Ezekiyeli 39 - Bhibhiliya Nya Guage

Gupadwa ga Gogi

¹ “Khu guralo, uwe, mwamana wa muthu, profeta gambe u embela Gogi, khuwe: Mune Pfhumu Nungungulu, a ngu ganela kharati, khuye: Eni nyi na gu wugela uwe Gogi, muthangeli nya khongolo wa Rosi, Meseki ni wa Tubhali.

² Nyi na gu dzundrulugisela, nyi gu thela livbandre na gimwegyo silowo. Nyi gu khusa khu phuvbo ga Wuronga, nyi gu resa sigomoni sa Israyeli.

³ Nyi na gu wandrela wulaho wa mandzani gwago gwa nyambade, nyi thesa siholoma sa mandzani gwago gwa nyamudye.

⁴ U na thega khu sigomoni sa Israyeli, uwe gumogo ni masotshwa yago yatshavbo, ni vathu nya mayigo u gu navo. U na khala guhodza nya makoti ni sirengo nya mafumbo yatshavbo ya khabini.

⁵ U na songwa tendrelani, kholu Eni nyi ganede, a ngu ganela Mune Pfhumu Nungungulu.

⁶ Nyi na rumela nilo ga va na Magogi ni ga vale va vbanyago gurulani umo nya sidwa sa linene; khavbo va na dzitigo gukhavo eni kheni Pfhumu Nungungulu.

⁷ Nyi na gira lina langu nya guage li tidwa vbakari nya vathu vangu va na Israyeli, gima kha nyi na diga gambe lina langu nya guage li nyenyeziswa; ni va nya mayigo va na dziti gukhavo kheni Pfhumu Nungungulu, a Agidego wa Israyeli.

⁸ Wonani gukhenu si nguta, gambe si na girega, a ngu ganela Mune Pfhumu Nungungulu; eli khu litshigu nyi li ganedego.

⁹ Vavbanyi va madhoropani ya Israyeli va na duga vata dzega matshari va khutha khayo nilo, gambe va na ma vbisa, sitshangu, nya sikhongolo niso nya sidugwane, malaho, siholoma, dzindronga nya nyimbi ni sighalala; va na vasa khiso nilo, gipimo nya livbandre na mivili myaga.

¹⁰ Kha va na resa dzikhuni khu gundze, ambari gu dzi koka khabini, aholu khu matshari va na vasa khayo nilo; va na wandra ga vale va nga va wandrelago, va na phanga ga vale va nga va phangago, a ngu ganela Mune Pfhumu Nungungulu.

Gudzingwa nya mahundzu ya Gogi

¹¹ Khu litshigu lolo, nyi na ninga Gogi wulanga a na girago lithowo tigoni ga Israyeli, kovani va vbindrago khumo avo endrelago Khugadambo, a gu yiphwa nya Gufe. Uye a na tshika ndzila nya avo va vbindrago khumo, kholu Gogi ni mabutho yaye, va na dzingwa mule. Khu guralo, wu na ranwa gupwani kova wa Hamomi-Gogi; gutshamusedwago gupwani mahundzu ya Gogi.

¹² Va na Israyeli va na vbedza gipimo nya livbandre na mivili migima na va gu va dzinga, gasi gu agisa litigo.

¹³ Vathu vatshavbo va tigoni va na va dzinga; litshigu nyi na dhumiswago khilo, li na bani liri litshigu nya gialakanyiso avbo gwawe. A ngu ganela Mune Pfhumu Nungungulu.

¹⁴ Hwane nya livbandre na mivili migima, gu na thodwa vama va na gimbilago tigoni nyamba garala, gasi guvbweta avo va na gu bani va tshade va va dzinga, gasi gu handza litigo.

¹⁵ Avbo va na vbindrago khu tigoni, moyo wawe a gu wona girambo nya muthu nya gukari, va na vega khu phuvbo nya girambo giyeyedzo, kala vadzingi vaya gi dzinga kovani nya Mabutho ya Gogi.

¹⁶ Lidhoropa lawe gambe li na riywa lina la Hamona. Khu kharati, avo va na agisa litigo.

Gu dzi garadza nya gukhongolo ga Pfhumu Nungungulu

¹⁷ Khu guralo, uwe, mwamana wa muthu, Mune Pfhumu Nungungulu, a ngu ganela kharati, khuye: Rana sinyoni nya mafumbo yatshavbo gumogo ni sirengo satshavbo sa khabini, khuwe: Tombanani muta, tshanganani khu maphuvbo yatshavbo mu ta gira phaso, owu nyi na wu ningelago khu enu, a gu phaso nya wukhongolo sigomoni sa Israyeli; mu na hodzani nyama ni gu selani novba.

¹⁸ Mu na hodzani nyama nya dzindrena, ni gu sela novba wa vathangeli nya litigo, nya dzinvuta, nya dzihamba, nya dziphongo ni marole yatshavbo nya gunone ya Bhasani.

¹⁹ Ga phaso wangu nyi na ningelago khu enu, mu na hodzani mafura kala mu khura ni gu sela novba kala mu leva.

²⁰ Vbamezatunu gwangu, enu mu na khura khu nyama nya dzikavalu, ni ya vagimbidzisi nya dzikareta, ni ya dzindrena gumogo ni ya masotshwa yatshavbo nya nyimbi, a ngu ganela Mune Pfhumu Nungungulu.

²¹ Nyi na nonedza wudhumo wangu vbakari ga va nya mayigo, ni vathu vatshavbo va na wona tsayiso nyi na gu wu resago ni gyandza gyangu nyi na gi handzegago vbatshani gwawe.

²² Khu litshigu lolo, ni mambe ma nga gutago, va na Israyeli va na dziti gukhavo Eni kheni Pfhumu Nungungulu wawe.

²³ Va nya mayigo va na dziti nya gukhavo va na Israyeli, va di yiswa wugumbini khu kotani nya guvivbe gwawe, kholu va nga nyi wugelago, Eni neni nyi di va sihela khovbe yangu, nyi va ningela mandzani ga valala vawe, vatshavbo va songetedwa khu matshari.

²⁴ Nyi va giride gukhedza khu gunyenyeza ni guvivba gwawe, khu guralo, nyi di va sihela khovbe yangu.

²⁵ Khu guralo, Mune Pfhumu Nungungulu, a ngu ganela kharati, khuye: “Olu, nyi na bweledza va na Jakobe khu wugumbitunu; nyi bwelo khavbo nyi pwela gisiro va na Israyeli vatshavbo; nyi na khathalela lina langu nya guage.

²⁶ Va nata divaledwa khu dzitshoni ni gumba tumbega gwatshavbo va nyi kanyisidego khugo, gikhati va na vbanyago gurulani tigoni gwawe, nyamba manega muthu nya gu va thusedzele.

²⁷ Avbo nyi na gu va wuyisago khu mayigoni ni gu bani nyi va tombaniside khu mayigoni ya valala vawe, khu vbakari gwawe nyi na dzi nonedza gukheni nyi agide mbeli nya mayigo nya mangi.

²⁸ Va na dziti gukhavo Eni kheni Pfhumu Nungungulu wawe, gikhati va na wonago gukhavo nyi va yiside wugumbitunu, bwelo khavbo nyi va tombanisa nyi va wuyisa tigoni gwawe, nyamba tshiya ni moyo hwane.

²⁹ Gima kha nyi na va sihela gambe khovbe yangu, khu guralo, nyi na guhula Liphuvbo langu ga va na Israyeli,” a ngu ganela Mune, Pfhumu Nungungulu.