Ezekiyeli 36 - Bhibhiliya Nya Guage

Giprofeto khu sigomo sa Israyeli

¹ Uwe, mwamana wa muthu, profeta u embela sigomo sa Israyeli, khuwe: Sigomo sa Israyeli, yingisani magana ya Pfhumu Nungungulu.

² Mune Pfhumu Nungungulu, a ngu ganela kharati, khuye: Nala ganede mayelano khu enu, khuye: Ah! Ah! Ambari ni malanga nya gulaphe ya gale, olu ma gu lumba ethu.

³ Khu guralo, profeta u ganela, khuwe: Mune Pfhumu Nungungulu, a ngu ganela kharati, khuye: Avo va di mi pfhungumula mu khala marumbi, va bwelo khavbo va mi lundrani khu maphuvbo yatshavbo, avbo enu mu nga khalani thomba nya mayigo ni gu khalani maganani nya vathu nya guvivbedwe khu monyo, ni va nya milembo.

⁴ Khu guralo, yingisani enu sigomo sa Israyeli, magana ya Mune Pfhumu Nungungulu; Mune Pfhumu Nungungulu, a ngu ganela kharati ga sigomo ni ga sigomwana, ga mitsongo ni ga mikova, ga malanga nya siwula nya guthise, ni madhoropa yakone ma phangidwego ma khala marumbi, ma vbindrugedzidego ma khala givalo ni gihegiso ga mayigo ma tshadego ya vaakelane.

⁵ Khu guralo, Mune Pfhumu Nungungulu, a ngu ganela kharati, khuye: Khu guvbisega nya monyo wangu, nyi ganede ga mayigo ma tshadego ni Edhomi watshavbo. Avo khu gutsaka ni guvivba nya myonyo yawe, va di wandra litigo langu, li khala thomba yawe, gasi va phanga mitshambi yawe.

⁶ Khu guralo, profeta ga litigo la Israyeli, u embela sigomo ni sigomwana, mitsongo ni mikova, khuwe: Mune Pfhumu Nungungulu a ngu ganela kharati, khuye: Wonani nya gukhenu eni nyi ganede khu guvbisega nya monyo wangu, kholu enu mu tshanisekide khu gu khalani na muri gihegiso vbakari nya mayigo.

⁷ Khu kotani nya isoso, Mune Pfhumu Nungungulu, a ngu ganela kharati, khuye: Nyi ngu sambanya na nyi khusedzide mandza gukheni va nya mayigo nya vaakelane va na rwale navo gihegiso gya gimwegyo.

⁸ Aholu, enu sigomo sa Israyeli, mu na gira matamo mu velega mihandro mu yi ningelaga vathu vangu va na Israyeli, kholu avo vomo vbafuvbi ni gu wuya gaya.

⁹ Kholu wonani gukhenu eni nyi ngu mi khathalela; nyi na mi khedzani khu maho nya wuhindzi; enu mu na khala wulime bwelo khavbo mu yadwa.

¹⁰ Nyi na engedzela vathu va tala tigoni gwanu gwatshavbo gwa Israyeli; madhoropa ma na khadwa khu vathu, ni malanga ma khungumudwego, ma na vbahedzwa.

¹¹ Nyi na engedzela gwanu vathu ni sirengo; avo va na engedzelana, ni melego wawe wu na andra; gu na bwelo khavbo gu manega gambe vathu nya gukhale malangani momo kha nga gale, nyi na mi andrisa ngudzu guvbindra guhegulani; a ngu ganela Pfhumu Nungungulu.

¹² Vathu vangu va Israyeli, nyi na va gira va gimbilagimbila vbatshani gwanu. Avo va na mi fuma, enu mu na khala thomba yawe; gima kha mu na songa gambe sanana sawe.

¹³ Mune Pfhumu Nungungulu, a ngu ganela kharati, khuye: Olu mu ganelago, khenu: Enu mu litigo mu songago vathu ni litigo li songago sanana sa vathu vaye,

¹⁴ khu guralo, uwe khu na songa gambe vathu, ambari gu songa sanana sa tigoni, a ngu ganela Mune Pfhumu Nungungulu.

¹⁵ Gima kha nyi na gu diga u poyidwa khu va nya mayigo; khu na khala gambe gihegiso nya mayigo, ambari vathu vago gutshunganiswa va thega. A ngu ganela Mune Pfhumu Nungungulu.

Guvbahedzwa ga Israyeli

¹⁶ Pfhumu Nungungulu a di engedza a nyi embela, khuye:

¹⁷ Mwamana wa muthu, gikhati va na Israyeli va nga bani va gu vbanya tigoni gwawe nya mavelego, avo va li nyenyeziside khu mavbanyelo ni mithumo yawe; mavbanyelo yawe ma di nyenyeza nga nyamayi gikhatini nya guwone matshigu yaye nya migima.

¹⁸ Khu guralo, nyi na guhula likhulo langu vbatshani gwawe, khu kotani nya novba va wu vbaladzidego mafuni, va bwelo khavbo va dzi nyenyezisa khu sifananiso sawe.

¹⁹ Nyi na va phalalegisa ni mayigo, avo va di phalalegiswa vbakari nya mahundzu; eni nyi na va lamula gukhedza khu mavbanyelo ni mithumo yawe.

²⁰ Ga mayigo va vbindridego khumo, avo va di ya nyenyezisa lina langu nya guage, khu guralo, va di gu ganela mayelano khu avo, khavo: Ava vathu va Pfhumu Nungungulu, avo va dusidwe khu ga litigo va ningidwego.

²¹ Aholu nyi di tedwa khu gisiro khu lina langu nya guage, li nyenyezisidwego khu va na Israyeli, vbakari nya mayigo va vbindridego khumo.

²² Khu guralo, ganela ga va na Israyeli, khuwe: Mune Pfhumu Nungungulu, a ngu ganela kharati, khuye: Khandri khu kotani gwanu enu va na Israyeli, nyi na girago silo sesi, aholu khu kotani nya lina langu nya guage, mu li nyenyezisidego vbakari nya mayigo mu vbindridego khumo.

²³ Avbo nyi na gu yeyedzago mayigo guaga nya lina langu nya likhongolo, mu li nyenyezisidego vbakari nya mayigo, khavbo avbo, mayigo ma na dziti gukhayo eni kheni Pfhumu Nungungulu, a ngu ganela Mune Pfhumu Nungungulu.

²⁴ Kholu nyi na mi dusani vbakari ga va nya mayigo, nyi mi tombanisa khu mayigoni gwatshavbo, nyi mi wuyisa tigoni gwanu nya mavelego.

²⁵ Khu guralo, nyi na mitegedzela mati nya gukatege vbatshani gwanu, mu agani; nyi na mi agisani gunyenyezani gwanu gwatshavbo mu nga dzi nyenyezisa khu sifananiso sanu.

²⁶ Nyi na mi ningani monyo nya wuphya, nyi thela ndrani gwanu liphuvbo nya liphya; nyi na dusa gwanu monyo nya giwindri nyi thela monyo nya nyama.

²⁷ Nyi na thela ndrani gwanu liphuvbo langu, nyi mi gira mu landrisa sileletelo sangu, mu vegedza milayo yangu ni gu yi landrisa.

²⁸ Mu na vbanya tigoni nyi ningidego vababe vanu; enu mu na khala vathu vangu, Eni nyi na khala Nungungulu wanu.

²⁹ Nyi na mi vbulugisa guvivbani gwanu gwatshavbo; nyi na mu resela tirigu, gambe nyi na yi andrisa, kha nyi na mu resela gambe ndzala.

³⁰ Nyi na andrisa mihandro nya misimbo ni gufuma dzimbewu marembweni, gasi mu si poyidwi gambe khu va nya mayigo khu kotani nya ndzala.

³¹ Khavbo avbo, mu na alakanyani dzindzila dzanu nya guwegele ni mithumo yanu nya guvivbe; mu na khala sirangalabwa enu vamune kamwe khu kotani nya guvivbe ni gu dzi nyenyezisa gwanu.

³² Dzitini nya gukhenu kha nyi giri esi khu kotani nya lihaladzo nanu, a ngu ganela Mune Pfhumu Nungungulu. Enu va na Israyeli, thegani vbavbatshi khu dzitshoni, khu kotani nya dzindzila dzanu nya guvivbe.

³³ Mune Pfhumu Nungungulu, a ngu ganela kharati, khuye: Litshiguni nyi na gu mi agisago guvivbani gwanu gwatshavbo, nyi na wusedza madhoropa, nyi vbahedza malanga ma nga khungumudwa.

³⁴ Tigoni gu nga bani gu khade marumbi gu khala likhabi, gu na limwa nyaluphye, mule gu nga bani gu wonwa khu vavbindri nya ndzila kha nga giwula.

³⁵ Va na ganela, khavo: Litigo leli li nga bani li khade marumbi, li khade nga lithembwe la Edheni; madhoropa ma nga bani ma khungumudwe ma vbindrugedza ma khala marumbi, olu ma vbahedzidwe ma bwelo khavbo gu khala vathu.

³⁶ Khu guralo, va nya mayigo nya vaakelane vanu va na tshalago va na dziti gukhavo eni Pfhumu Nungungulu, nyi vbahedzide madhoropa ma khungumudwego, nyi yaledza iso si nga bani si digidwe. Eni, Pfhumu Nungungulu nyi ganede, gambe nyi na si gira.

³⁷ Mune Pfhumu Nungungulu, a ngu ganela kharati, khuye: Ambari khu esi, nyi nga na gu dzumedzisa gukheni va na Israyeli, va na gire nombelo, va nyi lomba gukhavo nyi va phase, nyi andrisa vathu vawe kha nga tshambi nya dzinvuta.

³⁸ Kha nga tshambi wu agisedwego, kha nga tshambi wa Jerusalema matshiguni nya mibuzo. Kharato nugo madhoropa nya marumbi, ma na tala khu mapango nya vathu. Avo va na dziti gukhavo eni kheni Pfhumu Nungungulu.”