Ezekiyeli 46 - Bhibhiliya Nya Guage

Dzisabhadho ni Mibuzo nya Gumege nya Ngima

¹ Mune Pfhumu Nungungulu, a ngu ganela kharati, khuye: “Lidimba nya likupakupa nya mwanya wa ndrani, wu khedzidego phuvbo ga Khugadambo, li na segwa gipimo nya livbandre na limwedo matshigu, a gu matshigu nya thumo; aholu khu litshigu nya Sabhadho ni litshigu nya Buzo nya Gumege Ngima, li na tudwe.

² Muthangeli, a guta khu likupakupani la vbavbandze a na bela khu hubhe nya nyangwa ya vbavbandze, a khala vbafuvbi ni hasimo; vaphasi nya mhamba va na dongisela miphaso yawe nya guvbiswe ni dzimhamba dzawe nya tshanganiso, uye a na noga vbanvunvuritunu nya lidimba a duga; aholu lidimba kha li na segwa kala vbasilambotunu.

³ Matshigu nya dzisabhadho nayo nya gumege ngima, vathu va tigoni va na khidzima vbamwanyatunu nya lidimba la limwedo, va khozela Pfhumu Nungungulu.

⁴ Phaso nya guvbiswe a na ningelago mufumeli ga Pfhumu Nungungulu, khu litshigu nya Sabhadho, gu vbwetega na wuri wa livbandre na mweyo dzinvuta ni hamba mweyo, satshavbo nyambana libawa.

⁵ Ningelo nya guhodze a na bani ari dhomu moyo khu hamba ni hamba; ga nvutana ni nvutana, ningelo nya guhodze a na bani ari idzo a kodzago khidzo gu ningela; uwo nya mafura, deva moyo khu dhomu ni dhomu.

⁶ Aholu, khu litshigu nya Buzo nya Gumege Ngima, uye a na ningela lirole limwedo, ni livbandre na gimwegyo sinvutana ni hamba mweyo; satshavbo nyambana libawa.

⁷ Uye a na dongisela kha nga ningelo nya guhodze dhomu moyo, khu gimombyana ni gimombyana ni efa moyo khu hamba ni hamba, aholu, khu sinvutana, a na ningela gukhedza khidzo a dzi kodzago khidzo; deva moyo nya mafura khu dhomu ni dhomu.

⁸ Gikhati mufumeli a na belago, a na bela khu likupakupa nya mwanya, a duga gambe khu ndzila ya mweyo.”

Milayo mayelano khu miningelo

⁹ “Avbo vathu va tigoni va natago mbeli ga Pfhumu Nungungulu, khu matshigu nya mibuzo yi vegisidwego, watshavbo wule a na belago khu mwanya wa Wuronga gasi guta khozela, a na duge khu mwanya wa Marandzi, wule a na belago khu mwanya wa Marandzi a na duge khu mwanya wa Wuronga; mwalo ni moyo a yelago gu duga khu mwanya a bedego khuwo, vatshavbo va na duge khu mwanya wa mbeli.

¹⁰ Mufumeli a na khale khu vbakari gwawe, a bela gikhati va belago; a duga gikhati va dugago.”

¹¹ “Matshigu nya mibuzo nya yikhongolo, gupata ni mibuzo yi vegisidwego, ningelo nya wuguvbi a na bani ari dhomu khu gimombyana ni gimombyana ni dhomu moyo khu hamba ni hamba; aholu khu sinvutana, muthu a na ningela khidzo a na gu dzi kodzago khidzo; ningelo nya mafura, deva moyo khu dhomu ni dhomu.

¹² Gikhati mufumeli a na dzi girelago phaso nya guningele khu gudzina gwaye ga Pfhumu Nungungulu, nya guvbiswe mwendro dzimhamba nya tshanganiso, a na tuledwe lidimba li khedzidego Khugadambo a bela khilo. Uye a na gira phaso waye nya guvbiswe ni dzimhamba dzaye nya tshanganiso, kha nga idzo a talago gu gira khidzo khu litshigu nya Sabhadho. A na duga, hwane nya gu bani na dugide, lidimba li na segwe khu sikwinyaro.”

¹³ “Khu litshigu ni litshigu, mu na dongisela nvutana mweyo nyamba hasa, nya mwaga moyo, gasi gu girela phaso nya guvbiswe Pfhumu Nungungulu, gugya ni gugya u na wu dongisela.

¹⁴ Enu nenu, mu nata gumogo naye, dzimindru dzatshavbo, mu resa ningelo nya wuguvbi ga Pfhumu Nungungulu, gitundru nya livbandre na moyo midhomu, ni mafura, gipandre nya wuraru nya deva, gasi gupfanga ni wuguvbi nya gudadatwe. Oyu khuye nayo wu na simamago kala gupindruga.

¹⁵ Gu na dongisedwa kharati nvutana ni ningelo nya wuguvbi, gumogo ni mafura, si na reswa gugya ni gugya, gasi gu gira phaso nya guvbiswe wu na ningedwago gikhati gyatshavbo.”

¹⁶ Mune Pfhumu Nungungulu, a ngu ganela kharati, khuye: “Gikhati mufumeli a ningelago gihiwa nya thomba yaye ga mowo nya sanana saye, gihiwa gegi, gi na lumba ni ga situgulwana saye gambe; si na khala sihodza thomba ya vavelegi vawe.

¹⁷ Aholu, a gu ningela gihiwa nya thomba yaye ga moyo nya sithumi saye, yi na lumba uye kala mwaga nya gutshulege gwaye; khavbo avbo, gihiwa gi na bwelela ga mufumeli, kholu sanana saye basi khiso si lumbwago khigyo.

¹⁸ Mufumeli mwalo fanelo nya gudzege dzithomba dza vathu, kha yedwi khu gu va tutumisa dzithombani gwawe; thomba yawe va na tshiyela sanana sawe, gasi vathu vangu, ni moyo a si duswi ga thomba yaye.”

¹⁹ Khu hwane nya ugo, mwama a di nyi dzega khu mwanya wu nga bani wu romo khu phuvbo nya lidimba, kala makhuvini nya guage, ma nga bani ma khedzide Wuronga, ma lumbago vaphasi nya mhamba, a di nyi nonedza wulanga phuvbo ga Muhwadambo.

²⁰ A di nyi embela, khuye: “Owu khu wulanga vaphasi nya mhamba va na phulago umo miningelo nya gutsetseledwe milandru ni miningelo nya guhandze sighoho ni avbo va na phulago miningelo nya guhodze, gasi va wu resa ga likupakupa la vbavbandze va agisa vathu.”

²¹ Khavbo avbo, a di nyi dzega a nyi yisa vbavbandze, khu likupakupani la vbavbandze, a nyi vbindrisa khu dzikhonani dza dzina nya likupakupa; nyi di wona gukheni ga khona ni khona nya likupakupa gu diri ni limbe likupakupa.

²² Ga dzikhona dza dzina nya likupakupa, gu diromo makupakupa nya madugwane, nya magumana (40) mikono gulapha ni magumararu (30) mikono guanama; dzikhona dzatshavbo dzedzi nya dzina, dzi diri ni pimo nya gufanane.

²³ Gu diri ni libhiyo maphuvbo yatshavbo ya mana nya makupakupa, gambe, gu diromo malanga nya guphulele avbo vbafuvbi ni maphuvbo yatshavbo nya mabhiyo.

²⁴ Uye a di nyi embela, khuye: “Esi khiso sitanga sa vaphuli, umo vathumegeli va Nyumbani ga Nungungulu va na phulelago umo miphaso ya vathu.”