Ezekiyeli 48 - Bhibhiliya Nya Guage

Mivbingano nya livbandre na mavili mahundzu

¹ Aya khu mahundzu ya Israyeli, gukhedza khu malina yawe: “Gukhugela mahegiso nya vbingano wa Wuronga, wu landra khu ndzila ya Hetilomi, gu bedwa khu phuvbo ga Hamati, kala Hazeri-Enomi mivbinganoni ya Dhamasiko khu phuvbo ga Wuronga ni phuvbo ga Hamati, khavbo Dhani a na manago giavelo gyaye, gukhugela vbinganoni wa Khugadambo kala Muhwadambo.”

² Aseri, a na mana giavelo, gi na khugela vbinganoni nya litigo la Dhani, khu phuvbo ga Khugadambo, kala Muhwadambo.

³ Nafitali giavelo gyaye gi na khugela vbinganoni wa Aseri, khu phuvbo ga Khugadambo kala Muhwadambo.

⁴ Manasi, giavelo gyaye, gi na khugela vbinganoni ni va na Nafitali, gukhugela phuvbo ga Khugadambo kala Muhwadambo.

⁵ Efrayimi, giavelo gyaye gi na khugela vbinganoni ni Manasi, khu phuvbo ga Khugadambo kala Muhwadambo.

⁶ Rubheni, a na mana giavelo, gukhugela vbinganoni ni va na Efrayimi, khu phuvbo ga Khugadambo kala Muhwadambo.

⁷ Judha, giavelo gyaye gi na khugela vbinganoni ni va na Rubheni, khu phuvbo ga Khugadambo kala Muhwadambo.

⁸ Vbingano ni va na Judha, gukhugela phuvbo ga Khugadambo kala Muhwadambo, gipandre gegi gi na bani giri wulanga nya guage, mu na gi vega phuvbo. Mu na gu hambanisa, khu magumavili na livbandre magumi mazana (25.000) mikono, gulapha ni guanama, wu fanana ni sipandre nya thomba nya mahundzu, gukhugela Khugadambo kala Muhwadambo; nyumba nya guage yi na khala vbakari gwaye.

⁹ Gipandre mu na vegelago Pfhumu Nungungulu, gi na bani giri gya magumavili na livbandre magumi mazana (25.000) mikono gulapha, ni likhumi magumi mazana (10.000) mikono guanama.

¹⁰ Egi gi na bani giri gipandre nya guage nya gulumbe vaphasi nya mhamba, khu phuvbo ga Wuronga gi na bani giri ni magumavili na livbandre magumi mazana (25.000) mikono gulapha; khu phuvbo ga Muhwadambo gi na bani giri ni likhumi magumi mazana (10.000) guanama; khu phuvbo ga Khugadambo, likhumi magumi mazana guanama; khu phuvbo ga Marandzi magumavili na livbandre magumi mazana (5.000) mikono gulapha. Khu vbakari ni vbakari ga kone, gu na manega wulanga nya miphaso ya Pfhumu Nungungulu.

¹¹ Gi na lumba vaphasi nya mhamba va agisedwego, a gu sanana sa Sadhoki, va tumbegidego gu nyi thumela, va ngamba ndreya ndzilani gwangu kha nga idzo va giridego va na Levhi, gikhati va na Israyeli va ndreyidego ndzilani gwangu.

¹² Gu na bani guri gihiwa nya lisima vbakari gwawe, a gu gipandre nya gukatege, wulanga wu agidego ngudzu, gu na girago vbingano ni gipandre gya va na Levhi.

Mivbingano ya vaphasi nya mhamba ni va na Levhi

¹³ Ndrani nya gipandre gi lumbago vaphasi nya mhamba, va na Levhi, va na mana gipandre gi gu ni magumavili na livbandre magumi mazana (25.000) mikono gulapha, ni likhumi magumi mazana (10.000) mikono guanama; gulapha gwatshavbo gu na bani guri magumavili na livbandre magumi mazana (25.000), guanama likhumi magumi mazana (10.000) mikono.

¹⁴ Ga gipandre gegi, kha gu vbwetegi gi rengiswa, mwendro guturukarwi khu gimbe gilo, ambari mihandro nya guhegule nya mafu kha gu vbwetegi gu mu yi rumela ga mambe mayigo, kholu si phasedwe Pfhumu Nungungulu.

Mivbingano nya lidhoropa

¹⁵ Aholu iyo nya livbandre magumi mazana (5000) mikono yi tshadego nya guaname ga magumavili na livbandre magumi mazana (25.000), yi na thumiswa mithumo yi lumbago lidhoropa, guvbaha dzinyumba ni gu bhiywa; lidhoropa li na khala vbakari ni vbakari.

¹⁶ Yi na bani yiri eyi mipimo yaye: Phuvbo ga Wuronga, mazana mana magumi ni livbandre mazana (4500) mikono; phuvbo ga Marandzi, mazana mana magumi ni livbandre mazana (4.500) mikono; phuvbo ga Khugadambo, mazana mana magumi ni livbandre mazana (4500) mikono; phuvbo ga Muhwadambo, mazana mana magumi ni livbandre mazana (4.500) mikono.

¹⁷ Dzibambe nya lidhoropa gu na bani guri, mazana mavili ni livbandre magumi (250) mikono, phuvbo ga Wuronga; mazana mavili ni livbandre magumi (250) mikono, phuvbo ga Marandzi; mazana mavili ni livbandre magumi (250) mikono, phuvbo ga Khugadambo; mazana mavili ni livbandre magumi (250) mikono, phuvbo ga Muhwadambo, mazana mavili ni livbandre magumi (250) mikono.

¹⁸ Gasi khu gipandre gi tshadego nya gulaphe, gulandrisela wulanga nya guage, gi na bani giri nya likhumi magumi mazana (10.000) mikono khu phuvbo ga Khugadambo; likhumi magumi mazana (10.000) mikono, khu phuvbo ga Muhwadambo; mihandro yaye yi na lumba gu hodzisa vale va thumelago dhoropani.

¹⁹ Va na lima umo vathumegeli va dhoropani, vatago khu ga mahundzu yatshavbo ya Israyeli.

²⁰ Gipandre gyatshavbo, gupata ni lidhoropa gi na bani giri gya magumavili na livbandre magumi mazana (25.000) mikono khu maphuvbo yatshavbo. Egi giningwa nya guage mu yelago gu gi vegedza.

Mivbingano ya mufumeli

²¹ Malanga ma na tshalago, nya eli ni limbe liphuvbo nya gipandre nya guage ni thomba ya dhoropani, gi na lumba mufumeli. Khu guralo, igyo gi na ladza guya Khugadambo gukhugela khavbo nya magumavili na livbandre magumi mazana (25.000) mikono, khavbo nya gipandre nya guage kala vbinganoni wa Khugadambo, ni magumavili na livbandre magumi mazana (25.000) mikono guya phuvbo ga Muhwadambo. Sipandre sesi sa sivili nya gufanane ni sipandre nya thomba nya mahundzu, si na lumba mufumeli; gipandre nya gukatege gumogo ni wulanga nya guage wa Nyumbani ga Nungungulu si na khala vbakari ni vbakari.

²² Khu guralo, wulanga wu lumbago mufumeli wu na khala khu vbakari nya gipandre gya va na Levhi ni gipandre nya lidhoropa, gi gira vbingano ni gipandre gya va na Judha, khu phuvbo ga Wuronga, ni gipandre gya va na Bhejami, khu phuvbo ga Marandzi.

²³ “Gasi khu mahundzu ma na tshalago, Va na Bhejami, va na mana giavelo; gi khugelago phuvbo ga Khugadambo kala Muhwadambo.”

²⁴ “Vbingano ni va na Bhejami, gukhugela phuvbo ga Khugadambo kala Muhwadambo, gu na lumba va na Simiyoni.”

²⁵ “Vbingano ni va na Simiyoni, gukhugela phuvbo ga Khugadambo kala Muhwadambo, gu na lumba va na Isakari.”

²⁶ “Vbingano ni va na Isakari, gukhugela phuvbo ga Khugadambo kala Muhwadambo, gu na lumba va na Zebhuloni.”

²⁷ “Vbingano ni va na Zebhuloni, gukhugela phuvbo ga Khugadambo kala Muhwadambo, gu na lumba va na Gadhi.”

²⁸ “Vbingano ni litigo la Gadhi, khu phuvbo ga Marandzi, vbingano wu na khugela Tamari, kala ga mati ya Meribha-Kadhesi, gulandrisela gitsongwana gya Egipito kala ga yiphwa nya Yikhongolo.”

²⁹ “Eli khilo litigo mu na gu kavedzelago kha nga thomba ga mahundzu ya Israyeli; si na bani ari isoso sipandre sawe; a ngu ganela Mune Pfhumu Nungungulu.”

Dzinyangwa nya lidhoropa

³⁰ Dzinyangwa nya guduge khidzo dhoropani khedzi: Khu phuvbo ga Wuronga yi na ni pimo nya mazana mana magumi ni livbandre mazana (4.500) mikono gulapha,

³¹ dzinyangwa nya lidhoropa dzi na hakha malina ya mafumbo mararu ya Israyeli: Dzinyangwa dzitharu dza phuvbo ga Wuronga, dzi na bani dziri lidimba la na Rubheni, ni va na Judha, ni ya na Levhi.

³² Khu phuvbo ga Khugadambo, gi gu na ni mazana mana magumi ni livbandre mazana (4.500) mikono, gu na ni myanya miraru: A gu mwanya wa Josefa, wa Bhejami ni wa Dhani;

³³ khu phuvbo ga Marandzi, gi na ni mazana mana magumi ni livbandre mazana (4.500) mikono, gu na ni myanya miraru: A gu mwanya wa Simiyoni, wa Isakari ni wa Zebhuloni;

³⁴ khu phuvbo ga Muhwadambo, gu ni mazana mana magumi ni livbandre mazana (4.500) mikono, gu na ni myanya miraru: A gu mwanya wa Gadhi, wa Aseri ni wa Nafitali.

³⁵ Pfhuka wa maphuvbo yatshavbo wu diri wa likhumi na livbandre na mararu magumi mazana (18.000); lina nya lidhoropa, gukhugela litshigu lile li na pwani: Pfhumu Nungungulu womo vbale.