Ezekiyeli 29 - Bhibhiliya Nya Guage

Giprofeto khu Egipito

¹ Khu litshigu nya likhumi na mavili, nya ngima nya likhumi, nya mwaga nya likhumi nya gu bani hi yisidwe wugumbitunu, Pfhumu Nungungulu a di nyi embela, khuye:

² Mwamana wa muthu, thendregedza khovbe u khedza Faro, mufumeli wa Egipito, gumogo ni Egipito Gwatshavbo.

³ U va embela, khuwe: Mune Pfhumu Nungungulu, a ngu ganela kharati, khuye: “Nyi na gu wugela uwe Faro, mufumeli wa Egipito, uwe ngona nya yikhongolo, u ladego vbakari nya mitsongo yago, na wu gu ganela, khuwe: Tsongo wa Nilo khwangu; kheni nyi wu giridego gasi wu khale wangu kamwe.”

⁴ Aholu eni nyi na vegela silowo sigundruni gwago, khu hwane nyi na namaredzisa sidzuwane sa mitsongoni yago, milini gwago; nyi na gu dusa khu vbakari nya mitsongoni yago, gumogo ni sidzuwane sago satshavbo, na si namarede magwaruni gwago.

⁵ Nyi na gu dzudzuga giwulani, uwe gumogo ni sidzuwane satshavbo sa mitsongoni yago; u na thegela thembweni nyambana gilo; khu na roledwa ambari gu wungedzedwa; nyi na gu ningela ga sirengo sa khabini ni ga sinyoni sa damboni gasi u khala guhodza gwawe.

⁶ Vavbanyi vatshavbo va Egipito, va na nyiti gukhavo kheni Pfhumu Nungungulu, kholu va khade ndronga mweyo nya tshava vbakari ga va na Israyeli.

⁷ Avbo avo va nga gu mola khu mandza, uwe u di fanyega u va bayisa magata; avbo va nga gu khighela, uwe u di pandrega u va bayisa siwunu sawe si ndrendremela.

⁸ Khu guralo, Mune Pfhumu Nungungulu, a ngu ganela kharati, khuye: Wona nya gukhuwe, nyi na gu resela dzinyimbi dzi ta mbembisa vathu ni sirengo sago.

⁹ Litigo la Egipito li na khungumudwa li khala giwula; khavbo va na dzitigo gukhavo Eni kheni Pfhumu Nungungulu.

¹⁰ Olu u ganedego gukhuwe: Tsongo khwangu, kheni nyi wu giridego, eni nyi ngu wugela uwe gumogo ni mitsongo yago; nyi na gira litigo la Egipito li khala giwula, marumbi nya guvbelele, gukhugela Migidholi kala Seveni, nyi vboha kala mivbinganoni ga Etiyopiya.

¹¹ Kha gu na vbindra khu vbale ngondro moyo nya muthu, mwendro nya girengo; gambe kha gu na khala vathu kala magumana myaga,

¹² Khu guralo, litigo la Egipito nyi na li gira marumbi vbakari nya mayigo ma gu marumbi; ni madhoropa yaye, vbakari nya madhoropa ma gu marumbi, gukhugela gipimo nya magumana myaga; nyi na phalalegisa Vagipiti vbakari nya mahundzu ni gu va legalegisa vbakari nya mambe mayigo.

¹³ Aholu, Mune Pfhumu Nungungulu a ngu ganela kharati, khuye: Guvbelani nya magumana myaga, nyi na tombanisa Vagipiti khu mayigoni gwatshavbo va phalalegedego umo.

¹⁴ Nyi na wuyisa Vagipiti vale va nga bani va romo wugumbini, va wuya tigoni ga Patrusi, tigoni gwawe nya mavelego; avbo va naya wumbago mufumo nyambana tshivba.

¹⁵ Wu na khala mufumo nya wudugwane ngudzu guvbindra yimbe mifumo, gima kha wu na dzi khusedza vbatshani nya yimbe mifumo, nyi na wu tsongahata gasi wu si khozisi mambe mayigo.

¹⁶ “Egipito gima kha na tumbega gambe ga litigo la Israyeli, aholu gu na gira gialakanyiso nya guvivbe a giridego gikhati va lombidwego giphaso. Khavbo va na dzitigo gukhavo kheni Mune Pfhumu Nungungulu.”

¹⁷ Khu litshigu nya guhegule, nya ngima nya guphele nya mwaga nya magumavili na livbandre na mivili (27), Pfhumu Nungungulu a di nyi embela, khuye:

¹⁸ “Mwamana wa muthu, Nabhukodhonosori, mufumeli wa Bhabhiloni, rumede masotshwa yaye gu gira thumo nya gulemele tigoni ga Tiro; vatshavbo va di vidwa makhwalu mihungoni gwawe, magata yawe ma di kuluwugela, aholu mufumeli ni masotshwa yaye, kha va mana bhindzu ga Tiro, khu thumo va wu giridego nya gu mu dwanise.

¹⁹ Khu guralo, Mune Pfhumu Nungungulu, a ngu ganela kharati, khuye: Wonani nya gukhenu nyi na ningela litigo la Egipito mandzani ga Nabhukodhonosori, mufumeli wa Bhabhiloni, uye a na li sasela, a phanga silo saye satshavbo a hongola naso, gasi gu gira tshatshazelo ga masotshwa yaye.

²⁰ Eni nyi mu ningide Egipito gasi gu mu tshatshazela khu tshivba yaye, khu esi uye gumogo ni masotshwa yaye va nyi giredego. A ngu ganela Mune Pfhumu Nungungulu.

²¹ “Khu litshigu lolo, nyi na wusa tshivba ya na Israyeli, nyi na gu embela magana u na ganelago nyamba kanakana vbakari gwawe; va na dziti gukhavo eni kheni Pfhumu Nungungulu.”