Ezira 1 - Bhibhiliya Nya Guage

I. GUWUYA KHU WUGUMBITUNU NI GUVBAHEDZWA NYA NYUMBA YA NUNGUNGULU Khwepha wa Kiro

¹ Khu mwaga nya guhegule nya gufume ga Kiro, mufumeli wa Perisiya (gasi gu tadzisega magana ya Pfhumu Nungungulu, ma nga dugago khu kanani ga muprofeti Jeremiya). Pfhumu Nungungulu a di khendzugisa liphuvbo la Kiro, mufumeli wa Perisiya, a huwelela tigoni gwaye gwatshavbo bwelo khavbo a lova khu khwepa a ganela, khuye:

² Kiro, mufumeli wa Perisiya a ngu ganela kharati, khuye: Pfhumu Nungungulu wa Ndzadzini, a nyi ningide mifumo yatshavbo ya mafuni; uye gambe a nyi rwegide rwalo nya gu mu vbahele nyumba Jerusalema, tigoni ga Judha.

³ Ni wevbini a lumbago vathu vaye, na gu vbanya vbakari gwanu, a na gwele gumogo ni vathu vaye a ya tigoni ga Judha aya vbaha Nyumba ya Pfhumu Nungungulu wa Israyeli, Nungungulu a vbanyago Jerusalema.

⁴ Ni vatshavbo vale va vbulugidego nari valuveli malangani yoyo, vathu va tigoni momo va na va phasedzele khu parata, ndralama, sombo, dzimombe ni miningelo nya guningele khu gugola Nyumbani ga Pfhumu Nungungulu, a vbanyago Jerusalema.

⁵ Khavbo avbo, va di khuga vathangeli nya dzinyumba dza Judha, ni dza Bhejami, vaphasi nya mhamba ni Valevhi, gumogo ni vatshavbo va nga khendzugiswago khu liphuvbo la Nungungulu gasi va gwele va ya vbaha Nyumba ya Pfhumu Nungungulu, a guromo Jerusalema.

⁶ Vatshavbo va nga bani vari vaakelane vawe, va di ya va seketela khu gu ya va ninga sombo nya parata, nya ndralama, silo, dzimombe ni sombo nya lisima; vbavbandze nya iso va nga bani va gu ningela khu guhaladza gwawe.

⁷ Mufumeli Kiro a di dusa nuye mikanvu ya Nyumbani ga Pfhumu Nungungulu, iyo yi nga phangwago khu Nabhukodhonosori Jerusalema, aya yi vega nyumbani ga vanungungulu vaye.

⁸ Kiro, mufumeli wa Perisiya, a di dusa sombo sesi, khu mandzani ga Metiredhati, musayisi nya thomba yaye, a si ningela mandzani ga Sesibhazari, linganagana la Judha.

⁹ Tengo nya iso wu diri owu: Magumararu dzimbiya nya ndralama, likhumi mazana (1.000) dzimbiya nya parata, magumavili na livbandre na mina migala,

¹⁰ magumararu simbiyana nya ndralama, mazana mana ni likhumi (410) simbiyana nya parata nya limbe lifumbu, ni likhumi mazana (1.000) nya simbe sombo.

¹¹ Mikanvu yatshavbo nya ndralama, niyo nya parata yi diri livbandre magumi mazana ni mazana mana (5.400); satshavbo sombo sesi si dzegidwe khu Sesibhazari, a wuya naso gikhati avo va nga bani vari wugumbitunu va khugidego khu Bhabhiloni va wuya Jerusalema.