Ezekiyeli 43 - Bhibhiliya Nya Guage

Wudhumo wa Pfhumu Nungungulu wu ngu tadza Nyumba ya Nungungulu

¹ Khavbo avbo, mwama a di nyi dzega a nyi yisa ga mwanya wu nga bani wu khedza Khugadambo.

² Nyi di wona wudhumo wa Nungungulu wa Israyeli, wu nga bani wu guta khu Khugadambo. Lito laye li di gu fanana ni gudzuma nya mavimbi nya mati, ni mafu ma di ngangamela khu kotani nya wudhumo waye.

³ Makhalelo nya giwoniso gegi nyi gi wonidego, gi di gu fanana ni giwoniso nyi gi wonidego gikhati nyi ngata khungumula lidhoropa; si fanana ni siwoniso nyi si wonidego vbafuvbi ni tsongo wa Kebhari; nyi di thega vbavbatshi khu khovbe.

⁴ Wudhumo wa Pfhumu Nungungulu wu di bela Nyumbani ga Nungungulu khu mwanya wu nga bani wu khedzide phuvbo ga Khugadambo.

⁵ Khavbo avbo, Liphuvbo li di nyi khusa, li nyi emisa, li nyi yisa ga likupakupa la ndrani; nyi di wona gukheni Nyumbani gwa Nungungulu gu di tade khu wudhumo wa Pfhumu Nungungulu.

⁶ Khavbo avbo, nyi dipwa lito la muthu nyo kari na li gu ganela ni eni khu ndrani nya Nyumba ya Nungungulu Pfhumu Nungungulu a di nyi embela, khuye:

⁷ “Mwamana wa muthu, owu khuwo wulanga nya gikhalo gyangu nya wufumu, ni wulanga wu gandredzedwago khu migondro yangu, avbo nyi na vbanyago vbakari ga sanana sa na Israyeli kala gupindruga; va na Israyeli gima kha va na nyenyezisa gambe lina langu nya gukatege, avo, mwendro vafumeli vawe, khu kotani nya wubhayi wawe; ni gu vega umo sirumbi sa vafumeli vawe.

⁸ Gikhati va vegidego nvunvuri wawe vbafuvbi ni nvunvuri wangu, ni mihasimo yawe vbafuvbi ni mihasimo yangu, gu di manega ndzari yi hambanisa eni ni avo, khu gu gira kharato va nyenyeziside lina langu nya guage khu kotani nya guvivbe gwawe va nga bani va gu gira; khu guralo, eni nyi di va mbembisa khu likhulo langu.

⁹ Olu, va na ndreyise wubhayi wawe wuya hwindzo ni eni ni sifananiso nyambana hefemulo ni sirumbi sa vafumeli vawe, eni nyi na vbanya vbakari gwawe kala gupindruga.

¹⁰ Khu guralo, uwe mwamana wa muthu, nonedza va na Israyeli Nyumba yeyi ya Nungungulu, gasi va kodze gu khala dzitshoni khu sighoho sawe; yi na khale giwonelo avbo gwawe.

¹¹ Va gu khala dzitshoni khu satshavbo va giridego, va embele khu giwumbelo nya nyumba yeyi ni magirelo yaye, myanya yaye nya guduge, niyo nya gubele ni makhalelo yaye yatshavbo ni mipimo yaye yatshavbo; sileletelo saye satshavbo, ni satshavbo si guromo umo, ni milayo yaye yatshavbo yi yelago gu thumiswa; lova esi na va gu si wona, gasi va kodze gu mati makhalelo yaye, ni sileletelo saye satshavbo va kodze gu si landrisa.

¹² Nayo nya Nyumba ya Nungungulu, khowu: Dzitshokhani gwatshavbo nya gigomo, dzibambe gwaye gwatshavbo, gu na bani gu agide ngudzu. Oyu khu nayo nya Nyumba ya Nungungulu.

Giluvelo ni mipimo yaye

¹³ Eyi khu mipimo nya giluvelo, khu mipimo nya mikono, khu kono nya guhandzegwe nyala dzinz gu di pimwa giseketelo kono moyo, gulapha guya vbatshani kono moyo ni nyala dzina dzibambe gwaye khu maphuvbo yatshavbo, dzinyala dzina; ogu khu gulapha nya giluvelo.

¹⁴ Gukhugela vbagiseketelotunu kala vbandzararatunu nya guduge vbavbandze, giluvelo gi diri ni mikono mivili, guanama kono moyo; gukhugela vbandzararatunu nya yidugwana kala iyo nya yikhongolo, gi diri ni mikono mina, guanama kono moyo.

¹⁵ Gikho nya giluvelo, gi diri ni mikono mina gukhugega, khu vbagikhotunu guya vbatshani, na giri ni dzikho dzina.

¹⁶ Gikho, giri ni likhumi na mivili mikono gulapha, ni likhumi na mivili mikono guanama, nya gufanane maphuvbo yatshavbo.

¹⁷ Ndzarara nya yikhongolo niyo, yi diri ni likhumi na mina mikono gulapha ni likhumi na mina mikono guanama, ga maphuvbo yaye ya mana; dzibambe nya maphuvbo yaye yatshavbo, dzi diri ni ndreya nya kono; ni giseketelo nya kono moyo khu maphuvbo yatshavbo nya giluvbo; sigandro saye si di khedza phuvbo ga Khugadambo.

Guagiswa nya giluvelo

¹⁸ Pfhumu Nungungulu a di nyi embela, khuye: “Mwamana wa muthu, Mune Pfhumu Nungungulu, a ngu ganela kharati, khuye: Esi khiso sileletelo nya giluvelo si yelago gu landriswa matshiguni nya guye ningela miphaso nya guvbiswe ni gu gi mitegedzela novba.

¹⁹ Vaphasi nya mhamba va na Levi, nya linyumba la Sadhoki, khavo va dzi kodzago gu hidzimela avbo gwangu, gasi gu nyi thumela, a ngu ganela Mune Pfhumu Nungungulu. U na ningela gwawe gimombyana gasi gu gira phaso nya guhandze sighoho.

²⁰ U na dzega novba wudugwana u wu thela vbatshani nya dzikeho dza dzina nya giluvelo, ni dzikhonani dza dzina nya gigandredzelo ni dzibambe khu maphuvbo yatshavbo; kharati u na agisa giluvelo, u gi girela giagiso nya ditshedzo.

²¹ Khavbo avbo, u na dzega gimombyana nya phaso nya guhandze sighoho, igyo gi na vbiswago wulangani wu vegisidwego Nyumbani ga Nungungulu, vbavbandze nya Wulanga nya Guage.

²² Khu litshigu nya wuvili, u na ningela nyamabhongwe nyambana libawa, gasi gu gira phaso nya guhandze sighoho; giluvelo mu na gi agisa kha nga idzo mu nga gi agisago khidzo khu gimombyana.

²³ Nu vbedzide gu gi agisa, u na ningela gimombyana ni hamba nya gu si duse khu tshambini gwago, satshavbo nyambana mavalavala.

²⁴ U na si ningela mbeli ga Pfhumu Nungungulu, vaphasi nya mhamba va ngu yela guthela munyu vbatshani nya iso, si paywa si khala phaso nya guvbiswe ga Pfhumu Nungungulu.

²⁵ Gipimo nya livbandre na mavili matshigu, litshigu ni litshigu u na dongisela nyamabhongwe moyo gasi gu gira phaso nya guhandze sighoho; va na dongisela gambe gimombyana gya tshambini ni ginvutana nyambana libawa.

²⁶ Gipimo nya livbandre na mavili matshigu, vaphasi nya mhamba, va na agisa giluvelo ni gu gi dongisela thumo waye; va na gi agisa kharato.

²⁷ Na va vbedzide gu landrisa matshigu yaya, ga litshigu nya livbandre na mararu guya mbeli, vaphasi nya mhamba va na dongisela miphaso yanu nya guvbiswe ni miphaso nya tshanganiso vbagiluvelotunu; khavbo avbo, eni nyi na mi hakhani; a ngu ganela Mune Pfhumu Nungungulu.”