Ezira 9 - Bhibhiliya Nya Guage

Nombelo ni gu dzi sodzisa ga Ezira

¹ Na si gu vbede silo sesi, gu dita avbo gwangu manganagana ma ta khayo: “Vathu va na Israyeli, vaphasi nya mhamba ni va na Levhi, kha va dzi hambanisa ni vambe vathu va mambe mayigo; va gu simama gu gira guvivba ga mayigo yoyo ya Vakhanani, ya Vahiti, ya Vaferezi, ya Vajebhuzi, ya Vaamoni, ya va na Mowabhi, ya Vagipiti ni ya Vaamori.

² Kholu va di dzegana ni sanana sawe, avo navo va dzegisa sanana sawe nya sagadzyana si dzegwa khu madzaha yawe, khu kharato gu di dzegwa lifumbu nya vathu va agidego, li patana ni lifumbu nya vathu nya mayigo yoyo, ambari ni manganagana ni madhota nya valuveli, khavo va phedego khavo gu gira gighoho gyogyo.”

³ Na nyi pwide silo nya nga esi, nyi di pferula dzingandzu dzangu ni gifenengelo gyangu nyi vbalula ni ndzudzu wa hungoni gwangu ni giledzu gyangu, nyi khala vbavbatshi na nyi tade khu guswihala.

⁴ Va dita dzi pata gwangu va tombana vatshavbo vale va nga bani va gu ndrendremela khu gu thava magana ya Nungungulu wa Israyeli khu kotani nya gughoha gu nga girwago khavo va widego khu wugumbitunu; khu guralo eni nyi di simama gu khala na nyi swihade, kala gikhati nya phaso wa vbasilambotunu.

⁵ Vbafuvbi ni gu gira phaso nya silambo, nyi di wuga khu guswihalani gwangu, kha nga nyi nga bani nyi pferude dzingandzu dzangu ni gifenengelo gyangu, nyi di khidzima khu dzikhungumudzi dzangu, nyi thawuludza mandza yangu ga Pfhumu Nungungulu wangu.

⁶ Nyi ganela, kheni: “Nungungulu wangu! Nyi womo gugaradzegani ni mudzitshonini, nya gu khusa khovbe yangu nyi khedza uwe, Nungungulu wangu! Kholu sighoho sathu si dandride guvbindra pimo vbatshani nya mihungo yathu, ni milandru yathu yi litide kala ndzadzini.

⁷ Gukhugela matshiguni ya vababe vathu, kala litshigu la muhuno, hi rwade nandru nya wukhongolo, khu kotani nya sighoho sathu, ethu ni vafumeli vathu ni vaphasi vathu, hi ningedwe mandzani ga vafumeli nya va nya mayigo, hi sasedwa khu matshari, hi yiswa wugumbini, hi phangwa, ni gu thedwa dzitshoni dzi nga gu hi fenengedzago dzikhovbeni kha nga hi si wonago muhuno.

⁸ Gasi olu, uwe Pfhumu Nungungulu wathu U yeyedzide wuwadi wago khu gikhatinyana gegi ga mitshaledwa nya gukari yi vbulugidego, U yi ninga wuthavelo wulangani gwago nya guage, kala Nungungulu wathu a wenengedza maho yathu, a hi hefemudza wugumbini gwathu;

⁹ kholu ethu hi dzikhumbi; aholu muwugumbini gwathu Nungungulu wathu kha hi diga gilo; Uye a di thawuludza libogo laye a yeyedza wuwadi waye avbo gwathu, mbeli ga vafumeli va Perisiya, a hi vbulugiside gasi hita vbaha Nyumba ya Nungungulu wathu, hi wusedza marumbi yaye, gasi hi ningwa likhokhola nya gutiye tigoni ga Judha ni Jerusalema.

¹⁰ Gasi olu, uwe Nungungulu wathu, khu hwane nya esi hi na khethu ginani kholu hi pfhurarede milayo yago,

¹¹ eyi U yi rumedego khu maganani nya sithumi sago vaprofeti, khuwe: Litigo muyago ga ilo gasi guya li fumelani, litigo li nyenyezidego khu kotani nya guvivbe ga vathu valo, ni manyala ma tadzidego malangani gwawe gwatshavbo.

¹² Gasi olu, enu mu nga lowodzisini sanana sanu nya sagadzyana ga sanana sawe nya sikhwathana, ni sagadzyana sawe mu nga lowodzini sanana sanu nya sikhwathana, gima mu nga vbweti gurula ni wuwadi avbo gwawe gasi mu kodza gu mana tshivba, nya guhodze thomba nya litigo lolo, mu kodza gu tshiyela sanana sanu kha nga thomba nya gupindruge ga livelego lanu.

¹³ Gasi hwane nya satshavbo sesi si nga hi dugelelago, khu kotani nya mithumo yathu nya guvivbe, gumogo ni nandru wathu nya wukhongolo, ambari khu kharato, uwe Nungungulu wathu, u himbedzede gukhuwe hi mbembiswa khu kotani nya sighoho sathu, bwelo khavbo u hi ningide mitshaledwa nya nga eyi yi vbulugidego.

¹⁴ Ina hi na engedza hi ndraga milayo yago hi thangana gambe wupari ni vathu nya guvivbe ni manyala nya nga aya, gani? Ina u diri mwalo fanelo nya gu hi gorogele u hi mbembisa nyamba tshiya ni moyo nya mitshaledwa yeyi, na?

¹⁵ Ah! Pfhumu Nungungulu wa na Israyeli, uwe U lulamide kholu hi vbulugide kha nga olu hi si wonago; wona nya gukhuwe hi womo mbeli gwago musighohoni gwathu; kholu mwalo ni moyo a yelago gu khala vbafuvbi gwago khu kotani nya esi.”