Ezekiyeli 41 - Bhibhiliya Nya GuageGuvbahedzwa nya Nyumba ya Nungungulu ( 1 Dzipfhumu 6:2-17 ) 1 Khu hwane, uye a di nyi dzega a nyi yisa Nyumbani gwa Nungungulu, a di pima madingo, guanama ma diri ni livbandre na moyo mikono khu phuvbo eno ni eno, a nga bani ari guanama nya tshatsha. 2 Mwanya, wu diri ni likhumi mikono guanama; dzibambe nya mwanya, gu diri ni livbandre mikono khu phuvbo eno ni eno; a di pima gambe guya vbatshani nya mwanya; gu diri ni magumana mikono, gasi guanama gu diri ni magumavili mikono. 3 A di bela a pima lidingo la vbamwanyatunu li diri ni mikono mivili; pimo nya mwanya guya vbatshani wu diri ni livbandre na moyo mikono; guanama nya mwanya gu diri ni livbandre na mivili mikono. 4 A di pima gambe gulapha nya hubhe nya wulanga nya Guage Ngudzu wu guromo khu ndrani: Gu diri ni magumavili mikono; guanama gwaye gu diri magumavili mikono kala mbeli nya Nyumba ya Nungungulu, a nyi embela, khuye: “Owu wulanga nya Guage Ngudzu.” 5 A di pima ndzari nya Nyumba ya Nungungulu yi diri ni livbandre na moyo mikono, ni guanama nya likhuvi ni likhuvi la dzibambe li diri ni mikono mina, khu maphuvbo yatshavbo nya Nyumba ya Nungungulu. 6 Mihubhe ya mudzibambe, yi diri khu sitezi siraru, likhuvi vbatshani nya likhuvi likwawe, magumararu makhuvi khu gitezi ni gitezi; gu diromo libhiyo ndzarini nya Nyumba ya Nungungulu khu maphuvbo yatshavbo, li hambanisa makhuvi ya mudzibambe, gasi simbi dzi khighela avbo gwaye, dzi si bedzwi vbandzaritunu nya Nyumba ya Nungungulu. 7 Mihubhe ya mudzibambe yi di gu engedzelana guanama vbatshani, kholu gikoli nya nyumba ya Nungungulu, gi di khusega ngudzu guya vbatshani gi dzundrulugela Nyumba ya Nungungulu khu maphuvbo yatshavbo. Khu guralo, guanama nya nyumba gu di engedzelana khu vbatshani. Khu kharati, gasi gu lita guya ga hubhe wa vbatshani, gu di gwedwa khu sigandro nya hubhe wa vbakari. 8 Nyi di wona gukheni wubambe gwatshavbo nya Nyumba ya Nungungulu gu di vegidwe giseketelo, khu khokhweni nya makhuvi ya mudzibambe. Gulapha gwaye gu di enedza livbandre na moyo mikono guya vbatshani. 9 Gugula nya ndzari ya vbavbandze nya makhuvi ya mudzibambe, gu diri ni livbandre mikono; ni wulanga nya gutulege vbakari nya makhuvi ya mudzibambe, wu diromo vbafuvbi ni Nyumba ya Nungungulu. 10 Gasi makhuvi ya vaphasi nya mhamba, ma diri ni magumavili mikono guanama khu maphuvbo yatshavbo nya Nyumba ya Nungungulu. 11 Gu diri ni myanya nya gubele makhuvini ya mudzibambe yi di khedziside mihubhe ya vbakari nya gutulege: Moyo wu khedza Wuronga, wumbe wu khedza Marandzi; guanama nya wulanga nya gutulege, gu diri livbandre mikono khu maphuvbo yatshavbo. Nyumba ya Muhwadambo 12 Khu phuvbo ga Muhwadambo, mahegiso nya wulanga nya gutulege, gu diromo nyumba yi nga khedzana ni Nyumba ya Nungungulu. Yi diri ni livbandre na mavili magumi (70) mikono; ndzari nya gitezi yi diri ni livbandre mikono guanama maphuvbo yatshavbo, ni livbandre na mana magumi (90) mikono gulapha. 13 Khu hwane, uye a di pima Nyumba ya Nungungulu: Yi diri ni lizana (100) mikono gulapha, likupakupa, nya Nyumba ya Nungungulu ni gitezi gumogo ni dzindzari dzaye, dzi diri ni lizana (100) mikono gulapha. 14 Guanama nya likupakupa gu manegelago phuvbo ga Khugadambo nya Nyumba ya Nungungulu ni wulanga nya hubhe, gu diri ni lizana (100) mikono eno ni eno. 15 A di pima gambe gulapha nya nyumba nya gitezi, yi nga bani yi romo wulangani nya hubhe ni hwane nya Nyumba ya Nungungulu, gumogo gambe ni makupakupa yaye khu phuvbo ga eno ni eno: Lizana mikono. Wulanga nya Guage wu nga bani wuromo makhuvini nya guphele nya hubhe, ni Wulanga nya Guage Ngudzu wu nga bani wuromo makhuvini ya ndrani gumogo ni lidimba li nga bani li khedzanide ni likupakupa. 16 Sihogo nya sidimbana nyamba tudwa, si diromo khu vbakari nya malanga ya mararu, satshavbo si nga bani na siri khu phuvbo ga vbavbandze, gupata ni kiya yaye, si di bhiyidwe khu mapulango, gu di bhiyidwe gambe vbavbatshi, ndzarini kala pimo nya sihogo; sihogwana sakone si di fenengedzidwe. 17 Wulangani wa vbatshani khu phuvbo ga vbavbandze nya makhuvi nya guage gwa ndrani ni dzindzarini ni maphuvbo yatshavbo, khu vbavbandze ni nyumbani, gu diromo mithumo nya guvatwe, 18 gu di girwa khu dzikerubhimi ni migindru; ngindru ni ngindru wu diromo khu vbakari nya likerubhimi ni likerubhimi, likerubhimi ni likerubhimi li diri ni dzikhovbe dzimbili, 19 khovbe mweyo nya muthu yi di gu khedza ngindru wa phuvbo mwedo, ni khovbe mweyo nya ginghalana, yi di gu khedza ngindru wa yimbe phuvbo; gu di girega kharati khu maphuvbo yatshavbo nya nyumba. 20 Gukhugela vbavbatshi kala vbatshani nya mwanya gu di giridwe dzikerubhimi ni migindru, gu girwa gambe kharato vbadzindzaritunu nya Nyumba ya Nungungulu. 21 Mihasimo nya Nyumba ya Nungungulu yi di gu fanana maphuvbo yatshavbo, ni mwanya nya Wulanga nya Guage Ngudzu wu diri ni giemo nya gufanane. 22 Gu diromo giluvelo nya mapulango gi nga bani giri ni mikono miraru gulapha guya vbatshani, wubambe, gi diri ni mikono mivili; dzikhona, gidzigaredzo gyaye, gumogo ni dzindzari dzaye, si diri nya mapulango; mwama a di nyi embela, khuye: “Eyi khu meza yi guromo mbeli ga Pfhumu Nungungulu.” 23 Nyumba ya Nungungulu ni Wulanga nya Guage Ngudzu, satshavbo si diri ni malimba mavili. 24 Lidimba ni lidimba li diri ni mapulango mavili; limwedo li di tulega liya eno limbe liya eno. 25 Umo nya malimba nya Nyumba ya Nungungulu, gu di giridwe dzikerubhimi ni migindru, kha nga idzo gu nga bani gu giridwe dzindzarini, gu diromo gambe libhandri nya mapulango mbeli nya likupakupa khu vbavbandze. 26 Dzindzarini dza wubambe nya likupakupa gu diri ni sihogwana nya guhonge na siri ni migindru maphuvbo yatshavbo. Makhuvi ya dzibambe nya Nyumba ya Nungungulu, ayo nayo ma di thedwe libhandri khu mapulango. |
Gitonga DC Bible © Bible Society in Mozambique, 2014.
Bible Society of Mozambique