodzago gu va thindrekisa gugira ni gevbini va na gu gi alakanyago.

⁷ Hongoleni hi relela vbavbatshi yeyi, hi ya hambanisa malimi gasi vathu va si mani gupwanana khu gyawe.”

⁸ Khu magirelo yaya, Pfhumu Nungungulu a di va phalalegisa mafuni gwatshavbo, va hegisa khu gu diga guvbaha lidhoropa.

⁹ Khu guralo, lidhoropa lile li di ranwa gupwani Bhabheli, kholu khumo dhoropani momo Nungungulu a nga hambanisago maganelelo nya vathu a gu va phalalegisa ni litigo latshavbo.

Sasamedzo nya sanana sa Semi kala Abrahama

¹⁰ Owu khu longoloko nya sanana sa Semi. Semi a di tshanganiside lizana myaga gikhati a velegidego mwanaye Arifasadi, na gu vbindride myaga mivili hwane nya talo nya ndrambi.

¹¹ Na velegide Arifasadi, Semi vbanyide gambe livbandre mazana (500) myaga, a gu velega sanana nya vama ni vanyamayi.

¹² Arifasadi, khu tanga nya magumararu na livbandre myaga, a di velega Sela.

¹³ Na velegidwe Sela, Arifasadi a di vbanya gambe mazana mana ni myaga miraru (403), a gu velega sanana nya vama ni vanyamayi.

¹⁴ Sela a nari ni magumararu myaga nya guvelegwe gwaye, a di velega mwanaye Hebheri.

¹⁵ Hwane nya ugo, Sela a di vbanya gambe mazana mana ni myaga miraru (403), a gu velega sanana nya vama ni vanyamayi.

¹⁶ Hebheri nari ni magumararu na mina myaga, a di velega mwanaye Pelegi.

¹⁷ Hwane nya guvelegwe Pelegi, Hebheri vbanyide gambe mazana mana ni magumararu (430) myaga, a gu velega sanana nya vama ni vanyamayi.

¹⁸ Pelegi, nari ni tanga nya magumararu myaga, a di velega mwanaye Rewu.

¹⁹ Hwane nya guvelegwe Rewu, Pelegi vbanyide gambe mazana mavili ni livbandre na mina (209) myaga, a gu velega sanana nya vama ni vanyamayi.

²⁰ Rewu, khu tanga nya magumararu na mivili myaga, a di velega mwanaye Serugi.

²¹ Hwane nya avbo, vbanyide gambe mazana mavili ni livbandre na mivili (207) myaga, a gu velega sanana nya vama ni vanyamayi.

²² Serugi, khu tanga nya magumararu myaga nya guvelegwe gwaye, a di velega Nahori.

²³ Hwane nya guvelegwe Nahori, Serugi vbanyide gambe mazana mavili (200) myaga, a gu velega sanana nya vama ni vanyamayi.

²⁴ Nahori, khu tanga nya magumavili na livbandre na mina myaga, a di velega mwanaye Tera.

²⁵ Na velegidwe Tera, Nahori vbanyide gambe lizana ni likhumi na livbandre na mina (119) myaga, a gu velega sanana nya vama ni vanyamayi.

²⁶ Tera, nari ni tanga nya livbandre na mavili magumi myaga, a di velega Abrahama, Nahori ni Harani.

²⁷ Longoloko nya sanana sa Tera khowu: Tera velegide Abrahama, Nahori ni Harani. Harani a di velega Loti.

²⁸ Harani phede khuye gufa a tshiya babe waye Tera tigoni gwawe nya mavelego, dhoropani gwa Uri, tigoni gwa Kalidhiya.

²⁹ Abrahama ni Nahori va di dzega vanyamayi. Mwangadzi wa Abrahama a di gu ranwa gupwani khu Sarayi; gasi mwangadzi wa Nahori khu Milika, gyanana gya Harani, ndruye wa Yisika.

³⁰ Aholu Sarayi a diri gyumba, a diri mwalo sanana.

³¹ Khavbo avbo, Tera a di khuga khu Uri, a gu dzega mwanaye Abrahama gumogo ni gitugulwana gyaye Loti, gyanana gya Harani, ni ngadzamwane waye Sarayi, mwangadzi wa Abrahama, va gu hongola tigoni ga Khanani. Aholu na va vbohide dhoropani ga Harani, va di vbaha umo va gu khala.

³² Tera vbanyide kala gutshanganisa tanga nya mazana mavili ni livbandre (205) myaga a gufa dhoropani ga Harani.