Ezekiyeli 8 - Bhibhiliya Nya Guage

Gunyenyeziswa nya Nyumba ya Nungungulu

¹ Khu litshigu nya livbandre, nya ngima nya livbandre na moyo, nya mwaga nya livbandre na moyo, nyi di khade ndrangani gwangu, gumogo ni madhota ya na Judha, gyandza gya Mune, Pfhumu Nungungulu gi dita gwangu.

² Nyi di wona gifananiso nya gufanane ni nilo. Gukhugela giwununi gwaye kala vbavbatshi, uye a di fanana ni nilo; gukhugela giwununi kala vbatshani a di fanana ni simbi nya gukhedzige.

³ Uye a di thawuludza gilo nya gufanane ni libogo a nyi mola khu ndzudzu. Liphuvbo li di nyi vega vbakari ni vbakari nya mafu ni ndzadzini, khu siwoniso sa Nungungulu, ilo li di nyi yisa Jerusalema, vbanyangwatunu nya mwanya wa Wuronga nya laba la ndrani, avbo gu nga bani gu vegidwe gifananiso gya nungungulu nya malipha, gi nga girisago wufu Nungungulu.

⁴ Vbale, wu diromo wudhumo wa Nungungulu wa Israyeli, kha nga uwo nyi wu wonisidwego panini.

⁵ Khavbo avbo, a di nyi embela, khuye: “Mwamana wa muthu, khusa maho u khedza phuvbo ga Wuronga.” Nyi di khedza Wuronga, nyi di wona vbafuvbi ni mwanya nya giluvelo, gifananiso gya nungungulu nya malipha, gi wusago wufu wa Nungungulu.

⁶ Uye a di nyi embela, khuye: “Mwamana wa muthu, u ngu si wona esi va girago, gani? Mithumo nya gunyenyeze ya na Israyeli, silo si na gu nyi dzegago si nyi yisa hwindzo ni Wulanga wangu nya Guage, gani? Aholu uwe u na wona silo nya gunyenyeze ngudzu guvbindra esi.”

⁷ Khu gulandrela, a di nyi dzega a nyi yisa vbamwanyatunu nya likupakupa. Nyi di khedza nyi wona gihogo vbandzaritunu.

⁸ Uye a di nyi embela, khuye: “Mwamana wa muthu, olu pola liphala avbovbo nya libhiyo lolo.” Gikhati nyi podego libhiyo, nyi di tugula mwanya.

⁹ Khavbo avbo, a di nyi embela, khuye: “Bela u wone silo nya gunyenyeze ni guvivba va girago avba.”

¹⁰ Eni nyi di bela, nyi wona sivangwa satshavbo nya gukhwirire khu lididi, ni sirengo nya gunyenyeze, ni sifananiso nya vanungungulu sa va na Israyeli, na si lovetedwe dzindzarini khu maphuvbo yatshavbo.

¹¹ Mbeli gwawe, gu diromo livbandre na mavili magumi (70) madhota ya na Israyeli, gumogo ni Jazaniya, mwamana wa Safani, a diri vbakari gwawe. Khu gyomboni nya guvbisele umo libani, gi nga bani giri mandzani ga moyo ni moyo, gu di gu gwela lipfhi nya likhongolo nya mahema nya gunungele.

¹² Pfhumu Nungungulu a di nyi embela, khuye: “Mwamana wa muthu, u si wone iso madhota ya Israyeli ma girago mugidemani, moyo ni moyo na guromo nyumbani gwaye nya gulovetedwe khu sifananiso, gani? Na va gu ganela, khavo: Pfhumu Nungungulu kha hi woni; Uye dugide tigoni momu.”

¹³ Uye a di engedza gambe a nyi embela, khuye: “U nga na gu wona simbe silo nya manyala guvbindra esi va girago.”

¹⁴ Khavbo avbo, a di nyi dzega gambe a nyi yisa mwanyatunu nya Nyumba ya Pfhumu Nungungulu, khu phuvbo ga Wuronga. Iyoyo gu diromo vanyamayi na va khade, na va gulilela Tamuzi, nungungulu wawe.

¹⁵ Uye a di nyi wudzisa, khuye: “Mwamana wa muthu, u ngu si wona isoso, gani? U na wona gambe silo nya manyala guvbindra esi.”

¹⁶ Khu guralo, uye a di nyi dzega a gu nyi bedza ndrani nya likupakupa la Nyumbani ga Pfhumu Nungungulu; vbale, vbamwanyatunu nya Nyumba ya Pfhumu Nungungulu, vbakari ni vbakari nya mwanya ni giluvelo, gu diromo gipimo nya magumavili na livbandre (25) vama, na va pfhurarede Nyumba ya Pfhumu Nungungulu, dzikhovbe dzawe va khedza Khugadambo; avo va di gu khozela lidambo.

¹⁷ Khavbo avbo, uye a di nyi embela, khuye: “Mwamana wa muthu, u si wone isoso, gani? Ina silo nya nga isoso, si vbevbugide ga va na Judha gu gira silo nya manyala nya nga esi, gani? Khandri va gu nyi gorosa? Wona! Avo va gu hidzimisa litamo vbafuvbi ni dzithonvu dzawe!

¹⁸ Khu guralo, nyi na va lamula khu likhulo; kha nyi na va pwela gisiro, gambe kha nyi na va tsetsa. Ambari va gu womba huwa dzindzeveni gwangu, kha nyi na va yingisa.”