Ezekiyeli 9 - Bhibhiliya Nya Guage

Tsayiso wa Jerusalema

¹ Khu guralo, nyi di mupwa na gu ganela dzindzeveni gwangu khu lito nya gukhugege, khuye: “Resani avba vawoneleli nya lidhoropa, moyo ni moyo nari ni litshari laye mandzani.”

² Nyi di wona livbandre na moyo vama na va guta khu mwanya nya wukhongolo, moyo ni moyo nari ni litshari nya gusonge mandzani. Va diri ni mwama moyo a nga bani a ambade dzingandzu nya seda na khwetedzide libhandrini gwaye gilo nya gulove. Va di bela vaya khala khu phuvbo nya giluvelo nya sugu.

³ Wudhumo wa Nungungulu wa Israyeli wu di khuga khu vbatshani nya likherubhimi, avbo li nga bani liromo, li hidzimela vbanyangwatunu nya Nyumba ya Nungungulu. Pfhumu Nungungulu a di rana mwama a nga bani a ambade dzingandzu nya seda nari ni gilo nya gulove giwununi gwaye.

⁴ A di mu embela, khuye: “Gimbila-gimbila dhoropani ga Jerusalema, u vega gifungo giwomboni ga vale va lilago ni gudilela khu kotani nya guvivbe gwatshavbo gu girwago umomo.”

⁵ Na nyi nga gu yingisa, uye a di embela vambe, khuye: “Mu landreni mu songetela vathu dhoropani gwatshavbo, va songeni nyamba va pwela gisiro mwendro gu va tsetsa.

⁶ Songetelani sikhosane, madzaha ni dzimbiri, vanyamayi ni sanana. Aholu mu nga khuhi ni moyo nya vale va gu na ni gifungo. Phelani khu Wulangani gwangu nya Guage.” Khavbo avbo, avo va di phela khu vathangeli va nga bani vari mbeli nya Nyumba ya Nungungulu.

⁷ Uye a di va embela, khuye: “Nyenyezisani Nyumba ya Nungungulu ni gu tadza khu sirumbi makupakupa. Mu ngu dzi kodza gu hongola!” Avo va di duga, va phela gusongetela dhoropani gwatshavbo.

⁸ Gikhati va nga bani va gu songetela vathu, eni nyi di tshala nyenga. Nyi thega khu khovbe vbavbatshi, nyi lila, nyi ganela, kheni: “Uwe! Mune Pfhumu Nungungulu! Ina wa guvbweta gu guhula likhulo lago vbatshani ga Jerusalema, u vbedzisa mitshaledwa ya Israyeli, gani?”

⁹ Uye a di nyi hakha, khuye: “Guvivba ga va na Israyeli ni ga va na Judha, gukhongolo ngudzu; litigo li tade khu novba wu vbaladzidwego, ni lidhoropa li tade khu wudambane. Avo va gu ganela, khavo: Pfhumu Nungungulu dugide tigoni momu; kha hi woni.

¹⁰ Gasi khu gyangu gipandre, kha nyi na va pwela gisiro, gambe kha nyi na va tsetsa, aholu nyi na thesa mihungoni gwawe gukhedza khu esi va giridego.”

¹¹ Khu guralo, mwama a nga bani a ambade dzingandzu nya seda, ni gilo nya gulove giwununi gwaye, a di wuya a resa iso si giregidego, a ta ganela, khuye: “Nyi giride satshavbo iso u nyi leletedego.”