Ezekiyeli 33 - Bhibhiliya Nya Guage

Thumo wa muwoneleli nya lisine

¹ Pfhumu Nungungulu a di nyi embela, khuye:

² Mwamana wa muthu, ganela ni va na gyanu u va embela, khuwe: Nya gu rumela dzinyimbi gasi guta sasela litigo nya gukari, litigo lolo, li na hathe mwama moyo gasi gu khala muwoneleli,

³ a gu wona gukhuye nyimbi yi nguta gasi guta sasela litigo, a na wombe pundru gasi gu tivisa vathu;

⁴ khavbo avbo, uye a na pwago gudzuma nya pundru a si khathali, a ta songwa khu litshari, novba waye wu na thegela hungoni gwaye.

⁵ Kholu uye pwide gudzuma nya pundru, aholu a si khathali khu iso; uye a na rwala nandru nya lufu laye; kholu nari gupwani a di khathade khu gitiviso, uye na vbulugiside womi waye.

⁶ Aholu, muwoneleli, a gu wona gukhuye yi nguta nyimbi ni valala a si wombi pundru, gasi gu tivisa vathu; valala vata songa moyo nya avo, mwama yoyo a na songwa khu kotani nya wuvivbi waye, aholu eni nyi na rwega nandru muwoneleli khu kotani ya wule a songidwego.

⁷ Khu guralo, eni nyi gu emiside uwe mwamana wa muthu, gasi gu khala muwoneleli nya ndranga ya Israyeli; khu guralo, uwe yingisa magana ma dugago khu kanani gwangu u va tivisa khu gipandre gyangu.

⁸ Eni nya gu ganela ga uye nya guvivbedwe khu monyo, kheni: Khu lisine uye a nafa, uwe u si mu embeli gasi uye a ndreye ndzilani nya guvivbe, muthu wule nya guvivbedwe khu monyo a nafa khu kotani nya wuvivbi waye, aholu eni nyi na gu rwega nandru khu gufa ga muthu yoyo.

⁹ Aholu, uwe wa gu kawuka muthu nya guvivbedwe khu monyo gasi a diga ndzila yaye nya guwegele, uye a gumba diga ndzila yaye nya guvivbe, uye a nafa khu kotani nya sighoho saye, aholu uwe u na vbulugisa womi wago.

¹⁰ Khu guralo, uwe, mwamana wa muthu, tivisa ndranga ya Israyeli, khuwe: Enu mwari, khenu: Ethu ha gu lemedwa khu nandru nya sighoho sathu, olu hi ngu vbweta gumbemba khu kotani nya iso, hi na dzi vbanyisa kharini?

¹¹ Va embele, khuwe: Mune Pfhumu Nungungulu, a ngu sambanya khuye, kha nyi tsakiswi khu gufa ga muthu nya guvivbedwe khu monyo, aholu nya gu tsakiswa khu gu muthu nya guvivbedwe khu monyo a ndreye ndzilani gwaye nya guwegele a kodza guvbanya, vbindrugedzani, vbindrugedzani dzindzilani gwanu nya guwegele; khu ginani vathu vago va na fago, uwe litigo la Israyeli?

¹² Khu guralo, uwe, mwamana wa muthu, tivisa va na gyanu, khuwe: Muthu nya gululame a gu hambanisa nayo, gululama gwaye, kha gu na mu vbulugisa. Aholu muthu nya guvivbedwe khu monyo, a gu vbindrugedza mavbanyelo uye gima kha na mana tsayiso, ambari ni uye a lulamidego kha na vbanya litshigu a na ghohago.

¹³ Gasi nya gu embela muthu nya gululame kheni, uye, a na vbanya, aholu uye na gu tumba gululama gwaye, a thuma mithumo nya guvivbe, mithumo yaye nya gululame kha nyi na yi dundruga; aholu uye a nafa khu guvivba a giridego.

¹⁴ Aholu nya gu embela muthu nya guvivbedwe khu monyo, kheni: Khu lisine, u nafa; aholu uye a gu vbindrugedza a dzi laya khu sighoho saye a gira ugo gu lulamidego ni lisine,

¹⁵ uye nya guvivbe monyo a gu bweledza esi a wandridego ni esi a nga bago, a gu vbanya khu nongameto nya gulandrise sileletelo nya guvbanyise, a si giri gambe guvivba, uye kha na ngafa; khu lisine, uye a na vbanya.

¹⁶ Mwalo ni moyo a na dundrugago sighoho a giridego; a gu bani giride mithumo nya gululame ni nongameto, khu lisine, a na vbanya.

¹⁷ Khu guralo, va na gyanu va gu ganela, khavo: Ndzila ya Pfhumu kha ya lulama. Narigu ndzila yawe khiyo yi ngamba lulama.

¹⁸ Aholu muthu nya gululame a gu diga ndzila yaye nya gululame, a gira guvivba, a nafa.

¹⁹ Muthu nya guvivbedwe khu monyo a gu vbindrugedza a gira gululama ni lisine, a na vbanya khu gu gira isoso.

²⁰ “Khu guralo, enu va na Israyeli mwa gu ganela, khenu: Ndzila ya Pfhumu kha ya lulama. Aholu eni nyi na mu lamula, muthu ni muthu gukhedza khu dzindzila dzaye.”

Tsayiso wa Israyeli khu guyeyisa gwaye

²¹ Khu litshigu nya livbandre, nya ngima nya likhumi, nya mwaga nya likhumi na mivili, a dita avbo gwangu mwama moyo a nga thava khu Jerusalema a ta nyi embela, khuye: “Lidhoropa li khungumudwe.”

²² Gasi khu silambo si vbindridego, Pfhumu Nungungulu a di nyi handzega mandza, na si gu vbohi mwama a nga vbulugago; a di nyi tula likana langu, na li tulegide gima kha nya nga degula gambe.

²³ Khavbo avbo, Pfhumu Nungungulu a di nyi embela, khuye:

²⁴ Mwamana wa muthu, vathu va vbanyago marumbini mule ga na Israyeli, va gu ganela, khavo: Abrahama a diri moyo basi; aholu, manide litigo leli; gasi ethu hi gu vangi, khu lisine hi na hakha litigo kha nga thomba.

²⁵ Khu guralo, va tivise, khuwe: Mune Pfhumu Nungungulu, a ngu ganela kharati, khuye: Kha nga olu mu hodzago nyama ni novba wakone, mu bwelo khavbo mu khozela sifananiso ni gu vbaladza novba; ina mu nga na gu khala vamune litigo leli, gani?

²⁶ Enu mwa gu tumba matshari yanu, mu gira silo nya gunyenyeze, moyo ni moyo nya enu a gu nyenyezisa mwangadzi wa muakelane waye; ina mu na li manani litigo leli, gani?

²⁷ U na va embela kharati, khuwe: Mune Pfhumu Nungungulu, a ngu ganela kharati, khuye: Nyi ngu sambanya khu guvbanya gwangu kheni, avo va tshadego marumbini va na songwa khu matshari, avo va guromo khabini, nyi na va ningela va hodzwa khu sirengo sa khabini, ni avo va na gu sihalago makhokholani ni mavbalani va nafa khu tungu.

²⁸ Nyi na vbindrugedza litigo li khala giwula nyambana muthu, nyi na fuvisa matshandza nya tshivba yaye, sigomo sa Israyeli si na khala giwula, nya gu, mwalo a na vbindrago khumo.

²⁹ Khavbo va na dzitigo gukhavo eni kheni Pfhumu Nungungulu, gikhati nyi na girago litigo li khala marumbi nya guthise, khu kotani nya guvivba gwatshavbo va giridego.

³⁰ Gasi ga uwe, mwamana wa muthu, va na gyanu va ngu ganela khu uwe umo nya mabhiyo ni dzinyangwani nya dzinyumba; va ganela khu gyawe, moyo ni moyo ga ndriyaye, khavo: Deluni muta yingisa magana ma tago khu ga Pfhumu Nungungulu.

³¹ Avo va guta gwago kha nga giolovedzo gyawe, va gu khala mbeli gwago gasi gu yingisa magana yago, aholu kha va ma landrisi. Va gu ganela khu magana khavo va ngu nyi gola, narigu khu myonyoni gwawe va gu alakanyela bhindzu nyambana fanelo.

³² Wona gukhuwe u womo gwawe kha nga uye a embelelago dzindzimo nya lihaladzo, khu lito nya gumbure li pwalago gwadi; kholu va gupwa magana yago aholu kha va ma landrisi.

³³ “Aholu esi u ganelago si na girega! Khu gikhati gyogyo, khavbo va na dzitigo gukhavo a di romo vbakari gwawe muprofeti nya gukari.”