Ezekiyeli 35 - Bhibhiliya Nya Guage

Giprofeto khu Edhomi

¹ Pfhumu Nungungulu a di nyi embela khuye:

² “Mwamana wa muthu, thendregedza khovbe yago u khedza gigomo gya Seyiri, u gi profeta.

³ Gi embele, khuwe: Mune Pfhumu Nungungulu, a ngu ganela kharati, khuye: Uwe gigomo gya Seyiri, nyi na dwana nago, nyi khusedza gyandza gyangu nyi gu sasela, litigo lago li na khala giwula nya guthise.

⁴ Nyi na vbindrugedza madhoropa yago ma khala marumbi, uwe u na mbembiswa. Khavbo avbo, u na dziti gukhuwe eni kheni Pfhumu Nungungulu.

⁵ Kholu u yade livengo kala gupindruga, khu gu ningela va na Israyeli va sasedwa khu matshari, gikhatini nya sigaradzo ni tsayiso nya guhegise.

⁶ Khu kotani nya isoso, Mune Pfhumu Nungungulu, a ngu ganela khuye, nyi ngu sambanya khu guvbanya gwangu, kheni: Nyi gu duside novba, novba wu na gu lundra; kholu u dzumede gukhuwe novba wu vbaladzwa tigoni, uwo wu na gu lundra.

⁷ Gigomo gya Seyiri nyi na gi gira gi khala marumbi nya guthise, gambe nyi na songa vatshavbo va na gu vbindra khumo gumogo ni gu wuya.

⁸ Nyi na tadza sigomo sago khu sirumbi nya vathu vago va songetedwego; avo va na gu songwago khu matshari, va na thegela sigomwanani, mikovani ni mitsongoni gwago.

⁹ Nyi na gu gira marumbi kala gupindruga, ni madhoropa yago, gima kha ma na nga khadwa khu vathu; kharati mu na dzitini gukhenu Eni kheni Pfhumu Nungungulu.

¹⁰ Kholu mwa gu ganela, khenu: Mahundzu yaya ya mavili, ni mayigo yaya ya mavili, ma na khala yathu, ambari olu Pfhumu Nungungulu a nga bani a manegelago vbale.

¹¹ Kotani nya isoso, Mune Pfhumu Nungungulu, a ngu ganela kharati khuye, nyi ngu sambanya khu guvbanya gwangu, kheni: Nyi na gu tsayisa gukhedza khu likhulo, lidiwo ni livengo u va giredego, avo va na nyiti gikhati nyi na gu lamulago.

¹² U na dziti gukhuwe, eni Pfhumu Nungungulu, nyi pwide guyuyutela gwatshavbo u gu giridego musigomoni sa Israyeli, u ganela, khuwe: Olu va khade marumbi, va ningedwe mandzani gwathu gasi hi va vbadzulela.

¹³ Mu dwanide ni eni khu likana lanu, mu engedzela magana nya gu nyi vale; eni nyi ma pwide.

¹⁴ Mune Pfhumu Nungungulu, a ngu ganela kharati, khuye: Avbo litigo latshavbo li na gu dzipwa na li tangade, eni nyi na gu pfhungumula u khala marumbi.

¹⁵ Kha nga idzo u tsakidego khidzo khu gu pfhungumudwa ga Israyeli, nyi na gu gira nuwe kharato; uwe gigomo gya Seyiri gumogo ni Edhomi gwatshavbo, mu na pfhungumudwa, khavbo mu na dzitigo gukhenu eni kheni Pfhumu Nungungulu.