Ezekiyeli 30 - Bhibhiliya Nya Guage

Giprofeto mayelano khu litigo la Egipito ni Faro

¹ Pfhumu Nungungulu a di nyi embela, khuye:

² Mwamana wa muthu, profeta u ganela, khuwe: Mune Pfhumu Nungungulu, a ngu ganela kharati, khuye: Wombani huwa mu ganela, khenu: Yowe Libango! Ga litshigu lile!

³ Kholu litshigu lomo vbafuvbi, lisine, lomo vbafuvbi litshigu la Pfhumu Nungungulu, litshigu nya mazuvi; a na bani ari gikhati nya tsayiso wa va nya mayigo.

⁴ Egipito a nata sasedwa khu matshari, gu na manega gililo nya gikhongolo tigoni ga Etiyopiya, avbo va na gu thegago avo va nga songwago tigoni ga Egipito; vathu vawe va na vbagedwa va yiswa wugumbitunu, gu khungumuledwa siseketelo sawe.

⁵ Etiyopiya, Puti, Ludhi ni Arabhiya watshavbo, avo va Kubhi ni vathu nya litigo va giridego navo gidzumeledzwano, va na songetedwa khu matshari gumogo ni Egipito.

⁶ Pfhumu Nungungulu a ngu ganela kharati, khuye: “Vale va emelago Egipito, avo navo va na songetedwa, ni matshandza nya tshivba yawe, ma na theswa vbavbatshi gukhugela Migidholi kala Seveni, va na songetedwa khu matshari; a ngu ganela Mune Pfhumu Nungungulu.

⁷ Va na khala giwula vbakari nya mayigo ma gu siwula; ni madhoropa yaye ma na khala marumbi vbakari nya madhoropa ma gu marumbi.

⁸ Va na dziti gukhavo eni kheni Pfhumu Nungungulu, avbo nyi na vbisago Egipito khu nilo, ni gikhati va na gu mbembiswago vatshavbo vale va nga bani na va gu mu phasedzela.

⁹ Ga litshigu lolo, nyi na rumela sirumwa khu mataro, gasi guya thusa Etiyopiya, a dzipwago na khade gurulani; wuvi wu na manega gwawe, kha nga litshigu nya gulamudwe Egipito, kholu khu lisine litshigu lolo li na vboha.

¹⁰ Mune Pfhumu Nungungulu, a ngu ganela kharati, khuye: Khu guralo, eni nyi na fuvisa nya vangi va Egipito, khu mandza ya Nabhukodhonosori, mufumeli wa Bhabhiloni.

¹¹ Uye gumogo ni masotshwa yaye, ni vathu nya dzihanyi va mambe mayigo, va na dzegwa gasi guya mbembisa litigo, va na homola matshari yawe va wugela Egipito, va na tadza litigo khu sirumbi.

¹² Nyi na bangisa mitsongo, ni gu rengisa litigo, khu gu li ningela mandzani ga vathu nya dzihanyi; khu mandzani ga va nya mayigo, nyi na gira marumbi litigo ni satshavbo si guromo umo; kheni Pfhumu Nungungulu nyi ganedego isoso.”

¹³ Mune Pfhumu Nungungulu, a ngu ganela kharati, khuye: Nyi na khungumula gambe sifananiso, ni gu vbedza vanungungulu va Menifisi; kha gu na manega gambe vathangeli tigoni ga Egipito, nyi na thela hwanga tigoni gwatshavbo.

¹⁴ Litigo la Patrusi, nyi na li gira marumbi, nyi na rotha nilo tigoni ga Zowani, nyi tsayisa vathu va tigoni ga Nohi.

¹⁵ Nyi na guhula likhulo langu vbatshani ga Sine, likhokhola la Egipito, nyi mbembisa gidzemo gya Nohi.

¹⁶ Nyi na khondrisa nilo tigoni ga Egipito; Sine a na bani ari ni wuvi nya wukhongolo ngudzu, Nohi a na khungumudwa, ni Menifisi a na lundrwa khu valala vaye vbakari nya mihani.

¹⁷ Madzaha ya Avheni ni va Pi-Bheseti, va na songwa khu matshari, vathu va madhoropani momo, va na vbagedwa va yiswa wugumbini.

¹⁸ Tigoni ga Tafinisi, gu na manega gidema vbakari nya mihani, gikhati nyi na fanyeledzelago mikanga ya Egipito, nyi vbedza matshandza nya tshivba yaye; sanana saye nya vanyamahegyane, si na fenengedzwa khu lipfhi si yiswa wugumbini.

¹⁹ Gikhati nyi na tsayisago Egipito, khavbo va na nyitigo gukhavo Eni kheni Pfhumu Nungungulu.

²⁰ Khu litshigu nya livbandre na mavili, nya ngima nya guhegule, nya mwaga nya likhumi na moyo, Pfhumu Nungungulu a di nyi embela, khuye:

²¹ Mwamana wa muthu, eni nyi fanyide libogo la Faro, mufumeli wa Egipito, wonani nya khenu kha hungeledwa, ambari gu theledzedwa rendre, mwendro gudzongeledzedwa mikeka, gasi gu li mana tshivba a kodza gu phara gambe litshari.

²² Khu guralo, Mune Pfhumu Nungungulu, a ngu ganela kharati, khuye: Wonani nya gukhenu nyi ngu wugela Faro, mufumeli wa Egipito; nyi na mu fanya mawogo yaye ya mavili eli li gu ni tshivba, ambari lile li fanyegidego, nyi na thesa litshari li guromo mandzani gwaye.

²³ Nyi na phalalegisa Vagipiti vbakari nya mayigo, nyi va legalegisa vbakari nya mambe mayigo.

²⁴ Nyi na ninga tshivba mufumeli wa Bhabhiloni, nyi mu pharisa mandzani litshari langu; aholu nyi na fanya mawogo ya Faro, uye a na dilela khu wuvi nya gupadwe, kha nga muthu a thegago khu gu songwa.

²⁵ Nyi na khusedza mawogo ya mufumeli wa Bhabhiloni, aholu mawogo ya Faro, ma na khala wugara; va na nyiti gukhavo Eni kheni Pfhumu Nungungulu, gikhati nyi na vegago litshari langu mandzani ga mufumeli wa Bhabhiloni, uye a na li khusedza a sasela litigo la Egipito.

²⁶ Nyi na phalalegisa Vagipiti vbakari nya mahundzu, nyi va phalalegisa vbakari ga mambe mayigo; khavbo avbo, va na dziti gukhavo Eni kheni Pfhumu Nungungulu.