Ezira 6 - Bhibhiliya Nya Guage

Dhariyo a ngu tivisa nayo nya guvbahedzwe Nyumba ya Nungungulu

¹ Khavbo avbo, mufumeli Dhariyo a di ninga gileletelo nya gukhuye va ya holelela gwadi mabhuku nya matimo ma guromo nyumbani yi vegedzedwego umo thomba ya Bhabhiloni.

² Gu diya manwa tigoni ga Akimeta, nyumbani nya wufumu, yi manegago gipandrengulu gya Medhiya, gu manwa libhuku li lovidwego magana ma ganelago, kharati:

³ Khu mwaga nya guhegule nya gufume ga mufumeli Kiro, uye a di ningela sileletelo sesi, khuye: Khu githawo nyi gu nagyo ni Nyumba ya Nungungulu, yi guromo Jerusalema, yi na vbahedzwe gasi nyumbani momu gu ningedwa miphaso nya guvbiswe ni siseketelo saye si tiye, gulapha gwaye gu na enedze magumararu dzindronga, guanama gwaye gu na enedze magumararu dzindronga;

⁴ yi na manege ni ndzarara tharu nya siwindri nya sikhongolo, ni ndzarara mweyo nya mapulango nya maphya; dzitsapawu nya gulivbe esi, dzi na dugele mugikhwamani gya mufumeli.

⁵ Gambe mikanvu nya ndralama ni parata sa Nyumbani ga Nungungulu, iso si nga phangwago khu Nabhukodhonosori Nyumbani ga Nungungulu yi nga bani yi manega Jerusalema, a si yisa Bhabhiloni, a na si bweledza si wuya wulanga waye, Nyumbani ga Nungungulu yi guromo Jerusalema, avbo si nga bani si romo Nyumbani ga Nungungulu.

⁶ Khu guralo, uwe Tatenayi, mwamangulu wa gipandrengulu gya khisikheyi nya tsongo wa Ewufrate, ni uwe Setari-Bhozinayi gumogo ni vamata vago, va na Afarisaki, mu guromo khu tshatugo nya tsongo, ndreyani avbovbo;

⁷ mu diga thumo nya guvbahwe Nyumba ya Nungungulu wu hongola mbeli; gasi mwamangulu wa Vajudha, gumogo ni Vajudha va vbahe Nyumba ya Nungungulu wulangani gwaye.

⁸ Gambe eni nyi ngu vega sileletelo nya esi gu vbwetegago mu gira gumogo ni madhota nya Vajudha, gasi Nyumba yeyi ya Nungungulu yi kodze gu vbahedzwa nya dzadi, nyari, kheni: Gyuma nya khupo wu livbwago wu ningwago mufumeli ni uwo nya gute khu khisikheyi nya tsongo, gi na livbe vathu vovo, gasi thumo wu si emi.

⁹ Iso si na gu vbwetegago, nya nga dzimombe, dzinvuta, dzihamba nya gugire khidzo miphaselo nya guvbiswe ga Nungungulu wa ndzadzini, ambari nari tirigu, munyu, vbinyu ni mafura, mayelano nidzo vaphasi nya mhamba va Jerusalema va na gu si lombago, va na ningwe khu litshigu ni litshigu, gasi si si hamugegi;

¹⁰ va fela gu ningela ga Nungungulu a guromo ndzadzini miphaselo nya mahema nya gunungele; ni gu va lombelela khu womi wa mufumeli ni wa sanana saye.

¹¹ Eni nyi ngu leletela gambe gukheni: Muthu watshavbo wule a na ndragago sileletelo sesi, wu na sigudwa simbo wa nyumbani gwaye wu ta tsitswa gasi a vbahedwe avbovbo ni ndranga yaye yi na vbindrugedzwa yi khala litala.

¹² Nungungulu, uye a vegidego gu lina laye li khale vbale, a na these vbavbatshi vafumeli vatshavbo ni vathu vatshavbo avo va na gu khusago gyandza gyawe gasi gu vbindrugedza mahungu yaya va ghohetela Nyumba yoyo ya Nungungulu yi guromo Jerusalema. Eni Dhariyo nyi ningede gileletelo gegi, dzi garadzeni khu gu gi yingisa.

Guagiswa ga Nyumba ya Nungungulu

¹³ Khavbo avbo, Tatenayi mwamangulu wa khisikheyi nya tsongo, Setari-Bhozinayi, gumogo ni vamata vaye, va di dzi garadza khu gu gira kharato, kha nga guleletela ga mufumeli Dhariyo.

¹⁴ Madhota nya Vajudha va di simama gu vbahedza Nyumba na va salade, na va gu tiyiswa khu wuprofeti wa muprofeti Agewu ni Zakariya mwamana wa Idho, va vbedza gu yi vbaha kha nga guruma ga Nungungulu wa na Israyeli, gumogo ni guruma ga Kiro, Dhariyo ni Aritasesi vafumeli va Perisiya.

¹⁵ Nyumba yi vbede gu vbahwa khu litshigu nya wuraru, khu ngima nya Adhari khu mwaga nya livbandre na moyo, nya gufume ga Dhariyo.

¹⁶ Va na Israyeli, vaphasi nya mhamba, va na Levhi ni mitshaledwa ya avo va nga bani vari wugumbitunu, va di agisa Nyumba yeyi ya Nungungulu, na va gu nengede.

¹⁷ Va di gira miningelo nya guagise Nyumba yeyi ya Nungungulu khu lizana dzimombe (100), mazana mavili dzihamba (200), mazana mana dzinvuta (400), ni likhumi na dzimbili dziphongo, gasi gu gira phaselo nya gutsetseledwe gighoho gya vatshavbo va na Israyeli, mayelano khu tengo nya mahundzu ya na Israyeli.

¹⁸ Va vega vaphasi nya mhamba khu mitsawa yawe, ni va na Levhi va di vegwa mitsawani yawe, gasi va thuma thumo wa Nungungulu, a guromo Jerusalema, kha nga gu lova ga libhuku la Mosi.

¹⁹ Avo va nga wuyago khu wugumbitunu va di gira buzo nya Phasika khu litshigu nya likhumi na mana nya ngima nya guhegule.

²⁰ Kholu vaphasi nya mhamba ni va na Levhi va di dzi agiside va gira gukhwatshi muthu moyo basi. Vatshavbo va di agide. Va songa nvutana nya Phasika khu vatshavbo va na Israyeli va nga bani vari wugumbitunu, ni vandriyawe, vaphasi nya mhamba, ni avo vamune wurumba.

²¹ Va di hodza kharati Phasika va na Israyeli va nga wuyago khu wugumbitunu gumogo ni vatshavbo va nga dzi hambanisago ni manyala ya vathu va tigoni mule, va dzi tshanganisa gumogo navo, gasi va vbweta Nungungulu wa na Israyeli.

²² Va di gira buzo nya Sibaba nyambana Mela livbandre na mavili matshigu na va tsakide, kholu Pfhumu Nungungulu a di va nengedziside, khulo a nga vbindrugedzisa mapimo ya mufumeli wa Asiriya a tiyisa mandza yawe gasi va phara thumo nya guvbahe Nyumba ya Pfhumu Nungungulu wa na Israyeli.