Genesi 10 - Bhibhiliya Nya Guage

Mahundzu nya sanana sa Nowa

¹ Esi khu situgulwana sa sanana sa Nowa: Semi, Kami ni Jafeti ni sanana va velegidego hwane nya ndrambi.

² Sanana sa Jafeti khesi: Ghomeri, Magogi, Madhayi, Javani, Tubhali, Meseki ni Tira.

³ Sanana sa Ghomeri khesi: Asikenazi, Rifati ni Togarima.

⁴ Sanana sa Javani khesi: Eliya, Tarisisi, Kitimi ni Dhodhanimi.

⁵ Khavo va velegidego vathu vatshavbo va vbanyago sidwani. Va khade khu mahundzu gukhedza khu guhambanelana nya vababe vawe nya guphele. Lihundzu ni lihundzu li na ni litigo laye ni lidimi laye.

⁶ Sanana sa Kami khesi: Khusi, Mizirayimi, Puti ni Khanani.

⁷ Sanana sa Khusi khesi: Sebha, Havhila, Sabhita, Rama ni Sabhiteka. Sanana sa Rama khu Sebha ni Dhedhani.

⁸ Khusi a di velega gambe Nimerodi, muthu nya tshivba nya guphele nya khongolo a nga manegago tigoni.

⁹ Gambe a diri musoti nya tshivba mahoni gwa Pfhumu Nungungulu. Khidzo kala na muhuno gu nga gu ganedwago gupwani: “Pfhumu Nungungulu a na gu gire musoti nya tshivba kha nga Nimerodi.”

¹⁰ Phede khu gu fumela madhoropa yaya: Bhabheli, Ereki, Akade ni Kaline yatshavbo ya gipandrengulu gya Sinari.

¹¹ Gukhugela umomo a di ladza mufumo waye wu vboha kala Asiriya, a gu vbaha lidhoropa la Ninivha ni Reyobhoti-Iri, Kalahi,

¹² ni Resemi vbakari ni vbakari ga Ninivha ni Kalahi, li nga bani liri lidhoropa nya likhongolo.

¹³ Mizirayimi khuye nyapandre wa vathu va Ludhi, va Anami, va Leyabi ni avo va Nafitu,

¹⁴ ni ava gambe va Patrusi ni va Kasilu, va dugelago umo Vafilisitiya ni Vakafitori.

¹⁵ Khanani khuye babe wa Sidhoni, gyanana gyaye nya matiwula, ni Heti,

¹⁶ ni wa Vajebhuzi, Vaamori, Vagirigazi,

¹⁷ ni Vahevhi, Vaharaki, ni Vasini,

¹⁸ ni Vaharivadhi, Vazemari ni Vahamati. Khavbo avbo, situgulwana nya livelego la Khanani si di swayega khu mitsawa tigoni.

¹⁹ Litigo lawe li di ladza gukhugela Sidhoni kha guhongola Gerari, vbafuvbi ni Gaza, kala Sodhoma ni Ghomora, Adhama, Seboyimi kala Lasa.

²⁰ Khiso esi situgulwana nya livelego la Kami khu dzinyumba, ni malimi ni mahundzu ni mafumbu yawe.

²¹ Semi, koma wa Jafeti, velegide nuye sanana. Khuye babe wa sanana satshavbo sa Hebheri.

²² Sanana sa Semi khu esi: Elamo, Asuri, Arifasadi, Ludhi ni Arami.

²³ Sanana sa Arami khu esi: Uzi, Huli, Geteri ni Masi.

²⁴ Arifasadi khuye babe wa Sela; Sela a velega Hebheri.

²⁵ Hebheri a di velega sanana sivili: Gimwegyo gi di ranwa pwani Pelegi, kholu matshiguni gwaye vathu va di swayega tigoni gwatshavbo. Gimbe gi ranwa pwani Jokitani.

²⁶ Jokitani khu muvelegi wa Alimodhani, wa Selefi, wa Hazari-Mave, wa Jara,

²⁷ wa Adhoramo, wa Uzali, wa Dhikila,

²⁸ wa Obhali, wa Abhimayeli, wa Sabha,

²⁹ wa Ofiri, wa Havila, wa Jobhabhi. Ava vatshavbo sanana sa Jokitani.

³⁰ Va di gu vbanya mayigoni ma ladzidego gukhugela Mesa kala Sefari, sigomoni khu phuvbo ga Khugadambo.

³¹ Esi khiso situgulwana sa Semi khu dzinyumba, ni mahundzu ni mayigo yawe.

³² Khuwo owu sasamedzo nya dzinyumba nya situgulwana sa Nowa, gukhedza khu linyangwa nya lihundzu ni lihundzu, mahundzu yatshavbo nya vathu va mafuni, hwane nya talo nya ndrambi, ma velegidwe ga dzinyumba dzedzi.