Ezekiyeli 34 - Bhibhiliya Nya Guage

Giprofeto khu vahavisi nyamba tumbega

¹ Pfhumu Nungungulu a di nyi embela, khuye:

² “Mwamana wa muthu, profeta ga vahavisi va Israyeli; va profete u va embela, khuwe: Mune Pfhumu Nungungulu, a ngu ganela kharati, khuye: Libango ga vahavisi va Israyeli va dzi havisago avo vabune! Gasi thumo wa vahavisi khandri wa gu havisa dzinvuta, gani?

³ Mwa gu hodzani mafura, mu ambala guambala nya seda, mu sindza sirengo nya gunone; aholu kha mu sayisi dzinvuta.

⁴ Iyo nya gumbana tshivba kha wa yi tiyisa, iyo yi dwalago, khwa yi hawulugisa, ni gu hungelela silondra iyo yi nga bayiswago. Idzo dzi nga pambugago, kha mwa dzi wuyisa, ambari idzo dzi dzimedego kha mwa dzi landra. Aholu mwa gu dzi fumela khu tshivba ni dzihanyi.

⁵ Khu guralo, olu dzi phalalegide, kholu dzi mwalo muhavisi, dzi khala guhodza nya sirengo satshavbo sa khabini.

⁶ Dzinvuta dzangu dzi phalalegide dzi legalega sigomoni ni musigomwanani. Dzi phalalegide ni litigo latshavbo, mwalo muthu a nga khathala khu gu dzi landrelela, aya dzi dzega a wuya nadzo.

⁷ Khu guralo, enu vahavisi, yingisani magana ya Pfhumu Nungungulu a, gukhuye:

⁸ “Nyi ngu sambanya khu guvbanya gwangu kheni, a ngu ganela Mune Pfhumu Nungungulu: Olu tshambi wangu wu gu mwalo muhavisi, wu phangidwego wu khala guhodza nya sirengo sa khabini, ni olu vahavisi vangu va ngamba khathala khu tshambi wangu, va dzi havisa avo vabune va si havisi tshambi wangu,

⁹ khu guralo, enu vahavisi, yingisani magana ya Pfhumu Nungungulu a ganelago, khuye:

¹⁰ Mune Pfhumu Nungungulu, a ngu ganela kharati, khuye: Wonani gukhenu nyi na wugela vahavisi nyi va rwega nandru khu tshambi wangu; nyi na vbedza wuhavisi wawe, kha va na dzi havisa gambe vabune; nyi na vbulugisa dzinvuta dzangu kanani gwawe, gasi dzi si khali gambe guhodza gwawe.

Mufumo wa Nungungulu

¹¹ Kholu Mune Pfhumu Nungungulu, a ngu ganela kharati, khuye: “Wonani gukhenu eni mune kamwe nyi na vbweta dzinvuta dzangu dzi dzimedego nyi dzi wuyisa.

¹² Kha nga muhavisi a wuyisago dzinvuta dzaye, litshiguni a manago idzo dzi dzimedego, kharato eni neni nyi na vbweta dzinvuta dzangu. Nyi na dzi wuyisa khu malangani yatshavbo dzi phalalegedego umo khu litshigu nya mazuvi ni gidema.

¹³ Nyi na dzi dusa khu ga mambe mayigo nyi dzi tombanisa, nyi dzi wuyisa tigoni gwawe nya mavelego. Nyi nata dzi havisa sigomoni sa Israyeli, vbafuvbi ni mitsongo ni malangani yatshavbo ya tigoni gu khadwago khu vathu.

¹⁴ Nyi na dzi havisa mahawoni nya yadi, ni sigomoni nya gulaphe sa Israyeli, gu na bani guri wuhaviseloni gwawe; dzi na khala umo wuhaviseloni gwawe, dzi na mana mahawo nya yadi sigomoni sa Israyeli.

¹⁵ Eni kamwe nyi na havisa dzinvuta dzangu, nyi na dzi gira dzi hefemula, a ngu ganela Mune Pfhumu Nungungulu.

¹⁶ Nyi na vbwetedzela idzo dzi dzimedego, nyi wuyisa idzo dzi phalalegidego, nyi na hungelela iyo yi bayisidwego, nyi tiyisa iyo yi vbedego tshivba; aholu iyo nya gukanyise ni iyo nya tshivba nyi na dzi mbembisa. Nyi na dzi havisa khu gululama.

¹⁷ Gasi enu dzimbe dzinvuta dzangu, Mune Pfhumu Nungungulu, a ngu ganela kharati, khuye: Nyi na lamula khu gululama vbakari gwanu, nyi na hatha dzinvuta, dziphongo ni dzihamba.

¹⁸ Ina gilo gi dugwana gu hodzani wuhaviseloni nya wadi, mu bwelo mu gandredzelani khu migondro esi si tshadego nya mahawo, gani? Ina kha si mi tsakisi gu selani mati nya guage, gani? Gu ngu lombega gu ayo ma tshadego mu ma vhilusa khu migondro, gani?

¹⁹ Ina dzinvuta dzangu dzi fanede guhodza esi mu si gandredzedego ni gu sela ayo mu ma vhilusidego khu migondro, gani?

²⁰ Khu kotani nya isoso, Mune Pfhumu Nungungulu, a ngu ganela kharati, khuye: Eni mune kamwe nyi na lamula vbakari nya dzinvuta nya guene ni idzo nya guwondre.

²¹ Khu guralo, enu mu gurumedzide dzinvuta dzangu gu rindrividza khu hwambo ni magata, mu tshovha khu dzikeho idzo nyambana tshivba kala mu dzi dusa vbavbandze;

²² eni nyi na vbulugisa dzinvuta dzangu gasi dzi si khali guhodza nya sirengo sa khabini, nyi na lamula vbakari nya dzinvuta ni dzinvuta.

²³ Nyi na emisa muhavisi moyo gasi a khale muhavisi wawe, uye a na dzi havisa; githumi gyangu Dhavhidhe khuye a na dzi havisago; uye a na khala muhavisi wawe.

²⁴ Eni Pfhumu Nungungulu nyi na khala Nungungulu wawe, gasi githumi gyangu Dhavhidhe a na khala muthangeli vbakari gwawe. Eni Pfhumu Nungungulu nyi ganede kharato.

²⁵ Nyi na gira nadzo gidzumeledzwano nya pwanano, nyi na fuvisa sirengo nya likhabi tigoni; dzi na khala khu gurula giwulani, gambe dzi na lala khabini.

²⁶ Eni nyi na dzi kategisa nyi kategisa gambe malanga ma randredego gigomwana gyangu; nyi na wisa ndzadzi khu gikhati gyakone, a na bani nari ndzadzi nya makategwa.

²⁷ Misimbo ya khabini yi na ninga mihandro yaye, ni mafu ma na ninga dzimbewu dzaye, dzinvuta dzi na khala gurulani tigoni gwawe; dzi na dziti gu khidzo eni kheni Pfhumu Nungungulu, gikhati nyi na fanyago mapitso nya kanga wawe ni gu dzi dusa mandzani ga vale va dzi tshanisago.

²⁸ Olu kha dzi na phangwa gambe khu va nya mayigo, ambari gu hodzwa khu sirengo sa khabini. Dzi na vbanya khu gurula, mwalo a na dzi thusedzelago.

²⁹ Nyi na dzi ninga marembwe nya gunone, gima kha dzi na mbembiswa khu ndzala tigoni, ambari gu khala gihegiso ga va nya mayigo.

³⁰ Va na dziti gukhavo, eni Pfhumu Nungungulu wawe, nyi womo gumogo navo, avo litigo la Israyeli, vathu vangu, a ngu ganela Mune Pfhumu Nungungulu.

³¹ Khu guralo, enu dzinvuta dzangu, dzinvuta nya wuhaviselo wangu; enu mu vathu, aholu eni kheni Nungungulu wanu,” a ngu ganela Mune Pfhumu Nungungulu.