Ezekiyeli 37 - Bhibhiliya Nya Guage

Kova nya marambo nya gubange

¹ Libogo la Pfhumu Nungungulu li diri ni eni; nyi di dzegwa khu Liphuvbo la Pfhumu Nungungulu li ya nyi vega vbakari nya kova moyo wu nga bani wu tade khu marambo,

² li di nyi dzundrulugisela, nyi wona nya gukheni a diri mangi ngudzu vbavbatshi nya kova, gambe ma di bangide ngudzu.

³ Khavbo avbo, a di nyi wudzisa, khuye: “Mwamana wa muthu, marambo yaya ina ma nga dzi kodza gu bwelo khavbo ma vbanya gambe, gani?” Eni nyi di hakha, kheni: “Uwe Mune Pfhumu Nungungulu, khuwe u dzitigo.”

⁴ Khavbo avbo, uye a di nyi embela, khuye: Profeta u embela marambo yaya, khuwe: Marambo nya gubange, yingisani magana ya Pfhumu Nungungulu.

⁵ Mune Pfhumu Nungungulu, a ngu ganela kharati ga marambo yaya, khuye: Wonani, nyi na thela liphuvbo gwanu, enu mu na vbanya.

⁶ Nyi na vega misivba gwanu, nyi bugisa nyama gwanu, nyi mi fenengedza khu lidowo, nyi thela gwanu liphuvbo, enu mu na vbanya. Mu na dziti gukhenu eni kheni Pfhumu Nungungulu.”

⁷ Khavbo avbo, eni nyi di profeta kha nga idzo nyi nga rumwa khidzo. Avbo nyi nga bani nyi profeta, gu di pwala gudzuma, ligwaha nya marambo ma nga bani ma gu vetana, ma di gu patana, lirambo ni lirambo ga lirambo likwawe.

⁸ Nyi di khedza, nyi wona gukheni gu diri ni misivba vbatshani gwawe, gu di dandra nyama, gu ladza lidowo vbatshani gwawe; aholu gu diri mwalo gwawe liphuvbo.

⁹ Khavbo avbo, a di nyi embela, khuye: “Profeta ga liphuvbo; profeta, uwe mwamana wa muthu, u li embela, khuwe: Mune Pfhumu Nungungulu, a ngu ganela kharati, khuye: Uwe liphuvbo, delu khu maphuvbo ya mana nya mafu, u furugedza ga sirumbi sesi, gasi si vbanya.”

¹⁰ Nyi di furugedza kha nga edzi uye a nyi rumidego khidzo, liphuvbo li di bela gwawe, sirumbi si di vbanya si khuga si ema, a diri libutho nya likhongolo!

¹¹ Khavbo avbo, a di nyi embela, khuye: “Mwamana wa muthu, marambo yaya khu va na Israyeli. Avo vari, khavo: Marambo yathu ma bangide, gu mbembide gutumba gwathu; hi mbembisidwe.

¹² Khu guralo, profeta u va embela, khuwe: Mune Pfhumu Nungungulu, a ngu ganela kharati, khuye: Enu vathu vangu, nyi na tula marowo yanu, nyi mi dusa khumo, nyi mi wuyisa tigoni ga Israyeli.

¹³ Avbo nyi na tulago marowo yanu enu vathu vangu, nyi mi dusa khumo, mu na nyiti gukhenu, eni kheni Pfhumu Nungungulu.

¹⁴ Nyi na mi thela Liphuvbo langu, mu na vbanya, nyi na mi tiyisa tigoni gwanu nya mavelego. Khavbo mu na dzitigo gukhenu Eni Pfhumu Nungungulu nyi ganede esi nyi wuya nyi si gira,” a ngu ganela Pfhumu Nungungulu.

Tshangano wa Judha ni Israyeli

¹⁵ Pfhumu Nungungulu a di nyi embela, khuye:

¹⁶ “Mwamana wa muthu, dzega gipandre nya lipulango u lova avbo, khuwe: Ga Judha ni ga va na Israyeli, vabangaladzi vaye; khu hwane dzega gimbe gipandre nya lipulango u lova avbo, khuwe: Josefa, i ndronga ya Efrayimi, ga va na Israyeli vatshavbo ni vabangaladzi vaye.

¹⁷ Dzindronga dzedzi dzi pate dangamwedo gasi dzi khala ndronga mweyo mandzani gwago.

¹⁸ Va na gyanu va gu gu wudzisa, khavo: Gasi khu vbweti gu hi embela sari khiso ginani silo sesi?

¹⁹ Uwe u na va hakha, khuwe: Mune Pfhumu Nungungulu, a ngu ganela kharati, khuye: Nyi na dzega gipandre nya ndronga ya Josefa, yi nga bani yi romo mandzani ga Efrayimi, ni ga mahundzu ya Israyeli, vabangaladzi vaye, nyi yi pata ga gipandre gya Judha, khu iso nyi na gira gipandre gimwegyo basi, si na khala gimwegyo basi mandzani gwangu.

²⁰ Sipandre nya ndronga si na gu bani na si lovidwe, si phare mandzani gwago, na va gu wona.

²¹ Khu guralo, va embele, khuwe: Mune Pfhumu Nungungulu, a ngu ganela kharati, khuye: Nyi na dusa sanana sa Israyeli khu mayigoni va thavedego umo, nyi na va tombanisa khu maphuvbo yatshavbo, nyi va resa tigoni gwawe nya mavelego.

²² Nyi na va gira lihundzu limwedo basi mafuni, sigomoni sa Israyeli, ni mufumeli moyo basi, a na khala ga vatshavbo. Gima kha va na khala gambe mayigo mavili; Ga matshigu matago gima kha va na dzi kabanisa gambe khu mifumo mivili.

²³ Gima kha va na dzi nyenyezisa gambe khu sifananiso sawe, ambari khu guvivba gwawe, mwendro khu gevbini gimbe nya guhambanise gwawe nya nayo; nyi na va vbulugisa guyeyisani gwawe gu nga va gurumedza gughoha, eni nyi va agisa. Khu guralo, avo va na khala vathu vangu, Eni nyi na khala Nungungulu wawe.

²⁴ Githumi gyangu Dhavhidhe a na khala mufumeli wawe, vatshavbo va na landrela muhavisi moyo basi, va na landrisa milayo yangu, va na vegedza sileletelo sangu ni gu si landrisa.

²⁵ Va na vbanya tigoni nyi ningidego githumi gyangu Jakobe, umo va vbanyidego umo vababe vanu. Va na vbanya umo, avo ni sanana sawe, gumogo ni situgulwana sawe, kala gupindruga; Dhavhidhe, githumi gyangu, a na khala uye mufumeli wawe kala gupindruga.

²⁶ Nyi na hunga navo gidzumeledzwano nya pwanano; gi na bani giri gidzumeledzwano nya gupindruge. Nyi na va tiyisa ni gu va andrisa, nyi na vega nyumba yangu nya miphaso vbakari gwawe, kala gupindruga

²⁷ Nyumba yangu nya miphaso, yi na bani yiri navo; eni nyi na khala Nungungulu wawe, avo va na khala vathu vangu.

²⁸ Avbo nyumba yangu nya miphaso yi na gu manegago vbakari gwawe kala gupindruga, mayigo ma na dziti gukhayo Eni kheni Pfhumu Nungungulu, nyi agisago Israyeli.”