Ezira 3 - Bhibhiliya Nya Guage

Gu wusedza nya giluvelo ni wukhongeli

¹ Avbo gu nga megago ngima nya livbandre na wuvili, va na Israyeli va diri madhoropani gwawe, vathu va diya tshangana khu monyo moyo Jerusalema.

² A di khuga Jesuwa, mwamana wa Jozadhaki, ni va ndriyaye, vaphasi nya mhamba ni Zorobhabheli, mwamana wa Salatiyeli, gumogo ni vandriyaye, va ya vbaha giluvelo gya Nungungulu wa na Israyeli gasi va kodza gu payela avbo sifuyo nya miphaso nya guvbiswe, kha nga idzo gu lovidwego khidzo umo nya Nayo wa Mosi, muthu wa Nungungulu.

³ Va di emisa giluvelo wulangani gwaye, kholu va diri ni hwanga ni vathu nya mayigo va randredwego khayo, va di ningela avbo miningelo nya guvbiswe ga Pfhumu Nungungulu, vbadzimindrutunu ni vbasilambotunu.

⁴ Va gira Buzo nya Mitshatsha, kha nga idzo gu lovidwego khidzo; va ningela miningelo nya guvbiswe, khu litshigu ni litshigu, khu magirelo yakone ni nayo wakone nya fanelo nya litshigu ni litshigu.

⁵ Khu hwane nya esi, va di ningela gambe ningelo nya guvbiswe nya litshigu ni litshigu iyo nya Gumege nya Ngima, ni iyo nya mibuzo yatshavbo nya guphasele Pfhumu Nungungulu; gumogo gambe ni wevbini a nga bani a ningela khu gudzina gwaye ga Pfhumu Nungungulu khu matsenya.

⁶ Gukhugela litshigu nya guhegule nya ngima nya livbandre na wuvili, gu di phedwa gu ningedwa miphaselo nya guvbiswe ga Pfhumu Nungungulu, aholu gu di bani gu si gu tsitswi siseketelo nya Nyumba ya Nungungulu.

⁷ Khavbo avbo, va di ningela dzitsapawu ga vapili nya misimbo ni vameseri nya guvate siwindri, gumogo gambe ni guhodza, wadwa ni mafura, ga vathu va Sidhoni ni va tigoni ga Tiro gasi va va resele khu Libhanoni khu mataro misimbo nya sedhari yi ta tigoni ga Jope kha nga idzo va nga bani va pwananide khidzo ni Kiro, mufumeli wa Perisiya.

Gutsitswa nya giseketelo nya Nyumba ya Nungungulu

⁸ Khu mwaga nya wuvili nya guwuye gwawe Jerusalema Nyumbani ga Nungungulu, khu ngima nya wuvili, Zorobhabheli, mwamana wa Salatiyeli, Jesuwa, mwamana wa Jozadhaki, ni vambe vandriyawe, vaphasi nya mhamba ni va na Levhi ni vatshavbo avo va nga wuyago Jerusalema khu wugumbitunu, va di emisa va na Levhi, avo va nga bani vari ni magumavili myaga guya mbeli, va rwala thumo nya gugimbidzise mithumo nya guvbahe Nyumba ya Pfhumu Nungungulu.

⁹ Jesuwa gumogo ni vandriyaye ni sanana saye, Kadimiyeli ni sanana saye, va na Judha, va di ema gumogo va hungana gasi gu khedzisela avo va nga bani va thuma thumo nya guvbahe Nyumba ya Nungungulu; va gira navo kharato va na Henadhadhi, ni sanana sawe gumogo ni vandriyawe, va na Levhi.

¹⁰ Avbo vavbahi va nga phela gu thela khokhweni nya giseketelo nya Nyumba ya Nungungulu, vaphasi nya mhamba, va di ema avbovbo na va ambade dzingandzu dzawe, na va pharide mipundru gumogo ni va na Levhi, ni va na Asafi na vari ni sitendre gasi gu dhumisa Pfhumu Nungungulu, va landrisa sileletelo sa Dhavhidhe, mufumeli wa Israyeli.

¹¹ Va di embelela ga Pfhumu Nungungulu ndzimo yeyi, khavo: “Khwadi wuhindzi waye ni Israyeli khwa gu kala gupindruga!” Vatshavbo vathu, va di khusedza malito va gira ligwaha nya likhongolo va kulungela ni gu dhumisa Pfhumu Nungungulu, khu gu tsitswa nya siseketelo nya nyumba yaye.

¹² Aholu vaphasi nya vangi nya mhamba, ni va na Levhi, ni vathangeli nya dzinyumba dza vababe vawe va nga bani va gumbide, ava va wonidego nyumba nya guhegule ya Nungungulu, avbo va nga wonago giseketelo nya nyumba nya yiphya, va di womba dzihuwa va lila; aholu nya vangi va di khusa malito va kulungela khu gutsaka.

¹³ Gu di si tisegi malito nya gutsake nayo nya gulile khu kotani nya ligwaha, kholu vathu va di kulungela khu tshivba va gira ligwaha nya likhongolo ngudzu, avbo malito ma nga bani ma gu pwala khu hwindzo ngudzu.